Mbutukulu yi Yesu
1 Mu ntangu beyoyo, mfumu Kayisali Angustu wuhaana lutumu, mu zaba lutangu lu bantu bamvimba ba nsi zi mu luyaalu lwandi. 2 Lutangu belolo, lusalama, buna Kilinyuse wu mfumu mu kizunga ki Siliya. 3 Bantu bamvimba bedi kwenda sonama, muntu-muntu ku yandi mbanza yi kabutukila. 4 Yosefi mpe wukatuka ku Nazaleti, mbanza yi kizunga ki Ngalili na wuyenda ku kizunga ki Yuda, ku mbanza yi nkumbu Betelemi, mu dyambu ti, wuba mwisi kanda di Davidi, 5 mwanki ka kisonikisa na Maliya, wu kasila nsilulu yi makwela, wuba na zimi. 6 Buna bakidi ku Betelemi, ntangu yi Maliya ye buta yitula. 7 Maliya wubuta mwana wubakala, ni mwana andi wuntete. Wumuzinga mulele na wumulambikisa mu kati di kidikulu ki bibulu, mu dyambu ti babaka kibuka mu nzo yi banzenza ko.
Mbazi yiyenikina mimvungi
8 Mu kizunga bekyokyo kwandi, kuba na mimvungi myedi kenganga mpimpa yimvimba bibulu byawu mu zimfuba. 9 Mbazi yi Mfumu yi bayenikina, mpe nkembo Mfumu wu lezima na wu bazungidila. Mboki, bayena bunkuta bubwingi. 10 Kansi mbazi yibateela ti: «Lubandi na bunkuta ko! Mu dyambu ti nalutwadidi musamu wumbote wa yangidika bantu babingi: 11 mu mpimpa beyiyi, ku mbanza Davidi, balubutidi Mumvukisi eno, ni Klisto, Mfumu. 12 Mu kidimbu eki lwaamuzabila: Luna yena mwana wunsombe wuba zingidi mulele, mpe bamulambikisi mu kidikulu ki bibulu.»
13 Bayitukulu kwawu, kamba di zimbazi diyiza bundana na mbazi yitekila nawu, bakembila Nzambi ebu:
14 «Nkembo ku Nzambi mu mazulu
ye kiyenge ha butoto ku bantu bazolakana.»