Apocalipse 5

Daut Buak un daut Laum

1 Un ekj sach een Buak en de rajchte Haunt von däm, dee doa opp däm Troon saut, beschräwen von bennen un aune Hinjasied, un vesäajelt met säwen Säajels. 2 Un ekj sach eenen stoakjen Enjel, met lude Stemm, utroopen: Wäa es wirdich, daut Buak op to moaken un siene Säajels to bräakjen? 3 Un kjeena em Himmel uk nich opp Ieeden uk nich unja de Ieed, kunn daut Buak opmoaken uk nich doa nenkjikjen. 4 Un ekj hield sea, daut kjeena wirdich jefungen wort, daut Buak op to moaken un daut to läsen uk nich doa nenn to kjikjen. 5 Un eena von de Eltestasch säd to mie: Hiel nich! Kjikj, de Leiw von Juda sien Staum, de Wartel von David, haft äwawunden, daut Buak op to moaken un siene säwen Säajels to bräakjen. 6 Un ekj sach, un kjikj, enne Medd von däm Troon un de vea Tieren, un enne Medd von de Eltestasch, stunt een Laum, soo aus jeschlacht; daut haud säwen Hieena un säwen Uagen, woone sent de säwen Jeista von Gott, jeschekjt äwa de gaunze Ieed. 7 Un daut kjeem un naum daut Buak ut de rajchte Haunt von däm, dee doa opp däm Troon saut. 8 Un aus et daut Buak jenomen haud, follen de vea Tieren un de vea-un-twintich Eltestasch dol ver daut Laum, un hauden een jiedra Hoapen un goldne Kommen voll Parfum, woone de Heilje äare Jebäda sent. 9 Un see sungen een nieet Leet un säden: Du best wirdich, daut Buak to nämen un siene Säajels op to moaken; wiels du best jeschlacht worden un hast ons fa Gott jekoft*5:9 Ooda: trigj-jekoft ooda erleest. met dien ieejnet Bloot, von ut jieda Staum un Tung un Volkj un Nazion, 10 un hast ons to Kjennichs un Priesta jemoakt fa onsen Gott, un wie woaren opp Ieeden rejieren.

11 Un ekj sach un hieed de Stemm von väle Enjel runtom dän Troon un de Tieren un de Eltestasch, un de Zol doavon wia tieen-dusent mol tieen-dusent un dusende mol dusende; 12 dee säden met lude Stemm: Wirdich es daut Laum, daut jeschlacht wia, to nämen Krauft un Rikjtum un Weisheit un Macht un Iea un Harlichkjeit un Säajen. 13 Un jieda Kjreatua, dee em Himmel un opp Ieeden un unja de Ieed un soone, waut oppem Mäa sent, un aules, waut doabennen es, hieed ekj sajen: Säajen un Iea un Harlichkjeit un Krauft to däm, dee doa oppem Troon sett un to daut Laum, fa emma un emma! 14 Un de vea Tieren säden: Amen! Un de vea-un-twintich Eltestasch follen dol un bäden dän aun, dee doa läft fa emma un emma.