1 Mu mvula yi kumi na tanu mu kimfumu ki ntinu Tibeli, buna Ponso Pilatu wuna yaala kizunga ki Yuda, Elode ku kizunga ki Ngalili, Filipi mpangi awu ku kizunga ki Ituli na ki Takonitite, mboki Lisania ku kizunga ki Abileni. 2 Mpe buna, Ana na Kayifa badi zimfumu zi zinganga-Nzambi, mambu ma Nzambi mayuwakana ku Yoane, mwana Zakaliya, ku nsi yinkatu. 3 Yoane wuzyeta ku kizunga ki ba bela-bela na nzadi yi Yolodani na wubateela ebu: «Viluleeno madyela, mpe botameeno, mwanki Nzambi kalulemvokila masumu meno.»

4 Bonso budi busonama mu buuku di mumbikudi Yesaya:

«Ni ndinga yi muntu yina bokana ku nsi yinkatu:

Kubikeeno nzila yi Mfumu,

mpe sungikeeno nzila zandi!

5 Mabenga mamvimba maafuluka mu butoto,

milandu mimvimba na matenta mamvimba maabetomoka,

nzila zitengama zaasungama,

nzila zimbi zaaba nalengo-lengo,

6 mpe bantu bamvimba baayena mpulusu yi fumini ku Nzambi.»

7 Bantu babingi bedi kwizanga ku Yoane mwanki ka babotika, ni kedi bateelanga ti: «Kanda di zimpidi! Nani wululwengisi mu tina nganzi zi Nzambi zeka bela-bela e? 8 Lonkeeno mimbutu mina lonka ti luviludi madyela, ka muta ko ti: "Abalahami, nkaka eto yidi!" Mu dyambu ti Nzambi lenda sa ti matadi bemama ma kituka baala ba Abalahami. 9 Bwabu kiibi kikubamani mu zenga miti mu myanzi: ni hahoho myonso miti mikwe lembolo butanga mbutu zimbote mya kwangu mpe mya tubu ku tiya.»

10 Mukangu ni wumufuula ti: «Bwabu yeto nki tufweti sa e?» 11 Wuvutula ti: «Wonso muntu wuna binkutu byole, bika kaheeka kimosi ku mu nandi lembolo kyo, mpe wonso wuna bindya kakabula ku yondowo lembolo ba na byo.»

12 Bitoti bimpaku mpe bayiza mu botama, bafuula Yoane ti: «Mulongisi, yeto nki tufweti sa e?» 13 Wubavutudila ti: «Lubwesandi mbongo ha yulu ntalu yimpaku yizenga luyaalu ko.»

14 Bambulumbulu mpe bamufuula ti: «Hambo yeto, nki tufweti sa e?» Wubavutudila ti: «Luzikandi mbongo zi muntu ko, mpe luhuninandi muntu musamu ko, kansi sadileeno kwandi mufutu wu lukwe bakanga mu ngonda.»

15 Mukangu bu wedi kingilanga Mesiya, bamvimba bedi kifulanga: «Kadi Yoane kaa ni Mesiya ko e?» 16 Ni hahoho, Yoane kabateela ti: «Meno, nina lubotika mu mamba kansi kuna kwiza muntu wumvudidi lulendo. Niidi wulunga ko mu munyanguna misinga mi nsampatu zandi. Yandi, waalubotika mu Mpeve Yilongo na mu tiya. 17 Simbidi ha kooko kwandi muti we yengisila, mu hambisa mbutu zibele na bititi. Wuna yonzika mbutu zibele mu kati di kilundulu* mpe wuna yoka bititi ku tiya tukwe lembolo zimanga.»

18 Yoane wusyamisa mukangu mu ndongolo zizingi. Na wubazabisa Musamu Wumbote. 19 Kansi Yoane wusemba ntinu Elode, wedi yaalanga kizunga ki Ngalili, mu dyambu di Elodiade, mukento wu mpangi andi Filipi, mpe mu misamu mihiika mimbi mi kahidika. 20 Elode wuhidika dyaka musamu wumbi, wutuula Yoane mu boloko.

21 Bu kamana botika bantu bamvimba, Yesu mpe wubotoko. Bu kedi sambila, yulu dizibuka, 22 mboki Mpeve Yilongo yikulumuka ku yandi mu lunitu lu kifwani ki bembe. Ndinga yiyuwakana tuuka ku yulu: «Ngeye ni mwana ani wunkwe toma tyanga, kyese kyani kimvimba mu ngeye kidi.»

23 Yesu bu katona kisalu kyandi, kampe buna wu na mvula makumatatu. Bantu babanza ti wuba mwana wu Yosefi, Yosefi wuba mwana Heli, 24 Heli mwana Matati, Matati mwana Levi, Levi mwana Meleki, Meleki mwana Yanayi, Yanayi mwana Yosefi, 25 Yosefi mwana Matatyase,

Matatyase mwana Amosi, Amosi mwana Nahumi, Nahumi mwana Heseli, Heseli mwana Nangayi, 26 Nangayi mwana Mahati, Mahati mwana Matatyase.

Matatyase mwana Semeyeni, Semeyeni mwana Yoseki.

Yoseki mwana Yoda, 27 Yoda mwana Yoanani, Yoanani mwana Lesa, Lesa mwana Zolobabeli.

Zolobabeli mwana Salatieli, Salatieli mwana Neli. 28 Neli mwana Meleki, Meleki mwana Adi,

Adi mwana Kosami, Kosami mwana Elemadami. Elemadami mwana Edi, 29 Edi mwana Yesu.

Yesu mwana Eliyezeli, Eliyezeli mwana Yolime, Yolime mwana Matati, Matati mwana Levi, 30 Levi mwana Simeoni, Simeoni mwana Yuda,

Yuda mwana Yosefi, Yosefi mwana Yonami, Yonami mwana Eliakime, 31 Eliakime mwana Meleya, Meleya mwana Mena, Mena mwana Matata, Matata mwana Natani na Natani mwana Davidi, 32 Davidi mwana Yese, Yese mwana Obedi, Obedi mwana Bozi, Bozi mwana Sala, Sala mwana Nasoni, 33 Nasoni mwana Aminadabi, Aminadabi mwana Adimini, Adimini mwana Alani, Alani mwana Heselomi, Heselomi mwana Falesi, Falesi mwana Yuda, 34 Yuda mwana Yakobi, Yakobi mwana Isaaki, Isaaki mwana Abalahami,

Abalahami mwana Tela, mpe Tela mwana Naholi, Naholi mwana Saluki, 35 Saluki mwana Lango, Lango mwana Faleki, Faleki mwana Ebeli,

Ebeli mwana Sala, 36 Sala mwana Kayinami, Kayinami mwana Alefasadi, Alefasadi mwana Semi, Semi mwana Nowa, Nowa mwana Lameki. 37 Lameki mwana Matusalemi, Matusalemi mwana Henoki,

Henoki mwana Yaleti, Yaleti mwana Maleleli, Maleleli mwana Kayinami, 38 Kayinami mwana Enosi, Enosi mwana Seti, Seti mwana Adami, Adami mwana Nzambi.