1 ବଡିନା ତମ୍ୱାନ୍‌ ଆବନେଡ଼ା ଅବ୍ରାଆମନ୍‌ ମମ୍ରିନ୍‌ ଅଲୋନ୍‌ ଆରାନୁବନ୍‌ ଆଜାୟ୍‌ତା ତମ୍ବୁସିଙନ୍‌ ଆ ଡୁଆରାବାନ୍‌ ଆତଙ୍କୁମ୍‌ ଡକୋଲନ୍‌; ତି ଆବନେଡ଼ା ପ୍ରବୁନ୍‌ ତି ଆଡରକୋନେଲୋଙ୍‌ ଆନିନ୍‌ଆଡଙ୍‌ ଅବ୍‌ଗିୟ୍‌ତାଲନ୍‌, 2 ଆନିନ୍‌ ଆଗ୍ରିଜେନ୍‌ ୟାଗି ମନ୍‌ରାନ୍‌ ଆମଙ୍‌ବାଞ୍ଜି ଆତନଙ୍‌ଜି । ଆରି ଆନିନ୍‌ ଆଗ୍ରିଜେନ୍‌ ସିଲଡ୍‌ ତମ୍ବୁସିଙନ୍‌ ଆ ଡୁଆରା ସିଲଡ୍‌ ଆମଙ୍‌ବାଞ୍ଜି ଇରେନ୍‌ ଆରି ତୁଡ଼ୁମ୍‌ଲେ ଲୋମେଞ୍ଜି, 3 ଏ ପ୍ରବୁ, "କାକୁର୍ତିତନାୟ୍‌, ଆମ୍ୱେନ୍‌ ଞେନ୍ଆଡଙ୍‌ କନକାରମ୍‌ ଏଗାମେନ୍‌ଣ୍ଡେନ୍‌, ଏତ୍ତେଲ୍‌ଡେନ୍‌ କେନ୍‌ କମ୍ୱାରିମର୍‌ବେନ୍‌ ଆଡ୍ରକୋନେ ସିଲଡ୍‌ ଏର୍ଜନିର୍‌ ବାନ୍ନେଗଡ୍‌ ଡକୋନାବା । 4 କାକୁର୍ତିତନାୟ୍‌, ଞେନ୍‌ ଅସୋୟ୍‌ ଡାଆନ୍‌ ଇୟ୍‌ତେ ପାଙ୍‌ନାୟ୍‌, ଆମ୍ୱେଞ୍ଜି ଆଜଙ୍‌ଲନ୍‌ କେନ୍‌ ଆରାନୁବ୍‌ ଆ ଜାୟ୍‌ତା ଲୋଲୋନାବା । 5 ଇନିଆସନ୍‌ଗାମେଣ୍ଡେନ୍‌ ଆମ୍ୱେଞ୍ଜି ଆସନ୍‌ ଅସୋୟ୍‌ ଜନୋମଞ୍ଜି ପାଙ୍‌ତାୟ୍‌; ତି ସିଲଡ୍‌ଲ୍ଲନ୍‌ ଆମ୍ବେନ୍‌ ବୋର୍ସାତବେନ୍‌ ଆରି ଆମ୍ବେନ୍‌ ଜିର୍ବା । ତିଆସନ୍‌ କମ୍ୱାରିମର୍‌ବେନ୍‌ ଆମଙ୍‌ବା ଏଇୟ୍‌ଲାୟ୍‌ ।

ତିଆଡିଡ୍‌ ଆନିଞ୍ଜି ବର୍ରଞ୍ଜି ଇନି ଲୁମ୍‌ତେ ତିଆତେ ଲୁମା ।"

6 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ତମ୍ବୁସିଙନ୍‌ ଜିର୍ରେ ସାରାନ୍‌ ଆମଙ୍‌ ଇୟ୍‌ଲେ ବର୍ନେ, "ୟାଗି ସେରେ*18:6 ବସେରେନ୍‌ ୧୬ କେଜି ଆ ମନଙ୍‌ ଆ ମଇଦା ପାଙ୍‌ଲେ ରୁଟିନ୍‌ ଲତୁବା ।" 7 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ଗୋସ୍ସାନ୍‌ ଇୟ୍‌ଲେ ଆମନଙ୍‌ ଆଅନ୍‌ତାଙନ୍‌ ପାଙ୍‌ଲେ ଆ କମ୍ୱାରିନ୍‌ଆଡଙ୍‌ ଆତ୍ରିୟେନ୍‌, ଆନିନ୍‌ ତି ଆତେ ଲଡିଞେନ୍‌ । 8 ତି ଆଡିଡ୍‌ ଆନିନ୍‌ ଦଇନ୍‌, ଆଡ଼ୁବନ୍‌ ଡ ଆଡିଁୟ୍‌ଡିୟଁନ୍‌ ଆ ଜେଲୁ ପାଙ୍‌ଲେ ଆମଙ୍‌ବାଞ୍ଜି ଡକ୍କୋଏନ୍‌, ଆରି ଆନିଞ୍ଜି ଆଗ୍ରାଗାଲଞ୍ଜି ଆଡିଡ୍‌ ଆନିନ୍‌ ଅରାନୁବନ୍‌ ଆ ଜାୟ୍‌ତା ତନଙ୍‌ଲେ ଡକୋଲନ୍‌ ।

9 ତି ସିଲଡ୍‌ଲ୍ଲନ୍‌ ଆନିଞ୍ଜି ଆନିନ୍‌ଆଡଙ୍‌ ବରେଞ୍ଜି, "ଡୁକ୍ରିନମ୍‌ ସାରାନ୍‌ ଅଡ଼େଙ୍ଗା ?"

ଆନିନ୍‌ ବର୍ରନେ, "ଗିୟ୍‌ବା, ଆନିନ୍‌ ଅମ୍ମ ତମ୍ବୁସିଂଲୋଙନ୍‌ ଡକୋ ।"

10 ତି ସିଲଡ୍‌ଲ୍ଲନ୍‌ ଆମଙଞ୍ଜି ସିଲଡ୍‌ ଅବୟ୍‌ନେ ବର୍ରନେ, "କେନ୍‌ ଆଙ୍ଗାୟ୍‌ ଆରି ଆଜିର୍ତାଞନ୍‌ ଆଡିଡ୍‌ ଞେନ୍‌ ଏୟର୍ତନାୟ୍‌; ଗିଜା, ତି ଆଡିଡ୍‌ ଡୁକ୍ରିନମ୍‌ ସାରାନ୍‌ ଆସିଲୋଙ୍‌ ଅବୟ୍‌ ଓବ୍ବାସିଜନ୍‌ ଡକୋତେ । କେନ୍‌ ଆବର୍ନେ ତମ୍ବୁସିଙନ୍‌ ଡୁଆରାନ୍‌ ଆ କୋଣ୍ତୋଙ୍‌ଗଡ୍‌ ଡକୋଡାଲନ୍‌ ସାରାନ୍‌ ଅମ୍‌ଡଙେନ୍‌ ।" 11 ତିଆଡିଡ୍‌ ଅବ୍ରାଆମନ୍‌ ଡ ସାରାନ୍‌ ବୁଡାଏଞ୍ଜି ବୁଡିଏଞ୍ଜି, ଆରି ସାରାନ୍‌ ଆନିଜେଙ୍‌ଡାନ୍‌ ଅଃଗିୟ୍‌ଲୋ । 12 ତି ଆସନ୍‌ ସାରାନ୍‌ କିୟ୍‌ଲେ ଆ ଅମ୍ମଲଙନ୍‌ ବାତ୍ତେ ବର୍ରନେ, "କେନ୍‌ ଆବ୍ରୁଡିଲିଞେନ୍‌ ଆଡିଡ୍‌ ପଙ୍‌ କେନ୍‌ଅନ୍ତମ୍‌ ସର୍ଡାଇଁୟ୍‌ ? ପ୍ରବୁଞେନ୍‌ ଜାୟ୍‌ ବୁଡାଏନ୍‌ ।"

13 ତି ଆଡିଡ୍‌ ପ୍ରବୁ ଅବ୍ରାଆମନ୍‌ଆଡଙ୍‌ ବରେନ୍‌, "ଇନ୍‌ଲେନ୍‌ ବୁଡାଲଲେନ୍‌ ବୁଡିଲଲେନ୍‌ ଆଡିଡ୍‌ ପଙ୍‌ ପସିଜନ୍‌ ଏକୋଡାୟ୍‌ ଗାମ୍‌ଲେ, କେନ୍‌ ଆବର୍ନେ ଇଃୟମ୍‌ଲେ ଇନିବା ସାରାନ୍‌ କିଜେନ୍‌ ? 14 ପ୍ରବୁନ୍‌ ଆସନ୍‌ ଇନ୍ନିଙ୍‌ ଆ କାବ୍ବାଡ଼ା ରପ୍ତି ଅଃଗଡେଲେ ପଙ୍‌ ? କେନ୍‌ ଆଙ୍ଗାୟ୍‌ ମା ଞେନ୍‌ ୟର୍ରନ୍‌ ଇୟ୍‌ଲାୟ୍‌ ଗିୟ୍‌ନାୟ୍‌ ଆଡିଡ୍‌, ସାରାନ୍‌ ଆସିଲୋଙ୍‌ ଓବ୍ବାସିଜନ୍‌ ଇତାୟ୍‌ ଗିୟ୍‌ନାୟ୍‌ ।"

15 ତି ସିଲଡ୍‌ଲ୍ଲନ୍‌ ସାରାନ୍‌ ବନ୍ତଙନ୍‌ ବାତ୍ତେ ସସଲନ୍‌ ବର୍ରନେ, "ଞେନ୍‌ ଅଃକିୟ୍‌ଲାୟ୍‌,"

ବନ୍‌ଡ ଆନିନ୍‌ ବର୍ରନେ, "ଆମନ୍‌ କିଜେନ୍‌ ।"

16 ତି ସିଲଡ୍‌ଲ୍ଲନ୍‌ ତି ଆ ମନ୍‌ରାଜି ତେତ୍ତେ ସିଲଡ୍‌ ସଦୋମ ଗଡ଼ାବାନ୍‌ ଆଜିର୍ରେଞ୍ଜି ଆଡିଡ୍‌, ଅବ୍ରାଆମନ୍‌ ତଙରନ୍‌ ଆନବ୍‌ତୁୟ୍‌ ଆସନ୍‌ ଆନିଞ୍ଜି ଆନିଞ୍ଜିଆଡଙ୍‌ ସନେଞ୍ଜି । 17 ତି ସିଲଡ୍‌ଲ୍ଲନ୍‌ ପ୍ରବୁନ୍‌ ବର୍ରନେ, "ଞେନ୍‌ ଇନି ଲନୁମନ୍‌ ଆସନ୍‌ ଜିର୍ତେ ତି ଆତେ ଅବ୍ରାଆମନ୍‌ ଆମଙ୍‌ସିଲଡ୍‌ ସସନାୟ୍‌ ପଙ୍‌ ? 18 ଅବ୍ରାଆମନ୍‌ ଆମଙ୍‌ସିଲଡ୍‌ ଅବୟ୍‌ ସୋଡ଼ା କେଜ୍ଜା ଡୁଙ୍‌ତନାୟ୍‌ ଆରି ପୁର୍ତିଲୋଙନ୍‌ ଅଡ଼୍‌କୋନ୍‌ ଆକେଜ୍ଜା ସିଲଡ୍‌ ଆସିର୍ବାଦନ୍‌ ଞାଙ୍‌ତଜି । 19 ଇନିଆସନ୍‌ଗାମେଣ୍ଡେନ୍‌ ଆ ତିକ୍କି ଆ କନୋଡ୍‌କୋଡ୍‌ ଆ ପସିଜଞ୍ଜି ଡ ଆସିଂମରଞ୍ଜି ଏଙ୍ଗାଲେ ନ୍ୟାଞନ୍‌ ଡ ପ୍ରବୁନ୍‌ ଆତଙର୍‌ବା ତଙିୟ୍‌ତଞ୍ଜି, ତି ଆସନ୍‌ ଆନିଞ୍ଜିଆଡଙ୍‌ ଆନିନ୍‌ ଏଙ୍ଗାଲେ ବାଞ୍‌ତେ, କେନ୍‌ ଆସନ୍‌ ଞେନ୍‌ ଆନିନ୍‌ଆଡଙ୍‌ ଏଗବ୍‌ରିଲାୟ୍‌; ତି ସିଲଡ୍‌ଲ୍ଲନ୍‌ ପ୍ରବୁନ୍‌ ଅବ୍ରାଆମନ୍‌ ଆମଙ୍‌ବା ଆବର୍ରନ୍‌ ଆବର୍ନେ ଗବ୍‌ଡେଲ୍‌ତେ ।"

20 ପ୍ରବୁ ଅବ୍ରାଆମନ୍‌ଆଡଙ୍‌ ଆରି ବରେନ୍‌, "ସଦୋମନ୍‌ ଡ ଅମୋରାନ୍‌ ଆ ସଙ୍ଗତ୍ତାଲୋଙ୍‌ ସୋଡ଼ା ସର୍ରଙନ୍‌ ସଡ୍ଡାତେ, ଆ ଇର୍ସେଞ୍ଜି ଗୋଗୋୟ୍‌ ବଡ଼େଲେ ପାଙେନ୍‌ । 21 ତିଆସନ୍‌ ଞେନ୍‌ ଜାୟ୍‌ତାନ୍‌ ଗିୟ୍‌ଗିୟ୍‌ବାନ୍‌ ଇୟ୍‌ଲେ ଞେନ୍‌ ୟନେନ୍‌ ଅରମ୍‌ଡଙ୍‌ଲାଞନ୍‌ ଅନ୍ତମ୍‌ ଆନିଞ୍ଜି ଆଜାଡ଼ିନ୍‌ ଲୁମେଞ୍ଜି ଅଡ଼େ ଇଜ୍ଜା ତିଆତେ ଏଜନାବା ।"

22 ତି ଆସନ୍‌ ତି ଆ ମନ୍‌ରାଜି ତେତ୍ତେସିଲଡ୍‌ ୟର୍ରନ୍‌ ସଦୋମ୍‌ ଗଡ଼ାବାନ୍‌ ଜିରେଞ୍ଜି; ବନ୍‌ଡ ଅବ୍ରାଆମନ୍‌ ତିଆଡିଡ୍‌ ଜାୟ୍‌ ଇସ୍ୱରନ୍‌ ଆମୁକାବା ତନଙ୍‌ଲେ ଡକୋଲନେ । 23 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ପ୍ରବୁନ୍‌ ଆମଙ୍‌ବା ଇୟ୍‌ଲେ ବରେ, "ଆମନ୍‌ ପେଲ୍ଲାମରନ୍‌ ସରିନ୍‌ ଡରମ୍ମରନ୍‌ ରବ୍ବୁତେ ପଙ୍‌ ? 24 ଓଡେନ୍‌ନଙ୍‌, ଗଡ଼ାଲୋଙନ୍‌ ପଚାସ ଜଣ ଡରମ୍ମରନ୍‌ ଡକୋତେ ତେତ୍ତେଲୋଙନ୍‌ ପଚାସ ଜଣ ଡରମ୍ମମରନ୍‌ ଆସନ୍‌ ତି ଆ ଡରକୋନେ ଏର୍‌ଡନୋବ୍‌ ଅବ୍‌ସେତେ ପଙ୍‌ ? 25 ଡରମ୍ମମରନ୍‌ ସରିନ୍‌ ପେଲ୍ଲାମରନ୍‌ ସରିନ୍‌ ଅଃରବ୍ବୁଏଜି । ଏନ୍ନେଲେ ଡେଏନ୍‌ଣ୍ଡେନ୍‌ ପେଲ୍ଲାମରନ୍‌ ଡ ଡରମ୍ମ ମରନ୍‌ ଆବସମାନନ୍‌ ଡନିଡିନ୍‌ ଡେତେ । ସମ୍ପରା ପୁର୍ତିନ୍‌ ଆ ପନ୍‌ସୁଆତିମର୍‌ ପଙ୍‌ ଆଜାଡ଼ି ଅଃନବ୍‌ପନ୍‌ସୁଆତିଏ ।"

26 ତି ସିଲଡ୍‌ଲ୍ଲନ୍‌ ପ୍ରବୁନ୍‌ ବର୍ରନେ, "ଞେନ୍‌ ସଦୋମ୍‌ ଗଡ଼ାଲୋଙନ୍‌ ପସାସ ଜଣ ଡରମ୍ମରନ୍‌ ଗିୟ୍‌ଲାୟ୍‌ଡେନ୍‌, ତିଡେନ୍‌ ଆନିଞ୍ଜି ଆସନ୍‌ ଅଡ଼୍‌କୋନ୍‌ ଆଡ୍ରକୋନେ ଏଃନବ୍‌ସେଡାୟ୍‌ ।" 27 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ଜାଲଙ୍‌ଲେ ବର୍ରନେ, "ଗିୟ୍‌ବା, ଞେନ୍‌ ଆରଡ଼ି ଡ କୋମାବ୍‌ ଡେଲିୟ୍‌ଁ ଜନଙ୍‌ଡେନ୍‌ ପ୍ରବୁଞେନ୍‌ ଆମୁକାବା ବର୍ରନ୍‌ ରପ୍ତିତାୟ୍‌ । 28 ଓଡେନ୍‌ନଙ୍‌, ପଚାସ ଜଣ ଡରମ୍ମରନ୍‌ ସିଲଡ୍‌ ମନ୍‌ଲୟ୍‌ ମନ୍‌ରା ଅସୋୟ୍‌ ଡକୋତେ; ତି ମନ୍‌ଲୟ୍‌ ମନ୍‌ରା ଅସୋୟ୍‌ଜନ୍‌ ଆସନ୍‌ ପଙ୍‌ ଆମନ୍‌ ଅଡ଼୍‌କୋନ୍‌ ଆଗଡ଼ା ଅବ୍‌ସେତେ ?" ପ୍ରବୁ ବର୍ରନେ, "ଞେନ୍‌ ବାକୁଡ଼ି ମନ୍‌ଲୟ୍‌ ମନ୍‌ରା ଏଞାଙ୍‌ଲାୟ୍‌ଡେନ୍‌, ତି ଆଗଡ଼ା ଏଃନବ୍‌ସେଡାୟ୍‌ ?" 29 ଅବ୍ରାଆମନ୍‌ ପ୍ରବୁନ୍‌ଆଡଙ୍‌ ଆରି ବତର ବରେନ୍‌, "ଓଡେନ୍‌ନଙ୍‌, ତେତ୍ତେ ବାକୁଡ଼ି ମନ୍‌ରା ଞାଙ୍‌ଲନ୍‌ଡେନ୍‌ ।" ପ୍ରବୁ ବର୍ରନେ, "ତି ଆ ବାକୁଡ଼ି ମନ୍‌ରା ଆସନ୍‌ ଏଃନବ୍‌ସେଡାୟ୍‌ ।" 30 ଆରି ବତର ଅବ୍ରାଆମନ୍‌ ବର୍ରନେ, "ପ୍ରବୁ ଅଃବରାବ୍‌ଲମ୍‌ଡେନ୍‌ ଞେନ୍‌ ଆରି ବତର ବର୍ତନାୟ୍‌ । ତେତ୍ତେ ତିରିସି ଜଣ ଡରମ୍ମମରନ୍‌ ଡକୋଏଣ୍ଡେନ୍‌ ?"

ରବୁ ବର୍ରନେ, "ତିରିସି ଜଣ ଡକୋଏଣ୍ଡେନ୍‌, ଞେନ୍‌ ଏତ୍ତେଲେ ଅଃଲୁମାୟ୍‌ ?" 31 ଅବ୍ରାଆମନ୍‌ ବର୍ରନେ, "ଗିୟ୍‌ବା, ପ୍ରବୁନ୍‌ ଆମୁକାବା ଞେନ୍‌ ଆରି ବତର ବର୍ରନ୍‌ ରପ୍ତିତାୟ୍‌; ଓଡେନ୍‌ନଙ୍‌, ତି ତେତ୍ତେ ବକୁଡ଼ି ମନ୍‌ରା ଞାଙ୍‌ଲନ୍‌ଡେନ୍‌ ।" ପ୍ରବୁନ୍‌ ବର୍ରନେ, "ତି ବକୁଡ଼ି ଆ ମନ୍‌ରା ଆସନ୍‌ ଞେନ୍‌ ତି ଆଗଡ଼ା ଏଃନବ୍‌ସେଡାୟ୍‌ ।" 32 ଅବ୍ରାଆମନ୍‌ ବର୍ରନେ, "ପ୍ରବୁ ବିଜାର ଅଃଡେଲମ୍‌ଡେନ୍‌ ଆରି ବତର ବର୍ତନାୟ୍‌; ଓଡେନ୍‌ନଙ୍‌, ତେତ୍ତେ ଦସ ଜଣ ଞାଙ୍‌ଲନ୍‌ଡେନ୍‌ ?"

ପ୍ରବୁନ୍‌ ବର୍ରନେ, "ତି ଦସ ଜଣ ଆ ମନ୍‌ରା ଆସନ୍‌ ଞେନ୍‌ ତି ଆଗଡ଼ା ଏଃନବ୍‌ସେଡାୟ୍‌ ।" 33 ତି ଆଡିଡ୍‌ ପ୍ରବୁ ଅବ୍ରାଆମନ୍‌ ବାତ୍ତେ ଏନ୍ନେଲେ ଅଲ୍‌ବରେଞ୍ଜି, ଆରି, ଅବ୍ରାଆମନ୍‌ ନିୟ୍‌ ଆସିଙନ୍‌ ୟର୍ରନେ ।