LUKA 8

Yesu wufulukisa mwana wu Yayilo na wunyakisa mukento wusimba kinkutu kyandi

40 Bu kavutuka, mpumbu yi bantu yiyiza bwana Yesu, mu dyambu ti bamvimba bedi mukingilanga. 41 Kuba na bakala dimosi nkumbu andi Yayilo, mfumu yi nzo yi lusambulu yi Bayudayo kaba. Wuyiza fukama ha malu ma Yesu na wumubombidila kenda ku nzo andi, 42 mu dyambu ti mwana andi wakwa wumosi wuba wu mukento, wu mvula kumi na zole, wuba lukufi mu fwa. Bu kedi kwe yenzi, mpumbu yi bantu yedi kwe mufyetakani.

43 Kuba na mukento wumosi wuba na kimbevo kye kwe totokingi menga, kizingila mvula kumi na zole. Wumanisa mvwilu andi yimvimba ku mimbuki. Kansi, kani muntu kalenda mu mubuka ko. 44 Wufinama kumanima ma Yesu na wumusimba mu sambu di kinkutu kyandi. Mboki, kimbevo kye kwe totokingi menga ki tumbu hwa. 45 Yesu wufuula: «Nani wunsimbidi e?» Bamvimba bu babisa kwawu, Petelo ni kamuteela ti: «Mfumu, mpumbu yi bantu yi kuzungididi, na yina kwe kufyetakani.» 46 Kansi Yesu wumuvutudila ti: «Kedika, muntu wunsimbidi, mu dyambu ti, nyeni ti lulendo luduukidi mu nitu ani.» 47 Mukento bewowo, bu kayena ti bamubakudi, wuyiza mu kintekoto mpe wufukama ha malu ma Yesu na wubangula ha ntadisi yi mukangu wumvimba, bila nki kamusimbidi na bwedi kanyakini mu kilokola bekyokyo kwandi. 48 Kansi Yesu wumuteela ti: «Mwana ani, kiminu kyaku ki kuvuukisi, yenda mu kiyenge.»

49 Tekila Yesu kamanisa mu zonza, muntu wumosi wufuma ku nzo yi mfumu yi nzo yi lusambulu yi Bayudayo wuyiza muteela ti: «Mwana aku wufwidi, ku kwamisandi Mfumu ko.» 50 Kansi Yesu bu kayuwa bobo, wuteela ku Yayilo ti: «Kubandi na bunkuta ko, sa kwandi kiminu, mwana aku waanyaka.» 51 Bu katula ku nzo yi Yayilo, katya mu kota na muntu mu nzo ko, tala ti ka Petelo na Yoane na Zaki mpe na ngudi na tata di mwana ko. 52 Bamvimba bedi dila na kunyonga mu dyambu di mwana. Kansi Yesu wubateela ti: «ludilandi ko. Kafwidyandi ko, kansi tolo kwandi kabwidi.» 53 Baseyila Yesu, mu dyambu ti bazaba ti wufwa kadi. 54 Kansi, Yesu wumusimba mu koko na wuzonza mu ngolo: «Mwana, telama!» 55 Kihumunu ki mwana kivutuka na wutumbu telama. Yesu wu batuma ba muhaana bindya. 56 Ngudi na tata di mwana bayituku bubwingi. Kansi Yesu wu bakanikina mu ta ku bantu musamu bewowo wuhyokidi.