दाविदाचे स्तोत्र

1 हे देवा, माझ्यावर दया कर, माझ्यावर दया कर,

कारण माझा जीव ही संकटे टळून जाईपर्यंत

तुझ्यात आश्रय घेतो.

2 मी परात्पर देवाकडे, जो देव माझ्यासाठी सर्वकाही करतो

त्याचा मी धावा करीन.

3 तो स्वर्गातून मला मदत पाठवतो आणि मला वाचवतो,

जेव्हा मनुष्य मला गिळून टाकण्याची इच्छा करतो तेव्हा तो त्यास धमकावतो;

देव त्याच्या कराराची विश्वसनीयता आणि त्याचा विश्वासूपणा मला दाखवतो.

4 माझा जीव सिंहाच्यामध्ये पडला आहे;

ज्यांचे दात भाले आणि बाण आहेत,

आणि ज्यांची जीभ तलवारीसारखी धारदार आहे

अशा लोकांमध्ये मला जबरदस्तीने रहावे लागत आहे.

5 हे देवा, तू आकाशापेक्षाही उंच हो;

तुझा माहिमा सर्व पृथ्वीवर होवो.

6 त्यांनी माझ्या पावलांसाठी सापळा तयार केला आहे;

माझा जीव वाकून गेला आहे;

त्यांनी माझ्यासमोर खाच खणली आहे,

परंतु ते स्वतःच त्यामध्ये पडले आहेत.

7 हे देवा, माझे हृदय स्थिर आहे, माझे हृदय स्थिर आहे;

मी गाईन, होय, मी स्तुती गाईन.

8 हे माझ्या गौरवी जीवा, जागा हो;

हे सतारी आणि वीणे, जागे व्हा;

मी पहाटेला जागे करीन.

9 हे प्रभू, मी सर्व लोकांमध्ये तुला धन्यवाद देईन;

मी सर्व राष्ट्रांमध्ये तुझी स्तवने गाईन.

10 कारण तुझ्या कराराची विश्वसनियता आकाशापर्यंत महान आहे

आणि तुझा विश्वासूपणा ढगापर्यंत पोहचतो.

11 हे देवा, तू आकाशाच्या वर उंचविला जावो;

तुझा महिमा सर्व पृथ्वीवर उंच होवो.