Lucas 18

Jlikjnis vom Farisäa un Taks-Kollakjta

9 Hee säd oba uk to atelje, dee sikj selfst vetruden, daut see jerajcht wieren, un ve-achten de äwaje, dit Jlikjnis: 10 Twee Menschen jinjen nopp en dän Tempel, om to bäden; eena een Farisäa un de aundra een Taks-Kollakjta. 11 De Farisäa stunt un bäd bie sikj selfst soo: Gott, ekj dank die, daut ekj nich soo sie aus de äwaje Menschen, Reiba, Ojjerajchte, Ehebräakja ooda uk soo aus dis Taks-Kollakjta. 12 Ekj faust tweemol enne Wäakj un jäw daut Tieende von aules, waut ekj vedeen*18:12 Ooda: mie aungo.. 13 Un de Taks-Kollakjta stunt von wietauf, un wull soogoa nich de Uagen opphäwen nom Himmel, oba schluach sikj aun siene Brost, un säd: Gott, sie mie Sinda jnädich! 14 Ekj saj junt: Disa jinkj jerajchtfoadicht no Hus, ver janem. Wiels wäa sikj selfst erhäft, woat raufjesat woaren; un wäa sikj selfst raufsat, woat erhowen woaren.