1 Dikh, o RAJ džal te zňičinel e phuv

a kerel latar zamuklo than.

Čerinel lakro tvaros

a roztradel le manušen pal e phuv.

2 Jednakones pre oda ena

o manuša the o rašaj,

o sluhas the leskro raj,

e služka the lakri raňi,

oda, ko bikenel, the oda, ko cinel,

oda, ko del kečeň, the oda, ko lel kečeň,

o interesaris the o dlžňikos.

3 E phuv ela calkom zamukľi a calkom občorarďi,

bo o RAJ phenďa kada lav.

4 E phuv šučol avri a vedňisaľol,

calo svetos slabisaľol,

o bare raja pre phuv našaven peskri zor.

5 E phuv meľarde o manuša, save andre bešenas,

ola, ko na doľikerenas o zakoni,

na šunenas o prikazi

a porušinenas e večno zmluva.

6 Vašoda e phuv hiňi zachaľi le košibnastar,

lakre manuša cerpinen vaš peskre bini;

vašoda labile ola, ko ode bešen,

a ča frima džene ačhile te dživel.

7 O viňičis šučol avri a e mol imar nane;

savore, so radisaľonas, akana stukinen.

8 Imar na šunďol o radišagoskre čerkutki,

preačhiľa o mulatišagos,

imar na šunďol o radišagoskre harfi.

9 Imar na pijen e mol paš o giľavipen;

o zoralo pijiben le pijakenge kirkola.

10 Zňičimen hin o omuklo foros,

dojekh kher hino phandlo,

hoj pes ňiko te na dochudel andre.

11 Pro uľici roven vašoda, hoj nane mol;

savoro radišagos pes čerinďa pre žaľa,

o radišagos našľiľa pal e phuv.

12 O foros ačhiľa rozburimen,

e brana hiňi phagerďi pro kotora.

13 Bo avke ela pre phuv maškar o narodi,

sar pal oda, sar hine obkidle olivi,

sar pal oda, sar hino skidlo o hroznos,

so peľa pre phuv.

14 Ola, ko ačhena te dživel, giľavena baripnastar

a o manuša pro zapados radisaľona upral e slava le RAJESKRI.

15 Vašoda, manušale pro vichodos,

den pačiv le RAJES,

manušale pro moroskre ostrovi,

bararen o nav le RAJESKRO, le Izraeloskre Devleskro.

16 Pal o agora la phuvakre šunas te giľavel o chvali:

„Slava le Spravodľivoneske!"

Ale me phenďom:

„Mange hin igen phares, igen phares, vigos mange!

O zradci zradzinen,

o zradci thoven avri a klaminen!"

17 E dar, e jama the e pasca

avena pre tumende, manušale pre phuv.

18 Ko denašela kala daratar,

perela andre jama.

Ko avela avri andral odi jama,

chudela pes andre pasca.

O strašno brišind perela tele andral o ňebos

a o zakladi la phuvakre razisaľona.

19 E phuv calkom pukinela,

calkom pharola pro jepaš,

zorales razisaľola.

20 E phuv džala sar mači,

hombinela pes sar e chatrča andre balvaj;

bešela pre late e vaha lakre binengri,

vašoda perela a imar na ušťela upre.

21 Andre oda džives o RAJ marela

o nalačhe zora pro ňebos upre

a the le kraľen pre phuv tele.

22 Skidela len pre kopa sar le bertenošen andre jama,

ena phandle andre bertena

a pal o but dživesa ena marde.

23 Ladžala pes o čhonoro,

o kham ľoľola ladžatar,

bo o Nekzoraleder RAJ kraľinela

pro verchos Sion the andro Jeruzalem

a ela les e slava anglal leskre phuredera.