1 Kilumbu kimosi ki saba, Yesu wuyenda kota mu nzo yi mfumu yimosi yi Bafalisi mu dya nawu. Bafalisi ni bedi mutalanga. 2 Mpe bakala dimosi diba na nkunki diba ditelama ha ntadisi andi . 3 Buna Yesu wufuula milongisi mi Misiku na Bafalisi ti: «Nga musiku eto wulendi tu haana luve mu nyakisa mu kilumbu kisaba hoti kani e?» 4 Hamuhaana muntu mvutu ko, kansi Yesu wusimba mbevo, wumunyakisa na wumuvutula. 5 Wubateela ti: «Nani mu yeno, tala ti mwana andi hoti ngombe andi yi yibwidi mu bulu kilumbu ki saba, walembolo tumbu kwe tombola wo e?» 6 Balembakana muhaana mvutu mu kyuvu bekyokyo.

7 Yesu bu kayena bantu ba batumisa ku mukembo bwedi bedi kwe kalangani bibuka bintete, wubateela kingana eki ti: 8 «Tala ti muntu wu kutumisi ku mukembo wu makwela, kwendandi wuzakala ha kibuka kintete mu dyambu ti bulendi ba ti ku na muntu wu kuhyokidi mfunu batumisi, 9 mpe yondowo wulutumisi yeno babole lenda kwiza kuteela ti: "Mubiikila kibuka." Mbo wuyena nsoni mu kwe zakala ku manima. 10 Kansi bamana kutumisa, yenda wuzakala ha kibuka ki manima, mwanki yondowo wu lutumisi bu kaakwiza, waakuteela ti: "nkayi ani, yiza wuzakala ku mutwala." Bwabobo waabakila masiika ku bamvimba baazakala naaku ha meza. 11 Ni hahoho, wonso waakizangula baamukulula na wonso waakikulula baamuzangula.»

12 Ni kata mpe ku yondowo wu mutumisa ti: bukwe hidikilanga ndambisa yi mwini hoti yi busuku, kutumisandi zinkayi zaku ko, zimpangi zaku ko, tata na ngudi aku ko, na ka mvwama zikwe banga bela-bela naaku ko. Mu dyambu ti yawu mpe balenda kutumisa na baakuvutudila myo mi wubasididi. 13 Kansi bu waahidikisa ndambisa yi mukembo, tumisa miwelo, baa na malu matabuka, baa na byeta na bampofo. 14 Mbo wuba mu kyese mu dyambu ti ba na kima kimosi kye kuvutudila ko. Nzambi waakuhaana musendo aku haaba mfulukulu yi bantu baa lunungu.

15 Bu kayuwa kingana bekyokyo, wumosi mu yobobo baba nandi ha meza wuteela Yesu ti: «Kyese ku yondowo waadya mu Kimfumu ki Nzambi!» 16 Wumuvutudila ti: «Bakala dimosi wukubika ndambisa yiyinene na wutumisa bantu babingi. 17 Mu ntangu ye dya, wufidisa mundongo andi mu teela ba katumisa ti: "Yizeno, mu dyambu ti bimvimba bikubamani" 18 Kansi bamvimba baahaana mpengomokono mu mutindu wumosi. Wuntete wumuteela ti: "Mfuba na sumbidi mfweti kwenda ye tala. Nina kulomba wu ndemvokila." 19 Wuhiika wumuteela ti: "Ngombe kumi na sumbidi, nenzi mu kwe zesinsa, nina kulomba wu ndemvokila." 20 Wuhiika dyaka teedi ti: "Mbo ha kwa na kwedidi, ndendi kwiza ko." 21 Bu kavutuka, mundongo wuzaabisa mimvimba ku mfumu andi. Ni hahoho bu kabaka mankesi, mfumu yi nzo teedi ku mundongo andi ti: "Yenda nswalu, mu zinzila zizinene na zizikeke zi mbanza mpe twala kuku miwelo, baa na malu matabuka, bampofo na baa na byeta." 22 Mundongo teedi ti: "Mfumu, nsidi bonso buwutumini, kansi bibuka byakiidi." 23 Buna mfumu wuteela ku mundongo ti: "Yenda nswalu mu zinzila zi zimfuba na ku zimpangu, na kwikisa bantu biza bakota mwanki nzo ani yi fuluka. 24 Kedika nina luteela, ka bakala dimosi ko mu yobobo baantumisi waabimba ndambisa ani!"»

25 Mpumbu yiyinene yi bantu yi yenda nzila yimosi na Yesu bu kabaluka (kasyetoka) wubateela ti: 26 «Tala ti muntu tiidi mu ba mulongoki ani, fweti tya kuhyoka tata andi, ngudi andi, mukento andi, baala bandi, mpangi zandi zi babakala na zi bakento mpe luzingu lwandi ko. Tala ti kasidi bo ko, kalendi ba mulongoki ani ko. 27 Wonso walembolo nanguna kulunsi dyandi mu kwe ndandi, kalendi ba mulongoki ani ko. 28 Kedika, nani ha kati dyeno tiidi mu tunga nzo yi kibanga, tala ti kazakadi ntetentete ko mu zaba ntalu yi mbongo na mu zaba tala ti ya kalenda mu manisa. 29 Ti kabwako waatungisa lufulu, kansi kamanisa yo ko. Bamvimba baamuyena, bakwe museyi 30 na mbo bata ti: "Bakala bedidi ditona mu tunga nzo kansi kalenda mu manisa yo ko!" 31 Nkye ntinu, yaakwenda nwana mvita na ntinu yihiika, walembolo teka zakala mu fyongonina mu zaba tala ti mu mafunda kumi ma bantu lenda nwanisa ntinu yihiika wu na mafunda makumole. 32 Tala ti kaalenda ko, mbo kafidisa kitwami ku wuhiika bu kakidi kukula mu mulomba kiyenge. 33 Ni hahoho, wonso-wonso ha kati dyeno tala ti kabiikidi mvwilu andi ko, kalendi ba mulongoki ani ko.

34 Mungwa wumbote wudi. Kansi tala ti weka na zubulu, bwedi tulenda we vutudila nzenzo e? 35 Wusidi kisalu ko, kani mu dyambu di butoto na kani mu dyambu di mbodila, ku mbazi baalosa wo. Yondowo wuna makutu mu yuwa kayuwa!»