28 Yessuusi tennee haaso’eexxe saddeetta barra uduma Pheexiroosii’i, Yohaannisiinna Ya’iqoobii’i adhdheexxi soodachchotee mitte kooba hana qabate. 29 Isi soodata’neege’ni bifa isixxi jijjiirende; seemma isixxinna calacalate golalooxxe kadde. 30 Kunnise dedhange’n lami manni dageexxi isinni welti haaso’amman; kunninni manninna Muusenna Eelyaasitemman. 31 Insa’nenna ulfinnikinna leellineexxi Yessuusi Iyyerusaalemi asso’a hexxeexxe yaanexxeenna isixxe tenne buttatenaa’n gargar higatixxe haasona’emman. 32 Yaane kinni Pheexiroosinna isinni welti hedhemmakeera’n diiphi ha’ure’emman; dammanqee wodda kinni isika gaachchanna isinni welt hedhemmaka lame manna anfe. 33 Iikki lami manni insa’nenaa’n gargar higeexxi me’e wodda Pheexiroosi Yessuusi’i, «Barsiisallo kaba’a hedha no’o’a eloxxe kaddemmaxxe mitte ati’a mitte Muuse’anna mitte Eelyaasi’a kadaaka sase qoorcho jaarro; Pheexiroosi tenne haaso’a wodda hiyyaneenxa ege’ne’emmabaan» hiyye.
34 Isi tennee haaso’ande’n hedhee’na’a duumanchi dageexxi insa’ne’e golle; duumanchi giddi’anna e’yina’ninni he’ne sodaante. 35 Duumanchi giddii’ninna «Fi’le’ennek belti ank konneten; isi hiyyaaxxa laqqe» hiyyaak hafuuri dage.9:35 Isa. 42:1; Mat. 3:17; 12:18; Mar. 1:11; Luq. 3:22. 36 Kunni hafuur dageechchi uduma insa’ne Yessuusi’i qofinni hedhee’na’a anfe. Hordofeeyyetinna affeexxa yaane eettene yanna’n ayye’ninna haasonebaang sammine.
Fuggichchi Hafuuri Abideeke Beltixxa Fayya
(Mat. 17:14-18; Mar. 9:14-27)