स्तोत्रसंहिता 43

बचाव आणि मुक्तीसाठी प्रार्थना

1 हे देवा, तू माझा न्याय कर, आणि भक्तिहीन राष्ट्राविरूद्ध तू माझी बाजू मांड,

2 कारण तू माझ्या सामर्थ्याचा देव आहेस;

तू मला का दूर केले आहे?

शत्रूंच्या जुलूमाने मी का शोक करत फिरू?

3 तू आपला प्रकाश आणि सत्य पाठवून दे, ते मला चालवोत.

तुझ्या पवित्र डोंगराकडे आणि मंडपाकडे ते मला मार्गदर्शन करोत.

4 तेव्हा मी देवाच्या वेदीजवळ,

देव जो माझा मोठा आनंद आहे, त्याकडे जाईल,

आणि हे देवा, माझ्या देवा, वीणा वाजवून मी तुझी स्तुती करीन.

5 हे माझ्या जीवा तू निराश का झाला आहेस?

आतल्या आत तू का तळमळत आहेस?

देवाची आशा धर, कारण जो माझी मदत आणि माझा देव

त्याची मी आणखी स्तुती करेन.