स्तोत्रसंहिता 54

शत्रूंपासून संरक्षण मिळावे म्हणून प्रार्थना

दाविदाचे स्तोत्र

1 हे देवा, तू आपल्या नावाने मला वाचव,

आणि तुझ्या सामर्थ्यात माझा न्याय कर.

2 हे देवा, माझी प्रार्थना ऐक;

माझ्या शब्दाकडे कान दे.

3 कारण माझ्याविरूद्ध परके *गर्विष्ठउठले आहेत,

आणि दयाहीन माणसे माझ्या जीवाच्या मागे लागली आहेत;

त्यांनी आपल्यापुढे देवाला ठेवले नाही.

4 पाहा, देव माझा मदतनीस आहे;

प्रभू माझ्या जिवाला उचलून धरणाऱ्या बरोबर आहे.

5 तो माझ्या शत्रूंना वाईटाची परत फेड करील;

तू माझ्यासाठी आपल्या विश्वासूपणाने त्यांचा नाश कर.

6 मी तुला स्वखुशीने अर्पणे अर्पीण;

हे परमेश्वरा, मी तुझ्या नावाला धन्यवाद देईन, कारण हे चांगले आहे.

7 कारण त्याने मला प्रत्येक संकटातून सोडवले आहे;

माझे डोळे माझ्या शत्रूंकडे विजयाने पाहतात.