Lucas 2

Jesus woat jebuaren

1 Un daut passieed en deeselwje Doag, daut een Befäl rutjinkj von däm Kjeisa Augustus, daut de gaunze Welt sikj sull enschriewen loten. 2 (Dise Enschriewunk passieed daut ieeschtemol, aus Kierenius Launt-Rejiera en Sierien wia.) 3 Un aulemaun jinkj, sikj enschriewen to loten, een jiedra en siene ieejne Staut. 4 Dan jinkj uk Josef nopp von Galiläa, ut de Staut Nazaret, no Judäa, en de Staut von David, dee Betlehem heet, wiels hee von David sien Hus un Jeschlajcht wia, 5 om sikj enschriewen to loten met Maria, siene Aunvetrude, dee schwanga wia.