Lucas 1

Jesus siene Jeburt verut aunjesajcht

26 Un en de saste Moonat wort de Enjel Gabriel von Gott jeschekjt no eene Staut en Galiläa, met Nomen Nazaret, 27 no eene Junkfru, dee eenem Maun met Nomen Josef vesproaken wia, ut David sien Hus, un de Junkfru äa Nomen wia Maria. 28 Un de Enjel kjeem bie ar nenn un säd: Sie jejreest, du Bejnodichte! De Har es met die; jesäajent best du mank de Frues! 29 Oba aus see am sach, veschrock see äwa siene Räd un wundad, waut daut fa een Gruss wia. 30 Un de Enjel säd to ar: Fercht die nich, Maria, wiels du hast bie Gott Jnod jefungen. 31 Un kjikj, du woascht schwanga woaren un eenen Sän jebuaren, un du saust sienen Nomen Jesus nanen. 32 Dee woat groot sennen, un däm Hechsten sien Sän jenant woaren; un Gott de Har woat Am sien Voda David sien Troon jäwen. 33 Un Hee woat eewich äwa Jakob sien Hus rejieren, un sien Rikj woat kjeen Enj haben.

34 Dan säd Maria to däm Enjel: Woo kaun daut sennen, wiels ekj kjeenen Maun kjan. 35 Un de Enjel auntwuad un säd to ar: De Heilja Jeist woat äwa die komen, un däm Aulahechsten siene Krauft woat aus een Schauten äwa die komen; doawäajen woat uk daut Heilje, daut von die jebuaren woat, Gott sien Sän jenant woaren. 36 Un kjikj, Elisabet, diene Vewaunte, es uk schwanga met eenem Sän en äa Ella, un es nu en äare saste Moonat, see, dee de Onfruchtboare jenant wort, 37 wiels bie Gott es kjeen Dinkj onmäajlich. 38 Maria oba säd: Kjikj, ekj sie däm Harn siene Sklowin*1:38 Ooda: Deenarin.; lot mie daut passieren, no dien Wuat. Un de Enjel veleet ar.