Mateus 21

Yesʉ ʉkingɨla mʉ Yelʉsalemʉ kʉ ngiligili

1 Lʉhikʉ lʉng’wɨ, Yesʉ nɨamanyisigwa akwe naɨahʉmbeela kʉ Yelusalemu ɨkapika kɨsalɨ ka Betipage mʉlʉgʉlʉ nʉla mɨzeɨtʉni, wɨkaalagɨɨlya amanyisigwa akwe abɨɨlɨ, 2 wɨkaaɨla, "Longoli mʉkɨsalɨ nɨkɨkolɨ kʉntongeela anyu mʉkʉhanga ndogwe ɨtungilwe palʉng’wɨ nʉng’wana. Itungʉɨli mʉndetele. 3 Anga mʉntʉ wamʉkolye nɨkɨ mʉkʉitungʉɨla, mʉɨli itɨ, ‘Isekʉlʉ ʉitakile,’ nʉyo ʉkʉmʉgombya mʉilete.

4 Ikani ɨlɨ aɨlɨtendekile kʉnsoko ikani naɨʉtambʉe nʉ mʉmanga lɨtimɨle,

5 "Atambʉɨli antʉ akʉ Yelusalemu yɨyo Sayuni.

Gozi, mʉtemi wanyu ʉpembilye!

Mʉpolo ʉnankɨe mʉmʉgongo nʉwa ndogwe,

ng’waa ndogwe."

6 Kʉitɨ, amanyisigwa nɨanso ɨkalongola ɨkitʉma anga naɨ aɨɨwe nʉ Yesʉ. 7 Ɨkamɨleta ndogwe nʉanso nʉ ng’wa ndogwe, ɨkaɨla matugalo ao mʉ mʉgongo nʉwa ng’waa ndogwe nʉ Yesʉ wɨkanankɨla wɨkikaɨla matugalo nanso. 8 Iumbɨ nila antʉ ɨkaɨla matugalo ao mipanda, nɨang’wɨ ɨkabuna pitambɨ pya mɨtɨ ɨkaɨla mipanda. 9 Iumbɨ nɨla antʉ naɨlitongee nawa naɨasɨkɨɨye ɨhi ɨkitʉnta ɨzelʉnga,

"Wakʉligwe, Ng’wana wang’wa Daudi!

Ʉkʉigwe ʉyo nʉzile kʉlina lang’wɨ Isekʉlʉ!

Ikʉlyo kʉng’wi Itunda nʉwa kigʉlʉ!"

10 Yesʉ naɨ ʉkingɨla kʉ Yelusalemu, antʉ ɨhi ɨkakʉilwa. Ɨkatula kolya, "Ʉyʉ itɨ nyenyu"

11 Angʉ ang’wɨ miumbɨ nɨlanso ɨkalʉnga, "Ʉyʉ ingɨ mʉmanga Yesʉ, ʉpumile kɨsalɨ ka Nazaleti kɨsalɨ nɨ kɨniino nɨka Galilaya."