De Openboarunk von Johanes 7

De 144,000 ut Israel vesäajelt

1 Un no dise Dinja sach ekj vea Enjel opp de vea Akjen von de Ieed stonen, dee hilden de vea Wind von de Ieed, om daut kjeen Wint opp de Ieed pust uk nich oppet Mäa uk nich äwa irjent eenen Boom. 2 Un ekj sach eenen aundren Enjel oppkomen vom Sonn-Oppgank, dee daut Säajel von däm läwendjen Gott haud, un dee schrieech met lude Stemm to de vea Enjel, to woone daut jejäft wia, de Ieed un daut Mäa to beschädjen, 3 un säd: Beschädicht nich de Ieed uk nich daut Mäa uk nich de Beem, bat wie de Kjnajchts von ons Gott aun äare Stierns vesäajelt haben. 4 Un ekj hieed de Zol von de Vesäajelde: Hundat-vea-un-vieetich-dusent vesäajelt, von ut jieda Staum von de Kjinja Israel. 5 Ut Juda sien Staum wieren twalw-dusent vesäajelt; ut Ruben sien Staum wieren twalw-dusent vesäajelt; ut Gad sien Staum wieren twalw-dusent vesäajelt; 6 ut Asser sien Staum wieren twalw-dusent vesäajelt; ut Naftali sien Staum wieren twalw-dusent vesäajelt; ut Manasse sien Staum wieren twalw-dusent vesäajelt; 7 ut Simeon sien Staum wieren twalw-dusent vesäajelt; ut Levi sien Staum wieren twalw-dusent vesäajelt; ut Isachar sien Staum wieren twalw-dusent vesäajelt; 8 ut Sebulon sien Staum wieren twalw-dusent vesäajelt; ut Josef sien Staum wieren twalw-dusent vesäajelt; ut Benjamin sien Staum wieren twalw-dusent vesäajelt.