Evangelium Lukas 2

Jesus em Tempel väajestalt

22 Un aus de Doag von äare Reinjunk no Moses sien Jesaz erfelt wieren, brochten see Am no Jerusalem, om Am däm Harn väa to stalen, 23 soo aus em Harn sien Jesaz jeschräwen steit: "Aul daut Menliche, daut de Mutta brakjt, saul däm Harn heilich jenant woaren," 24 un om een Opfa to jäwen, soo aus em Jesaz vom Harn jesajcht es: "Een Poa Turtelduwen ooda twee junge Duwen".

25 Un kjikj, doa wia een Mensch en Jerusalem, met Nomen Simeon; un deeselwja Mensch wia jerajcht un gottesferchtich un luad opp Israel äa Troost, un de Heilja Jeist wia opp am. 26 Un no am wia eene jettliche Toosaj vom Heiljen Jeist jekomen, daut hee dän Doot nich seenen wudd, ea hee dän Christus vom Harn wudd jeseenen haben. 27 Un hee kjeem derch dän Jeist en dän Tempel nenn. Un aus de Elren daut Kjint Jesus nenbrochten, daut see fa Am deeden, soo aus de Jewanheit nom Jesaz wia, 28 dan neem hee Daut opp en siene Oarms, lowd Gott un säd: 29 Har, nu latst Du dienen Deena em Fräd gonen, no dien Wuat no. 30 Wiels miene Uagen haben dien Heil jeseenen, 31 waut Du reedjemoakt hast ver daut Aunjesecht von aul de Velkja, 32 een Licht, to eene Openboarunk fa de Heiden un fa de Harlichkjeit von dien Volkj Israel.

33 Un Josef un siene Mutta vewundaden sikj äwa daut, waut von Am jesajcht wort. 34 Un Simeon säajend äant un säd to Maria, siene Mutta: Kjikj, Disa es jesat to eenem Faul un Oppstonen fa väle en Israel un to een Tieekjen, daut wadasproaken woat. 35 Un uk derch diene ieejne Seel woat een Schwieet derchgonen, daut bie väle Hoaten de Jedanken openboa woaren.

36 Un doa wia eene Profeetin, Hana, Fanuel siene Dochta, ut däm Staum Asser; see wia en huaget Ella en äare Doag, un haud met äarem Maun säwen Joa jeläft no äare Junkfruschoft. 37 Un see wia eene Wätfru von vea-un-tachentich Joa, dee nich vom Tempel wajchjinkj, wäarent see Nacht un Dach met Fausten un Bäden deend. 38 Un see kjeem to deeselwje Stund doahan, lowd dän Harn un räd von Am to aul dee, dee opp de Erleesunk luaden en Jerusalem.