1 Andre ola dživesa o kraľis Chizkija* nasvaľiľa pro meriben a avľa ke leste o prorokos Izajaš, le Amososkro čhavo, a phenďa leske: „Kada phenel o RAJ: De tuke andro poradkos savoro andre tiro kher, bo mereha a imar na dživeha."

2 Sar oda o Chizkija šunďa, visarďa pes le mujeha paš e fala a modľinelas pes ko RAJ: 3 „Ó, RAJEJA, mangav tut, leper tuke pre oda, sar pačivales a cale jileha phiravas pal tiro drom a sar keravas savoro, so sas lačho angle tire jakha." A chudňa igen zorales te rovel.

4 Akor avľa le RAJESTAR kada lav ko Izajaš: 5 „Dža a phen le Chizkijoske: ‚Kada phenel o RAJ, o Del le Davidoskro, tire dadeskro: Šunďom avri tiri modľitba a dikhľom tire apsa. Dikh, dothovava tuke dešupandž (15) berš ke tiro dživipen. 6 Zachraňinava tut a the kada foros andral o vasta le asirike kraľiskre a chraňinava kada foros.

7 Kada ela prekal tu o znameňje le RAJESTAR, hoj o RAJ doľikerela o lav, so tut diňa: 8 Dikh, visarava pale o ciňos pre ora le khameskri, so kerďa o Achaz, a džala deš stupňi palal.‘ " Avke geľa o ciňos pre odi ora deš stupňi palal.

9 Paloda, sar o Chizkija, o judsko kraľis, sasťiľa avri le nasvaľibnastar, pisinďa kadi giľi:

10 Me phenďom: „Andre mire nekfeder berša

mušinav te džal het andro brani le Šeoloskre;

občorardo som mire okle beršendar."

11 Phenďom: „Na dikhava le RAJES andre phuv le džidengri;

imar na dikhava ňisave manušes,

ňikas olendar, ko dživen pre kada svetos.

12 Miro kher sas cirdlo tele

a ilo mandar het sar o stanos le pasťjeriskro.

Pačarďom andre miro dživipen, avke sar o tkačis pačarel o pochtan,

se ov mange odčhinďa o thav pal o strojos.

Dživesestar dži rači skončinďal mire dživipnaha.

13 Caľi rat rovav dukhatar;

sar te mange o ľevos phagerďahas savore mire kokala.

Dživesestar dži rači skončinďal mire dživipnaha.

14 Miro hangos sas igen slaboro; stukinavas sar e holubica vaj e lastovička.

Mire jakha slabisaľile olestar, so ajci dikhavas pro ňebos:

Rajeja, som andro pharipen, pomožin mange!"

15 So šaj phenav?

Ov oda phenďa a the kerďa.

Calo miro dživipen phirava smutno,

bo hin man žaľa andro jilo.

16 Rajeja, ola, kas des o dživipen, dživena

a kalestar miro duchos dživel.

Sasťar man a domuk mange mek te dživel!

17 Dikh, miri bari žaľa mange sas pro lačho.

Tire kamibnaha mange zachraňinďal o dživipen le meribnastar;

bo savore mire bini čhiďal pal tiro dumo.

18 Se o Šeol tut na bararela

aňi o meriben tut na lašarela;

ola, ko džan tele andro hrobos,

pes imar na mukena pre tiri vernosť.

19 Ča o džide, o džide tut lašaren

avke sar me adadžives;

o dad le čhavenge vakerel pal tiri vernosť.

20 O RAJ man zachraňinďa,

a vašoda bašavaha pro strunengre nastroji

calo amaro dživipen andro Chramos le RAJESKRO.

21 Bo o Izajaš phenďa: „Len e masca le figendar a makhen leske la pro vredos, hoj te dživel."

22 A o Chizkija phučľa: „Pal savo znameňje prindžarava, hoj pale džava andro Chramos le RAJESKRO?"*