1 Mu ntangu beyoyo, bantu bedi kwe dyatasaningi mu dyambu ti mafunda na mafunda ma bantu makutakana, Yesu wutona mu zonza ku milongoki myandi ti: «Kebeeno kweno mu bilongo bi Bafalisi bikwe vimbisanga kiputi, ni diisu dyawu ku nsye lukaya. 2 Misamu mimvimba miswama myaayenika na mansweki mamvimba mazabakana. 3 Mu dyambu ti, mimvimba mi luteedi mu mpimpa, myaayuwakana mu mwini, mpe mi luzonzidi mu mfundu mu kati di bihinga bi nzo, myaabatumbula mu ngolo ku bantu.

4 Yeno zinkayi zani nina luteela ti: lubandi na bunkuta mu yoyobo bakwe hondanga nitu ko, mpe kumanima, balendi hidika nakani kima ko. 5 Bika naluteela nani lufweti yena bunkuta. Yeneeno Nzambi bunkuta wuna lulendo lwe tuba muntu ku mbungulu bu kameni muhonda. Kedika, nina luteela, yandi lufweti yenanga bunkuta.

6 Kadi bakwe yadikanga maseke matanu mu mbongo zi bisengo zole ko e? Kansi Nzambi kazimbakani kani dimosi ko. 7 Kati milengi mi mitu myeno myakazebi lutangu. Luyenandi bunkuta ko, luvudidi mfunu na maseke mamingi.

8 Nina luteela ti: wonso muntu wantambula ha meso ma bantu ti yandi mulongoki ani kadi, Mwana Muntu mpe waamutambula ha meso ma zimbazi zi Nzambi, 9 kansi wonso wambisa ha meso ma bantu, Mwana Muntu mpe waamubisa ha meso ma zimbazi zi Nzambi. 10 Mpe wonso waazonzila bumbi mu Mwana muntu, ba mu lemvokila, kansi wonso waatyaka Mpeve Yilongo, kaalemvokolo ko.

11 Bu baalunata mu zinzo zi lusambulu zi Bayudayo, ku zimfumu na ku minyaadi, lukikwamisandi ko mu zaba bwedi lwaazonzila na nki lwaata, 12 mu dyambu ti Mpeve Yilongo yina lulonga mu ntangu beyoyo myo mi lwaata.»

13 Wumosi mu kati di mpumbu wumuteela ti: «Mulongisi, teela mpangi ani kakabula naani fwa diba tusisila.» 14 Yandi wumuteela ti: «Nani wunsodidi mu ba mumfundisi eno hoti mu kabula bimvwama byeno e?» 15 Mboki wubateedidi ti: «Kebeno kweno mu nsatu yi bimvwama bi nza, mu dyambu ti luzingu lu muntu ludi mu bimvwama byandi ko kati kimvwama kikingi kinandi.»

16 Buna wubayadila kingana eki: «Mvwama yimosi yiba na bibiti bitoma buta mboongo yiyingi. 17 Wedi yindula ni ka kifuula ku nsye mutima andi ti: "Nki naasa mu dyambu ti nina kibuka kikingi kye lundila mboongo beyiyi ko e?" 18 Mboki wuta dyaka ti: "Ebu naasila: nina mwangisa bilundulu byani, naatunga bivudi bunene, mboki naayonzika bele dyani dimvimba na mvwilu ani. 19 Ku manima, naata ku meno bende ti: Mwela ani, weka na mvwilu yifwika yi lundamani mu mvula zizingi. Huuma kwaku, dya, nwa na yangalala mu kizingu kyaku." 20 Kansi Nzambi wumuteedidi ti: "Kihulu kinani wudi, mpimpa beyiyi kwandi mwela aku wa nabonga, bwabu bimvwama byaku bi wukubikidi ku nani byaasala e?"» 21 «Ni bwabobo budi ku muntu yonzikidi bimvwama bi yandi bende, kansi ha meso ma Nzambi ka mvwama ko.»

22 Yesu wuta ku milongoki myandi ti: «Bonso bu nalutedidi: ka lukikwamisandi mu dyambu di luzingu lweno mu bye dya, mpe mu dyambu di nitu zeno mu bye lwata. 23 Mu dyambu ti luzingu luvudi mfunu na bindya, mpe nitu yi hyokidi mfunu na binkutu. 24 Taleeno minganga: mi kunanga ko, mi yonzikanga ko, bana matanda na nzo zizinene ze lundila bima ko, mpe Nzambi kwe badikilanga. Yeno luhyokidi zinuni mfunu! 25 Nani mu yeno mu nyongono zandi lenda bwesa fyoti bilumbu bi luzingu lwandi e? 26 Tala ti lulendi lenda mu sa mwa kima kifyoti ko, mu dyambu di nki luna ki kwamisina mu bima bihiika e? 27 Taleeno bwedi bifulu bimfuba bikwe kudilanga: bikwe salanga ko, bikwe syetanga ko, kansi nina luteela ti: Kaati Solomo mu bimvwama byandi bimvimba, kasala lwaata binkutu bivudidi ntoko bonso kifulu kimosi mu bifulu bebibi ko. 28 Tala ti Nzambi bwabobo kakwe lwikilanga bititi bidi bubedidi mu mfuba na mbazi bina tubu ku tiya, bila nki kalembolo lusila bo! Yeno bantu ba kiminu kifyoti ludi! 29 Lukikwamisandi mu kwe sosingi ko nki lwaadya na nki lwaanwa. 30 Ni bantu balembolo ba Bayudayo ba nza beyiyi, bakwe kwe sosingi bima bimvimba bebyobyo, ntangu zimvimba. Kansi yeno, Tata eno zebi ti bii neeno nsatu. 31 Kansi, soseeno ntete Kimfumu ki Nzambi na mbo kaluhaana bihiika bisidi.

32 Luyenandi bunkuta ko, yeno mwa kamba di mameme, mu dyambu ti Tata eno yeni ti bumbote mu luhaana Kimfumu. 33 Yadikeeno mvwilu zeno na haaneeno zo ku bamputu. Saleeno nkutu zimbongo zikwe lembolo bebanga, yonzikeeno bimvwama bi yulu bikwe lembolo hwanga, kokoko mwivi kutuula mpe na bansyedi kudya mpe. 34 Kedika, honso ha kimvwama kyaku, hahoho mpe ha mutima aku.

35 Kubameeno, melika nakekete mu luketo na minda minama. 36 Mpe beno bonso babakala bana kingila mfumu awu mu ntangu yi kaavutuka ku nzo, kumanima ma mukembo wu makwela, mwanki bu katula na bu kakonkota, ba tumbu muzibudila. 37 Kyese ku mindongo bemyomyo, mfumu bu katula, waakwiza ba bwana buna mina kaya meso! Kedika nina luteela, mfumu waakanga melika mu luketo, waabazakisa ha meza, mboki waabahaana bindya. 38 Tala ti wizidi mu nsusu yinzole hoti yimitatu na wizi ba bata bana kaya meso, kyese kyawu.

39 Yuweno: tala ti mfumu yi nzo zebi nkye kilokola kyaayizila mwivi, kalendi tala katobola nzo andi ko. 40 Yeno mpe beno bakubama, mu dyambu ti Mwana Muntu waakwiza mu kilokola ki lulembolo zaba.»

41 Petelo wumufuula ti: «Mfumu, mu yeto wunateela kingana bekiki hoti mu bamvimba e?»

42 Mfumu wuvutula ti: «Bwabu, nkye munkebi wu mvwilu wukwikama wusodidi mfumu na wu kasiididi kivuvu, yondowo mfumu wukasoodidi mutwadisa bisadi byandi bimvimba na mu ba haana mu ntangu yi fwanakani kitezo ki bele? 43 Kyese ku mundongo bewowo, mfumu bu kaavutuka, wumubweni buna wuna sala. 44 Kedika nalutedidi: "Mbo kamutuula ha mutwala wu mvwilu andi yimvimba." 45 Tala ti mundongo bewowo teedi ku nsye mutima andi ti: "Mfumu ani kana tumbu vutuka ko", na tonini mu tuta bisadi bi babakala na bi bakento nkuba, mu dya, mu nwa na mu kolo. 46 Mfumu yi mundongo bewowo bu kaavutuka mu kilumbu ki kana lembolo mu kingila na mu ntangu yi ka lembolo zaba, mbo kamuzenga mu bibuku byole na mbo kamuhaana kitumbu ha kimosi na balembolo kiminu. 47 Mundongo bewowo waazaba nsatu zi mfumu andi, kansi kakubikidi kani kima ko na kasadidi luzolo lwandi ko, mbo kamututa nkuba yi ngolo. 48 Mundongo bewowo waalembolo zaba nsatu zi mfumu andi na waahidika misamu mi fweti haanunu nsembolo, nkuba yifyoti baamututa. Ku yondowo wubaheeni bima bibingi, bima mpe bibingi baamulomba, ku yondowo wubaswekisi bima bibingi, bivudidi mpe bamulomba.»

49 Meno nizidi mu tuba tiya ha luse lu butoto bwabu ntiidi ti malumalu beyiyi tunama. 50 Meno mbotokolo yimosi nabaka mpeleko yina mfyetikisa beni natee bu ya lungisa nsilulu. 51 Lubanzidi ti na yizidi mu lu haana kiyenge ha luse lu butoto e? Kani, kansi na luteedidi ti nkabani. 52 Kedika mu ntangu beyiyi, bantu batanu ba nzo yimosi ba hambana, batatu babela bole, na bole babela batatu. 53 Mbo ba kabuka: tata waabela mwana wu bakala na mwana wu bakala waabela tata, mama waabela mwana wu mukento na mwana wu mukento waabela mama, buko bu mukento waabela kikwezi ki mukento na kikwezi ki mukento waabela buko bu mukento.

54 Yesu mpe wuta ku mpumbu yi bantu ti: «Bu lwaayena tuti dina tomboka ku wesete, mu ntangu beyoyo, luteedi ti: "Mvula yi kitembo yaanoka." Mpe yinokini. 55 Mu ntangu mupepe wukwe fumanga ku ndambu yi sude bu waakukula, luteedi ti: "tiya tu nsisi twaaba." Mpe twizidi. 56 Yeno bankwa diisu ku nsye lukaya, luzebi mu tanga bidimbu bi yulu na butoto bina yenika, bwedi luna lembikinina mu tanga ntangu beyiyi e?

57 Mu dyambu di nki lukwe lembolo kifundisilanga yeno bende mu zaba dyambu dimbote e? 58 Kedika, tala ti wenzi mpe mutantu aku ha ntadisi yi mumfundisi, mu nzila yuwasaneeno, lumanisa nandi mwanki kabika mu kunata ha ntadisi yi mumfundisi, nga mumfundisi mbo kakuyekola ku muntu kwe sadilanga ntumunu zinzo yi lufundusu mpe yandi waa ku tuula mu boloko. 59 Nkatika nakuteedidi, wulendi duuka mu boloko ko tala ti kumeni mu futa mfuka aku ko natee ku mbongo yi kisengo yimanunu.»