Mbazi yiyenikina mimvungi
8 Mu kizunga bekyokyo kwandi, kuba na mimvungi myedi kenganga mpimpa yimvimba bibulu byawu mu zimfuba. 9 Mbazi yi Mfumu yi bayenikina, mpe nkembo Mfumu wu lezima na wu bazungidila. Mboki, bayena bunkuta bubwingi. 10 Kansi mbazi yibateela ti: «Lubandi na bunkuta ko! Mu dyambu ti nalutwadidi musamu wumbote wa yangidika bantu babingi: 11 mu mpimpa beyiyi, ku mbanza Davidi, balubutidi Mumvukisi eno, ni Klisto, Mfumu. 12 Mu kidimbu eki lwaamuzabila: Luna yena mwana wunsombe wuba zingidi mulele, mpe bamulambikisi mu kidikulu ki bibulu.»
13 Bayitukulu kwawu, kamba di zimbazi diyiza bundana na mbazi yitekila nawu, bakembila Nzambi ebu:
14 «Nkembo ku Nzambi mu mazulu
ye kiyenge ha butoto ku bantu bazolakana.»
Mimvungi miyenda ku Betelemi
15 Zimbazi bu zisa basisa, zivutuka ku yulu na mimvungi mitelasana: «Twendeeno tii ku Betelemi mu tala nkye misamu mihyokidi kooko, misamu mitutedidi Mfumu.» 16 Buna bayenda mu muswalu na bayenda yena Maliya, Yosefi na mwana wubalambikisa mu kidikulu ki bibulu. 17 Bu bayena mwana, bayala mpolo yi misamu mimvimba mi bateela mbazi mu dyambu di mwana. 18 Bantu bamvimba bayuwa misamu mita mimvungi bayituku. 19 Maliya wulunda misamu bemyomyo mu mutima andi na wusosa muzaba mbangudulu. 20 Mboki mimvungi mivutuka. Bakembila na basiika Nzambi mu mimvimba mi bayuwa na mi bayena, mu dyambu ti mimvimba miyenda detila bonso bu bateela myo mbazi.