31 Itʉngo nʉzile ʉ Ng’waa Mʉntʉ anga mʉkʉlʉ palʉng’wɨ nɨa malaɨka ɨhi, papo ʉziikiɨ mituntu lakwe nɨla ʉhumi waze Mʉtemi. 32 Antʉ ɨhi aziilingɨɨla pantongeela akwe, nʉyo ʉzeakomatʉla anga mʉdɨmi nʉɨkomatʉɨla nkolo ni mbʉli. 33 Nkolo ʉkʉiɨka mʉkono nʉwa kigoha ni mbʉli ʉkʉiɨka mʉkono nʉwa nkɨgɨ. 34 "Sʉnga Mʉtemi ʉkʉaɨla awa nɨakolɨ mʉkono nʉwa kɨgoha, ‘Kɨlanyi ʉnyenye nimʉkembetilwe nʉ Tata wane; holi ʉʉtemi naɨ ʉnoneeigwe kʉnsoko anyu kʉpuma ʉtundwi nʉwa ʉnkumbigʉlʉ. 35 Kʉnsoko aɨnihʉmilwe nzala ʉnyenye mɨkampa indya; aɨhʉmilwe nyota ʉnyenye mɨkampa ɨmazi; aɨnimʉzɨɨla ʉnyenye mɨkansɨngɨɨlya, 36 aɨnɨkɨpwɨ, mɨkantʉnga myenda; aɨnimʉlwae ʉnyenye mɨkansolya; aɨnkolɨ mʉkɨtʉngo ʉnyenye mɨkɨza kʉnamʉsha.’

37 Papo, antʉ awa nɨaza azee mʉsʉkɨɨlya ʉ mʉtemi ‘Mʉkʉlʉ, nalɨ naɨkʉkʉine ʉhʉmilwe nzala ʉsese kɨkakʉpa indya, ang’wɨ ʉhʉmilwe nyota ʉsese kɨkakʉng’wensa mazi? 38 Nalɨ naɨkʉkʉine wɨmʉzɨɨla ʉsese kɨkakʉsɨngɨɨlya. ang’wɨ wɨkipwɨ ʉsese kɨkakʉtunga myenda? 39 Hangɨ nalɨ naɨkʉkʉine wɨmʉlwae ʉsese kɨkakʉsolya, ang’wɨ ʉkolɨ mʉkitʉngo ʉsese kɨkɨza kʉʉlamʉsha? 40 Mʉtemi ʉkʉasʉkɨɨlya, ‘Kʉmʉtambʉila ɨtai, kɨntʉ kɨhi naɨmʉmʉtendee ʉng’wɨao mʉanyandʉgʉ ane nɨaʉla, aɨmʉntendee nene.’

41 "Sʉnga ʉkʉaɨla awa nɨamoli mʉkono nʉwa nkɨgɨ, ‘Hegi pang’wane ʉnyenye nɨmazumilwe! Longoli mʉmoto nɨshanga wɨlima nʉwa kalɨ na kalɨ naɨʉɨkɨigwe ʉ shetani. 42 Kʉnsoko aɨnihʉmilwe nzala ʉnyenye shanga mɨkampa indya; aɨnihumilwe nyota ʉnyenye shanga mɨkampa ɨmazɨ. 43 Aɨnɨmʉzɨɨla ʉnyenye shanga mɨkansɨngɨɨlya; aɨnɨmʉlwae ʉnyenye shanga mɨlansolya aɨnkolɨ nɨmʉtʉngwa ʉnyenye shanga mɨkɨza kʉnamʉsha.’

44 Papo nawo akʉmʉsʉkɨɨlya, ‘Mʉkʉlʉ nalɨ naɨkʉkʉine ʉhʉmilwe nzala ang’wɨ nyota, ang’wɨ wɨmʉziila ang’wɨ nawɨmʉgila matʉgalo, ang’wɨ wɨmʉlwae ang’wɨ ʉkolɨ mʉkitʉngo ʉsese kɨkahita kʉaɨɨlya? 45 Nʉyo ʉkʉasʉkɨɨlya, ‘Kʉmʉila ɨtai, makani ɨhi naɨmʉmʉtendee ʉng’wɨao mʉaʉla awa, aɨmʉnɨhitile nene.’ 46 Itɨ gwa, antʉ awa nɨabɨ akʉlongola mʉlwago mʉla kalɨ na kalɨ, antʉ awa nɨahʉɨɨli akʉlongola kʉ ʉpanga nʉwa kalɨ na kalɨ.’’