1 ኔኖ፥ ኔና ይሰናን ደእሽን ይስያዎ፥ ነዉ አየ አና! ኔኖ፥ ኔና አ እመናን ደእሽን፥ አ እምያዎ፥ ነዉ አየ አና! ኔን ይሱዋ አጌዳ ዎደ ኔና ይሳና፤ ኔን አ እሙዋ አጌዳ ዎደ ኔና አ እማና።

2 አቤት መና ጎዳዉ፥ ኑና ማራ፤ ኑን ኔና ናጌቶ፤ ዎንታ ዎንታ ኑዉ ዎልቃ ግዳ፤ መቱዋ ዎደካ ኑና አሽያዋ ግዳ። 3 ነ ኮሻይ ጉጉንዳን ጉምያ ዎደ አሳይ ባቃቴ፤ ኔን ኑና ማዳናዉ ደንዳ ኤቂያ ዎደ፥ ካዉተቱ ላለቲኖ። 4 ጎንዱ ሺቅያዋዳን፥ ህንተ ኦሞዱ ሺቃና፤ ቦሊ ድርቢያዋዳን፥ አሳይ አ ቦላ ድርባና።

5 መና ጎዳይ ቦላን ደእያ ድራዉ፥ ቁ ቁ ጌዳ፤ እ ጽዮነ ሱረ ፕርዳንነ ጽሎተን ኩንና። 6 እ ህንተንቶ ህንተ ዎድያ ምንያዋ፥ ህንተ ኩመን አቶተ፥ አዳ ኤራተነ ኤራ ግዳናዋ፤ መና ጎዳዉ ያይያዌ አዉ አቆ ግዳናዋ።

7 በእተ፥ ኡንቱንቱ ዎልቃማ አሳቱ ኦግያን ዋሲኖ፤ ስጋተዉ ኪቴዳዋንቱካ ምሸቲደ ዬኪኖ። 8 አኮ ኦገቱ ኦኔድኖ፤ ኦግያና አያዌ አጌዳ። እ ባረ ጫቀቴዳ ጫቁዋ ኮሌዳ፤ ካታማቱዋካ ካዳ። አሳካ ደምቤና። 9 ቢታይ ካዮቴነ ላባኔ። ሊባኖስ ዬላቲደ መሌ፤ ሳሮና ግያ አራዳ ድልባይ መላ ቢታ ግዴዳ። ባሳነ ግያ ደርያንነ ቃርመሎሳ ደርያን ደእያ ምቱዋ ሀይይ ቆቆፈቴ።

10 መና ጎዳይ ካዉተቶ ሀዋዳን ያጌ፤ "ሀእ ታን ደንዳና፤ ሀእ ታን ቦንቼታና፤ ሀእ ታን ቁ ቁ ጋና። 11 ህንተ ኡቱላ ሻሃሪደ፥ ሱላ የሌድታ። ህንተ ሸምፕያ ሸምፑ ህንተና ምያ ታማ። 12 አሳይ ታማን ጹገቴዳ ብድን ማላ ግዳናዋ፤ ቃይ ቃንጸቲደ፥ ታማን ኤጼዳ አጉን ማላ ግዳናዋ። 13 ህንተኖ፥ ሃኩዋን ደእያዋንቶ፥ ታን ኦዳዋ ስስተ፤ ማታን ደእያዋንቶ፥ ታን ዎልቃማ ግድያዋ አኬክተ" ያጌ።

14 ጽዮነን ደእያ ናጋራንቻቱ ያዬድኖ፤ ጾሳዉ ግደናዋንታ ኮኮርሳይ ኦይቄዳ። ሄዋ ድራዉ፥ ኡንቱንቱ፥ "ምያ ታማና ደአናዉ ዳንዳይያ ኡራይ ኑ ግዶን ኦኔ? ኤጺደ ደእ አግያዋና ደአናዉ ዳንዳይያ ኡራይ ኑ ግዶን ኦኔ?" ያጊኖ። 15 ጽሎተን ሀመትያዌ፥ ሱረባ ሃሳይያዌ፥ ሱረ ግደና ኦግያና ቤትያ ጎኣ እጽያዌ፥ ማታይያ አካናዉ ባረ ኩሽያ የደናዌ፥ ሱ ጉስያዋ ስሰናዳን፥ ባረ ሀይ ቱጭያዌ፥ ኢታባ ጼለናዳን፥ ባረ አይፍያ ጪልምያዌ፥ 16 ሄ ኡራይ ቃሳን ደአና። እ ባቃቲደ አታና ሳአይካ ምኖ ዛላ ደኡዋ ግዳናዋ፤ አ ኡክይካ አዉ እመታና፤ እ ኡሽያ ሃይካ ፓጨና።

17 ህንተ አይፈቱ ካትያ አ ፑላና በአና፤ ሃኪደ ደእያ ቢታካ በአና። 18 ህንተ ዎዛናይ፥ "ፓይዴዳዌ ሀቃን ደኢ? ጊራ ይግ ጼሌዳዌ ሀቃን ደኢ? አዱሳ ግምበቱዋ ፓይዴዳዌ ሀቃን ደኢ?" ያጊደ ያሽያ በንዋ ቆፓና። 19 ህንተ ቃረት ባይና አሳቱዋ፥ ህንተንቶ ገለና ሃሳያ ሃሳይያ አሳቱዋነ እንጻርሳይ ዴዶትያ አሳቱዋ ሀዋፐ ስንን በእክታ።

20 ኑን ኑ ባላ ቦንችያ ጽዮነ ካታማ በእተ! ዎፑ ጊደ ደኢያሳ፥ አ ሽካሊ ሾደተና፥ አ ዎዶሩካ ዱጸናነ ቃጸና ዱንካንያ ማላ፥ የሩሳላመ ካታማ ህንተ ህንተ አይፍያን በአና። 21 ሽን መና ጎዳይ ኑዉ ሄ ሳኣን ባረ ዎልቃማ ዎልቃ ቆንጭሳና። ሄ ሳአይ አኮ ሻፋቱነ ጎግያ ሃቱዋ ማላ ግዳናዋ። ላግያ ዎሉዎሉ አ ቦላና ባናዉ ዳንዳየና፤ ዎልቃማ ማርካቢካ ያና አናዉ ዳንዳየና። 22 አያዉ ጎፐ፥ መና ጎዳይ ኑ ዳና፤ መና ጎዳይ ኑዉ ህግያ እሜዳዋ። መና ጎዳይ ኑ ካትያ፤ እ ኑና አሻና።

23 ነ ዎዶሩዋ ቃሹ ሾልኤዳ፤ ማርካብያ ቱሳ አ ሳኣን ምንስ ኦይቃናዉ ዎይ ሻራካ ጻጋጋናዉ ዳንዳየና። ሄ ዎደ ዳሮ ኦሞዲደ አሄዳባይ ሻከታና፤ ሀራይ አትና፥ ዎባቱካ ኦሞዱዋ ኦሞዳና። 24 ጽዮነን ደእያ ኦንነ፥ "ታን ሀርጋይ" ያገና፤ ያን ደእያ አሳ ናጋራይ አቶ ጌተታና።