Salmos 121

परमेश्वर तुझा रक्षक आहे

1 मी आपली दृष्टी पर्वताकडे लावतो.

मला मदत कोठून येईल?

2 परमेश्वर जो आकाशाचा व पृथ्वीचा निर्माण करणारा

त्याकडून माझी मदत येते.

3 तो तुझा पाय घसरू देत नाही;

जो तुझे संरक्षण करतो तो कधीही स्वस्थ झोपत नाही.

4 पाहा, इस्राएलाचा रक्षणकर्ता

कधीच झोपत नाही किंवा तो डुलकीही घेत नाही.

5 परमेश्वर तुझा रक्षणकर्ता आहे;

परमेश्वर तुझ्या उजव्या हाताला सावली आहे.

6 दिवसा तुला सूर्य किंवा

रात्री चंद्र तुला नुकसान करणार नाही.

7 परमेश्वर सर्व वाईटापासून तुझे रक्षण करील;

तो तुझ्या जिवाचे रक्षण करील.

8 परमेश्वर तुला; जे सर्व काही तू करशील,

त्यामध्ये आता आणि सदासर्वकाळ रक्षण करील.