യെശയ്യാവ് 15

മോവാബിനെക്കുറിച്ചുള്ള പ്രവാചകം

1 മോവാബിനെക്കുറിച്ചുള്ള പ്രവാചകം:

ഒരു രാത്രിയിൽ മോവാബിലെ ആർപട്ടണം നശിച്ചു ശൂന്യമായിപ്പോയിരിക്കുന്നു;

ഒരു രാത്രിയിൽ മോവാബിലെ കീർപട്ടണം നശിച്ചു ശൂന്യമായിപ്പോയിരിക്കുന്നു.

2 ബയീത്തും ദീബോനും കരയേണ്ടതിനു

പൂജാഗിരികളിൽ കയറിപ്പോയിരിക്കുന്നു;

നെബോവിലും മെദേബയിലും

മോവാബ് നിലവിളിക്കുന്നു;

അവരുടെ തലയെല്ലാം മുണ്ഡനംചെയ്തും

താടിയെല്ലാം കത്രിച്ചും ഇരിക്കുന്നു.

3 അവരുടെ തെരുവീഥികളിൽ അവർ രട്ടുടുത്തു നടക്കുന്നു;

അവരുടെ പുരമുകളിലും വിശാലസ്ഥലങ്ങളിലും

എല്ലാവരും അലമുറയിട്ടു കരയുന്നു.

4 ഹെശ്ബോനും എലെയാലേയും നിലവിളിക്കുന്നു;

അവരുടെ ഒച്ച യാഹസ് വരെ കേൾക്കുന്നു;

അതുകൊണ്ട് മോവാബിന്‍റെ ആയുധധാരികൾ അലറുന്നു;

അവന്‍റെ പ്രാണൻ അവന്‍റെ ഉള്ളിൽ നടങ്ങുന്നു.

5 എന്‍റെ ഹൃദയം മോവാബിനെക്കുറിച്ചു നിലവിളിക്കുന്നു;

അതിലെ അഭയാര്‍ത്ഥികൾ സോവാരിലേക്കും

എഗ്ലത്ത് ശെളീശീയയിലേക്കും ഓടിപ്പോകുന്നു;

ലൂഹീത്തിലേക്കുള്ള കയറ്റത്തിൽ കൂടി

അവർ കരഞ്ഞുംകൊണ്ട് കയറിച്ചെല്ലുന്നു;

ഹോരോനയീമിലേക്കുള്ള വഴിയിൽ

അവർ നാശത്തിന്‍റെ നിലവിളികൂട്ടുന്നു.

6 നിമ്രീമിലെ ജലാശയങ്ങൾ വരണ്ടിരിക്കുന്നു;

അതുകൊണ്ട് പുല്ലുണങ്ങി, ഇളമ്പുല്ലു വാടി,

പച്ചയായ സകലവും ഇല്ലാതെയായിരിക്കുന്നു.

7 അതിനാൽ അവർ സ്വരൂപിച്ച സമ്പത്തും സംഗ്രഹിച്ചുവച്ചതും

അലരിത്തോട്ടിനക്കരയിലേക്ക് എടുത്തുകൊണ്ടുപോകുന്നു.

8 നിലവിളി മോവാബിന്‍റെ അതിർത്തികളെ ചുറ്റിയിരിക്കുന്നു;

അലർച്ച എഗ്ലയീംവരെയും

കൂകൽ ബേർ-ഏലീം വരെയും എത്തിയിരിക്കുന്നു.

9 ദീമോനിലെ ജലാശയങ്ങൾ രക്തംകൊണ്ടു നിറഞ്ഞിരിക്കുന്നു;

ഞാൻ ദീമോന്‍റെമേൽ ഇതിലധികം വരുത്തും;

മോവാബിൽനിന്നു ചാടിപ്പോയവരുടെമേലും

ദേശത്തിൽ ശേഷിച്ചവരുടെമേലും ഞാൻ ഒരു സിംഹത്തെ വരുത്തും.