Lucas 1

11 Am erscheen oba een Enjel vom Harn, dee stunt aun de rajchte Sied vom Rieekja-Aultoa. 12 Un Zacharias veschrock, aus hee am sach, un Forcht foll äwa am. 13 Oba de Enjel säd to am: Fercht die nich Zacharias! Wiels dien Jebäd es erhieet, un diene Fru Elisabet woat die eenen Sän jebuaren, un du saust sienen Nomen Johanes nanen. 14 Un hee woat fa die eene Freid un Jubel sennen, un väle woaren sikj äwa siene Jeburt freien, 15 wiels hee woat groot sennen ver däm Harn; Wien un stoakjet Jedrenkj woat hee nich drinkjen, un met däm Heiljen Jeist woat hee aul em Muttalief jefelt woaren. 16 Un väle von de Kjinja Israel woat hee no däm Harn, äarem Gott, bekjieren. 17 Un hee woat ver Am hangonen em Jeist un en de Krauft von Elia, om de Vodasch äare Hoaten no de Kjinja to bekjieren un de Onjehuarsome to de Ensecht von de Jerajchte, däm Harn een reedjemoaktet Volkj reed to moaken.