1 ዳዊቲ ደእዳ አርኤላ ካታማዉ ነና አየ! ላይ ቦላ ላይ ጉጃ፤ ነ ባለታ ዛራ ዛራ ቦንቻ። 2 ታኒ አርኤላ ካታማ ቡሮ ኡንኤና፤ እ ዘሌልድ ዬካና። ሄ ካታማይ ሱ ካምዳ ያርሾ በሳ መላ ግዳና። 3 ታኒ ነ ዩሹዋ ተቃና፤ አዱሳ ግምብያን ነና ድራና፤ ነ ቦላ ኦላ ሻኮ ኤሳና። 4 ኔኒ ገልዳ ኦላን ግዳዳ ኦደታና፤ ጋርሳ ባናፐ ነ ግርሳይ ያና። ነ ግርሳይ ሞይትለ ግርሳዳ ቢታ ግዶፈ ከያና፤ ባና ግዶፈ ነ ካልካሻና።

5 ሽን ነ ሞርከት ባና መላ ዳሮ፤ ዎዛና ምኖ አሳታ ታይቦይ ጫርኮይ ኤፍያ ፑኖ መላ። 6 ቆፖና ደእሽን፥ ኡባፈ ዎልቃማ ጎዳይ ዳዳን፥ ቢታ ቃፆን፥ ግታ ግርሳን፥ ጎተን፥ ጫርኮንነ ታማ ላጮን ህንተና ዎቻና።✝29:6 1 ካዎ 19:11-12. 7 አርኤላ ካታማ ኦልያ ዳሮ ካዎተ ኡባይ፥ ሄ ካታማነ እያ ሚፃ ኦልያ ኡባይ፥ እያ ኡንኤያ ኡባይ ስኮ አሙሆዳነ ኤልሞዳ ሀናና። 8 ኮሻትዳ አስ አሙሆን ካ ምድ፥ ባርክያ ዎደ እያ ኮሻይ አጎናይሳዳ ዎይኮ ሳሞትዳ አስ አሙሆን ኡይድ፥ ባርክያ ዎደ ሳሙዋ አሎናይሳዳ፥ ፅዮነ ደርያ ኦልያ ካዎተት ኡባይ ሄሳዳ ሀናና።

9 ማላለትተ፤ ዳጋምተ፤ ቅልምእተ፤ ቆቅተ። ማትተ፥ ሽን ዎይነ ኡሻን ግዶፖ። ጋንድጋርተ፥ ሽን ማይያ ኡሻን ግዶፖ። 10 ጎዳይ ስኮ አያና ህንተ ቦላ ጉስስ። ናበቶ፥ ህንተ አይፈይ ጎዘትስ፤ ቆንጨ በኤይሳቶ፥ ህንተ ሁጰይ ካመትስ።✝29:10 ሮመ 11:8.

11 ሀ ኡባ ቆንጨይ ነዉ አታመትዳ ማፃፋ መላ ግድስ። እስ አስ፥ "ሄኤ፥ ሀይሳ ናባባ" ያግድ፥ እስ ናባቦ ኤርያ አሳስ እምያ ዎደ፥ እ፥ "ማፃፋይ አታመትዳ ግሾ፥ ታ ናባባናዉ ዳንዳእከ" ያጋና። 12 ማፃፋ ናባብ ኤሮና አሳኮ፥ "ሄኤ፥ ሀይሳ ናባባ" ያግድ እምያ ዎደ፥ እ፥ "ታኒ ናባባ ኤርከ" ያጋና።

13 ጎዳይ ያጌስ፦ "ሀ አሳይ ታና ባንታ ዶናን ቦንቼስ፤ ሽን ኤንታ ዎዛናይ ታፐ ሃሆን ደኤስ። ኤንቲ አስ መዳ ዎጋ ታማርስሸ ታና ጮ ጎይኖሶና።✝29:13 ማቶ 15:8-9፤ ማር 7:6-7. 14 ሄሳ ግሾ፥ ታኒ ሀ አሳ ቦላ ዛራ ዛራ ማላልስያባ ኦና። ጭንጫታ ጭንጫተ ኤያ ከሳና፤ ኤራንቾታ ኤራ ዶግሳና"✝29:14 2 ቆሮ 1:19. ያግስ።

15 ባንታ ሀልቹዋ ጎዳፐ ቆሳናዉ ጪሞየይሳታ፥ ባንታ ኦሱዋ ማን ኦሸ፥ "ኑና ኦን በኢ? ኑና ኦን ኤሪ?" ያገይሳታ አየ! 16 ህንተ ኡባባ ሽር የጌታ። ኦቶ መይስ ኡርቃ መላ ግድ ቆፔታ! መትዳይስ መዳይሳ፥ "እ ታና መቤና" ግዬ? ኦቶይ ባና መዳይሳ፥ "እ አይኮካ ኤረና" ጋናዉ ዳንዳኢ?✝29:16 እሳ 45:9.

17 ልባኖሰ ዎራይ አራዳ ጋደ ግዳናዉ፤ ቃስ አራዳ ጋደይ ዎራ ግዳናዉ ጉ ዎደይ አትስ ግደኔ?

18 ሄ ጋላስ ቱለት ማፃፋ ቃላ ስአና፤ ማን ደእያ ቆቀታ አይፈይ ፄላና። 19 አሽከት ጎዳን ኡፋይታና፤ ማንቆት እስራኤለ ጌሻን ሀሹ ጋና። 20 ኡሎ ኢታት ዉራና፤ ቀልቅሰይሳት ትምእ ጋና፤ ኢታባ ኦናዉ ዎችያ ኡባይ ያና። 21 አሰ ኦዳን ባላ ኦይሳት፥ ሞተትዳይሳ ፕርዳ ኬን ፅሄን የገይሳትነ ዎርዶ ማርካተን ፅሎ አሳ ፕርዳ ጌላየይሳት ያና።

22 ሄሳ ግሾ፥ አብራሃመ ዎዝዳ ጎዳይ ያይቆባ ኮቻኮ ሀይሳዳ ያጌስ፦ "ያይቆባ ኮቻይ ህዛፐ ጉየ ዬላተና፤ እያ ሶምኦይ ዬላትድ ሳአ ፄለና። 23 ሽን ኤንቲ ታ ኩሸ ኦሶ ግድዳ ባንታ ናይታ ባንታ ግዶን በእያ ዎደ ታ ሱን ጌሻና፤ ኤንቲ ያይቆባ ጌሻ፥ ጌሻተ ናጋና፤ እስራኤለ ፆሳ ያሻተን ቦንቻና። 24 አያናን ባለይሳት አኬካ ደማና፤ ዙዙመይሳት ትምርተ ኤካና" ያጌስ።