ଇସାକନ୍ ଗେରାଲୋଙନ୍ ଡକୋଲନ୍
1 ପୁର୍ବାନ୍ ଅବ୍ରାଆମନ୍ ଆତେ ନମି ଏଙ୍ଗାଲେ କାନ୍ତାରାଏନ୍, ତି ଆଡେସା ଆରି ବତର ଆମ୍ମୁଙ୍ ଅନ୍ତମ୍ ଆରି କାନ୍ତାରାଏନ୍, ଇସାକନ୍ ଗରାରନ୍ ପଲେସ୍ଟିଅଞ୍ଜି ଆରାଜା ଅବିମେଲକନ୍ ଆମଙ୍ ଇୟେନ୍ । 2 ତି ଆଡିଡ୍ ପ୍ରବୁ ଆନିନ୍ଆଡଙ୍ ଅବ୍ଗିୟ୍ତାଲନ୍ ବରେନ୍, "ଆମନ୍ ମିସର୍ ଡେସାନ୍ ଇୟ୍ଡଙେ; ଞେନ୍ ଆମନ୍ଆଡଙ୍ ଅଙ୍ଗା ଆଡେସା ଏବର୍ତମ୍, ତେତ୍ତେ ଡକୋନା । 3 ଆମନ୍ କେନ୍ ଆଡେସାଲୋଙ୍ ଡକୋନା, ସିଲତ୍ତେ ଞେନ୍ ଆମନ୍ଆଡଙ୍ ଏଆସିର୍ବାଦତମ୍, ଆରି, ଆମନ୍ଆଡଙ୍ ଡ କେଜ୍ଜାନମ୍ କେନ୍ ଅଡ଼୍କୋନ୍ ଆଡେସା ଏତିୟ୍ତାୟ୍ ଡ ଆପେୟ୍ନମ୍ ଅବ୍ରାଆମନ୍ ଆମଙ୍ ଞେନ୍ଡମ୍ ଆର୍ଲୁମ୍ଲାଞନ୍ ଆପର୍ମାଡ଼ା ଅବ୍ଡେଡମ୍ତାୟ୍ । 4 ଞେନ୍ ରୁଆଙନ୍ ଆତୁତୁୟ୍ଜି ଅନ୍ତମ୍ କେଜ୍ଜାନମ୍ ଅବ୍ଗୋଗୋୟ୍ଲେ ଆନିଞ୍ଜିଆଡଙ୍ କେନ୍ ଅଡ଼୍କୋନ୍ ଆଡେସା ଏତିୟ୍ତାୟ୍ ଡ କେଜ୍ଜାନମ୍ ବାତ୍ତେ ପୁର୍ତିନ୍ ଅଡ଼୍କୋନ୍ ଆଜାତି ଆସିର୍ବାଦନ୍ ଞାଙ୍ତଜି । 5 ଞେନ୍ ଆମ୍ବେଞ୍ଜିଆଡଙ୍ ଆସିର୍ବାଦତବେନ୍ ଇନିଆସନ୍ଗାମେଣ୍ଡେନ୍ ଅବ୍ରାଆମନ୍ ବର୍ନେଞେନ୍ ମାନ୍ନେଏନ୍ ଆରି ଅଡ଼୍କୋନ୍ ଆ ବନାୟ୍ବରନ୍ ଡ ବନାଁୟ୍ବରନ୍ ଅନ୍ତମ୍ ଲୁମେନ୍ ।"
6 ସିଲଡ୍ଲ୍ଲନ୍ ଇସାକନ୍ ଗରାରଲୋଙ୍ ଡକୋଲନେ । 7 ତେତ୍ତେ ଆ ମନ୍ରାଜି ଆ ଡୁକ୍ରିନ୍ ଆବର୍ନେ ବର୍ରଞ୍ଜିଡେନ୍, ଆନିନ୍ ବର୍ରନେ, "ଆନିନ୍ ତନାଞେନ୍," ଇନିଆସନ୍ଗାମେଣ୍ଡେନ୍ ତେତ୍ତେ ଆ ମନ୍ରାଜି ରିବିକାନ୍ ଆଲତେଙ୍ ଞେନ୍ଆଡଙ୍ ରବୁଙିୟ୍ଜି, କେନ୍ ଇୟମ୍ଲେ ଆନିନ୍ ଆନିନ୍ଆଡଙ୍ ଡୁକ୍ରିଞେନ୍ ଗାମ୍ଲେ ଆବର୍ନେ ଆସନ୍ ବତଙେନ୍; ଇନିଆସନ୍ଗାମେଣ୍ଡେନ୍ ଆନିନ୍ ମାଡ୍ଡମନଙ୍ ଡକୋଏନ୍ । 8 ଆରି ତି ଆଡ୍ରକୋନେଲୋଙ୍ ଗୋଗୋୟ୍ ବର୍ସେଙ୍ ଆଡ୍ରକୋଲନ୍ ସିଲଡ୍ ବଡିନା ପଲେସ୍ଟିୟନ୍ ଆ ରାଜା ଅବିମେଲକନ୍ ଜର୍କାଗଡ୍ ପେର୍ମୋଡ୍ଲେ ଆଗ୍ରିଜେନ୍ ଆଡିଡ୍ ଇସାକନ୍ ଡ ଆଡୁକ୍ରିନ୍ ରିବିକାନ୍ ବାତ୍ତେ ଆଲୁଲୁଡନ୍ ଗିଜେଞ୍ଜି । 9 ତିଆସନ୍ ଅବିମେଲକନ୍ ଇସାକନ୍ଆଡଙ୍ ଓଡ୍ଡେଲେ ବରେନ୍, "ତି ଆଇବୟ୍ ଆଜାଡ଼ିନ୍ ଡୁକ୍ରିନମ୍; ବନ୍ଡ ଆମନ୍ ଆନିନ୍ଆଡଙ୍ ତନାଞେନ୍ ଗାମ୍ଲେ ଏଙ୍ଗାଲେ ବର୍ରନେ ?" ତିଆଡିଡ୍ ଇସାକନ୍ ଜାଲଙ୍ଲେ ବରେନ୍, "ଞେନ୍ ଇୟମ୍ଲାୟ୍, ଓଡେନ୍ନଙ୍ ଆଲତେଙନ୍ ଞେନ୍ ରବୁତିୟ୍ ।" 10 ସିଲତ୍ତେ ଅବିମେଲକନ୍ ବର୍ରନେ, "ଆମନ୍ ଇନ୍ଲେଞ୍ଜି ବାତ୍ତେ ଇନିବା ଏନ୍ନେଲେ ଞଡ୍ରମ୍ଲନେ ? ଅନ୍ନିଙ୍ ଆ ମନ୍ରା ଡୁକ୍ରିନମ୍ ବାତ୍ତେ ଲୁଡ୍ଲେ ରପ୍ତିତବନ୍, ସିଲତ୍ତେ ଆମନ୍ ଇନ୍ଲେଞ୍ଜିଆଡଙ୍ ଅବ୍ଡୋସାତଲେନ୍ବନ୍ ।" 11 ତି ସିଲଡ୍ଲ୍ଲନ୍ ଅବିମେଲକନ୍ ଅଡ଼୍କୋ ମନ୍ରାନ୍ଆଡଙ୍ କେନ୍ ଆବନାଁୟ୍ବର୍ ଅବ୍ଜନାଏନ୍, "ଆନା ତି ଆ ମନ୍ରା ଅଡ଼େ ଆଡୁକ୍ରିନ୍ଆଡଙ୍ ସୁଙେତେ, ଆନିନ୍ଆଡଙ୍ ରନବ୍ବୁନ୍ ଡେତେ ।"
12 ତି ସିଲଡ୍ଲ୍ଲନ୍ ଇସାକନ୍ ତି ଆଡେସାଲୋଙ୍ ଅର୍ରଲନ୍ ତି ଆ ବର୍ସେଙ୍ ବସଅ ଗୁନ ଲାବଏନ୍; ଆରି ପ୍ରବୁନ୍ ଆନିନ୍ଆଡଙ୍ ଆସିର୍ବାଦଏନ୍ । 13 ତିଆସନ୍ ଆନିନ୍ ମରଙେନ୍, ଆରି ଆନିନ୍ ଆରି ମରଙ୍ଲେ ଗମାଙେନ୍ । 14 ଆରି ଆମେଣ୍ତାନ୍ ଡ ତାଙ୍ଲେୟନ୍, ଆରି ଗୋଗୋୟ୍ କମ୍ବାରିମରନ୍ ଡ କମ୍ବାରିବଜନ୍ ଡେଏନ୍; ତିଆସନ୍ ପଲେସ୍ଟିୟନ୍ ଆ ମନ୍ରାଜି ଆନିନ୍ଆଡଙ୍ ସଙ୍ଗତ୍ତାଏଞ୍ଜି । 15 ତିଆସନ୍ ଆପେୟନ୍ ଆଡିଡ୍ ଆପେୟନ୍ ଆକମ୍ୱାରିଜି ଅଙ୍ଗା ଅଙ୍ଗା ଆକୁଆ ଗାୟେଞ୍ଜି, ପଲେସ୍ଟିୟନ୍ ଆ ମନ୍ରାଜି ଲବନ୍ ଆମ୍ୟଲ୍ଲେ ତିଲେଞ୍ଜି ।
16 ତି ସିଲଡ୍ଲ୍ଲନ୍ ଅବିମେଲକନ୍ ଇସାକନ୍ଆଡଙ୍ ବରେନ୍, "ଆମନ୍ ଅମଙ୍ଲେନ୍ ସିଲଡ୍ ଜିରା, ଇନିଆସନ୍ଗାମେଣ୍ଡେନ୍ ଆମନ୍ ଇନ୍ଲେଞ୍ଜି ସିଲଡ୍ ଗୋଗୋୟ୍ ବୋର୍ସାମର୍ ଡେଲମ୍ ।" 17 ସିଲତ୍ତେ ଇସାକନ୍ ତି ଆଡ୍ରକୋନେ ସିଲଡ୍ ଜିର୍ରେ, ଗରାରନ୍ ଆବରୁ ଆମଡ୍ଡିଲୋଙ୍ ତମ୍ବୁସିଙନ୍ ତୁବ୍ଲେ ତିତେତ୍ତେ ଡକୋଲନେ । 18 ଆରି ଆପେୟନ୍ ଅବ୍ରାଆମନ୍ ଆଡିଡ୍ ଅଙ୍ଗା ଅଙ୍ଗା ଆ କୁଆ ଗାୟେନ୍, ଅବ୍ରାଆମନ୍ ଆର୍ରବୁଏନ୍ ସିଲଡ୍ ପଲେସ୍ଟିୟନ୍ ଆ ମନ୍ରାଜି ଲବନ୍ ଆମ୍ୟଲ୍ଲେ ତିଲେଞ୍ଜି, ତି ଅଡ଼୍କୋନ୍ ଇସାକନ୍ ବାର୍ଗାୟେନ୍ ଆରି ଆପ୍ପେୟନ୍ ଆରବ୍ଞୁମେନ୍ ଅନ୍ତମ୍ ଆଞୁମନ୍ ଡକ୍କୋଏନ୍ ।
19 ଆରି ଇସାକନ୍ ଆକମ୍ୱାରିମର୍ଜି ତି ଆଗର୍ଡରେଙ୍ କୁଆନ୍ ଆଗ୍ରାୟେଞ୍ଜି ଡାଆନ୍ ଞାଙେଞ୍ଜି । 20 ସିଲତ୍ତେ ଗରାରନ୍ ଆଡେସା ଆତୁର୍ମେଡ୍ମର୍ଜି ଇସାକନ୍ ଆତୁର୍ମେଡ୍ମର୍ଜି ବାତ୍ତେ ଗୋଡ଼େଲନ୍ ବରେଞ୍ଜି, "କେନ୍ ଆଡାଆ ଞେନ୍ଆତେ," ତିଆସନ୍ ତି ଆକୁଆ ଆଞୁମ୍ ଏସକ(ଆଗ୍ରାମ୍ଗାମ୍ ଗୋଡ଼େ) ଅବ୍ଞୁମେନ୍, ଇନିଆସନ୍ଗାମେଣ୍ଡେନ୍ ଆନିଞ୍ଜି ଆନିଞ୍ଜି ବାତ୍ତେ ଗୋଡ଼େଲଞ୍ଜି ।
21 ତି ସିଲଡ୍ଲ୍ଲନ୍ ଇସାକନ୍ ଆ କମ୍ୱାରିଞ୍ଜି ଆରି ଅବୟ୍ କୁଆନ୍ ଗାୟେଞ୍ଜି, ତି ଆସନ୍ ଜାୟ୍ ଆନିଞ୍ଜି ଗୋଡ଼େଲଞ୍ଜି; ସିଲତ୍ତେ ଇସାକନ୍ ତି ଆକୁଆ ଆଞୁମ୍ ସିଟ୍ନା ଆଗରାମ୍ଗାମନ୍ ବନେରା ଅବ୍ଞୁମେନ୍ । 22 ଆରି ଇସାକନ୍ ତେତ୍ତେ ସିଲଡ୍ ଜିର୍ରେ ଆରି ଅବୟ୍ କୁଆନ୍ ଗାୟେନ୍ । ତି ଆସନ୍ ଆନିଞ୍ଜି ଅଃଗ୍ଗୋଡ଼େଲଞ୍ଜି ଆସନ୍ ତି ଆଞୁମନ୍ ରଓବୋତ୍ ଆଗରାମ୍ଗାମନ୍ ଲାଆଙ୍ ଡରକୋନେନ୍ ଅବ୍ଞୁମେନ୍; ଇନିଆସନ୍ଗାମେଣ୍ଡେନ୍ ଆନିନ୍ ବର୍ରନେ, ନମି ପ୍ରବୁନ୍ ଇନ୍ଲେଞ୍ଜିଆଡଙ୍ ଡରକୋନେନ୍ ତିୟ୍ତିୟ୍ଲଙ୍ତନ୍, ଇନ୍ଲେଞ୍ଜି କେନ୍ ଆଡେସାଲୋଙ୍ ମରଙ୍ଲଙ୍ତନ୍ ।
23 ତି ସିଲଡ୍ଲ୍ଲନ୍ ଇସାକନ୍ ତି ଆଡ୍ରକୋନେ ସିଲଡ୍ ବେର୍ସେବାନ୍ ଜିରେନ୍ । 24 ତି ଆତଗଲ୍ ପ୍ରବୁନ୍ ଆନିନ୍ଆଡଙ୍ ଅବ୍ଗିୟ୍ତାଲନ୍ ବର୍ରନେ, "ଞେନ୍ ଆପ୍ପେୟ୍ନମ୍ ଅବ୍ରାଆମନ୍ ଆ ଇସ୍ୱର; ବତଙ୍ଡଙମ୍, ଇନିଆସନ୍ଗାମେଣ୍ଡେନ୍ ଞେନ୍ ଆମନ୍ ସରିନ୍ ଡ କମ୍ୱାରିଞେନ୍ ଅବ୍ରାଆମନ୍ ଆସନ୍ ଆମନ୍ଆଡଙ୍ ଡ କେଜ୍ଜାନମ୍ ଏମବ୍ରଙ୍ତାୟ୍ ।" 25 ତି ସିଲଡ୍ଲ୍ଲନ୍ ଇସାକନ୍ ତି ଆଡ୍ରକୋନେଲୋଙ୍ ତନମ୍ପିଲନ୍ ତୁବ୍ଲେ ପ୍ରବୁନ୍ ଆଞୁମ୍ଲୋଙ୍ ପାର୍ତନାଲନେ । ତି ସିଲଡ୍ଲ୍ଲନ୍ ଆନିନ୍ ତି ଆଡ୍ରକୋନେଲୋଙ୍ ତମ୍ବୁସିଙନ୍ ଗୁଏନ୍, ତେତ୍ତେ ଆ କମ୍ୱାରିଞ୍ଜି ଅବୟ୍ କୁଆନ୍ ଗାୟେଞ୍ଜି ।
ଅବିମେଲକନ୍ ଡ ଅବ୍ରାଆମନ୍ ବାତ୍ତେ ଅନଗଡନ୍
26 ତି ସିଲଡ୍ଲ୍ଲନ୍ ଅବିମେଲକନ୍ ଅଓସତ୍ ଆଞୁମ୍ ଆ ସାଙ୍ଗନ୍ଆଡଙ୍ ଡ ପିକୋଲନ୍ ଆଞୁମ୍ ଆ ସିପ୍ପାୟନ୍ଆଡଙ୍ ଓରୋଙ୍ଲେ ଗରାରନ୍ ସିଲଡ୍ ଇସାକନ୍ ଆମଙ୍ ଜିରେଞ୍ଜି । 27 ସିଲତ୍ତେ ଇସାକନ୍ ଆନିଞ୍ଜିଆଡଙ୍ ବରେଞ୍ଜି, "ଆମ୍ୱେଞ୍ଜିତ ଞେନ୍ଆଡଙ୍ ଏଡ଼ୁର୍ମଡ୍ତିୟ୍, ଆରି, ଅମଙ୍ବେନ୍ ସିଲଡ୍ ଞେନ୍ଆଡଙ୍ ଏଗଙ୍ତିଡ୍ଲିୟ୍, ନମି ଅମଙ୍ବାଞେନ୍ ଇନିବା ଏଇୟ୍ଲାୟ୍ ?"
28 ସିଲତ୍ତେ ଆନିଞ୍ଜି ଜାଲଙ୍ଲେ ବରେଞ୍ଜି, "ପ୍ରବୁନ୍ ଆମନ୍ ସରିନ୍ ଡକୋ, କେନ୍ ଆତେ ଇନ୍ଲେଞ୍ଜି ଆଜାଡ଼ିନ୍ ଏଗିୟ୍ଲାୟ୍; କେନ୍ ଆସନ୍ ଏବର୍ରନାୟ୍, ଅମଙ୍ବାଲେନ୍ ଅବୟ୍ ମୋରାନ୍ନା ଡକୋଏତୋ ଡ ଇନ୍ଲେଞ୍ଜି ସରିନ୍ ଆମନ୍ ଅବୟ୍ ଅନଗଡନ୍ ଡେଏତୋ; 29 ଇନ୍ଲେଞ୍ଜି ଏଙ୍ଗାଲେ ଆମନ୍ଆଡଙ୍ ଏସୁଙେଲମ୍ ଡ ସରୁକ୍କାନମ୍ ଉମ୍ରେଙ୍ଲେ ଆରି ଇନ୍ନିଙ୍ ଏଃନେଙ୍ଗାମଲ୍, ବନ୍ଡ ଆମନ୍ଆଡଙ୍ ସୟୁନ୍ ବାତ୍ତେ ଏଆପ୍ପାୟ୍ଲମ୍, ଏତ୍ତେଲେମା ଆମନ୍ ଇନ୍ଲେଞ୍ଜିଆଡଙ୍ ସଙ୍ଗତାଡଙ୍ଲେନ୍; ଆମନ୍ ତ ପ୍ରବୁ ଆସିର୍ବାଦମର୍ ।" 30 ତିଆଡିଡ୍ ଇସାକନ୍ ଆନିଞ୍ଜି ଆସନ୍ ବୁଜ୍ଜିନ୍ ଆତ୍ରୁବେନ୍, ଆନିଞ୍ଜି ଗାଗାଲଞ୍ଜି । 31 ତି ସିଲଡ୍ଲ୍ଲନ୍ ଆନିଞ୍ଜି ଡୋତାନ୍ ଲଡୋଲନ୍ ତର୍ଡମ୍ ପର୍ମାଡ଼ାଲଞ୍ଜି । ଆରି ଇସାକନ୍ ଆନିଞ୍ଜିଆଡଙ୍ ଆରାପ୍ପାୟେଞ୍ଜି, ଆନିଞ୍ଜି ଆମଙ୍ ସିଲଡ୍ ସନୟୁନ୍ ବାତ୍ତେ ଜିରେଞ୍ଜି ।
32 ତିଆଡିଡ୍ ଇସାକନ୍ ଆକମ୍ୱାରିଜି ଆନିଞ୍ଜିଡମ୍ ବରେଞ୍ଜି ଆଗରାୟେଞ୍ଜି ଆକୁଆ, ଞେନ୍ ଡାଆନ୍ ଏଞାଙ୍ଲାୟ୍ ଗାମ୍ଲେ "ଆଡଙ୍ ବରେଞ୍ଜି ।" 33 ତିଆସନ୍ ଆନିନ୍ ତି ଆକୁଆ ଆଞୁମ୍ ସିବା ଡକୋଏନ୍, ଆରି, ନମି ଆନ୍ତାନ୍ ତି ଆଡ୍ରକୋନେ ଆଗଡ଼ା ବେର୍ସେବାନ୍ ଅଞୁମନ୍ ଅନୋଡେନ୍ ଡେତେ ।
ଏସୋନ୍ ଆଡୁକ୍ରି ବଡେସାବୟ୍
34 ତି ସିଲଡ୍ଲ୍ଲନ୍ ଏସୋନ୍ ବାକୁଡ଼ି ବର୍ସେଙ୍ ଆଡ୍ରେନ୍ ଆଡିଡ୍ ଇତିଅନ୍ ବେରିରନ୍ ଜିଉଦିତନ୍ ଆଞୁମ୍ ଆ ଡାଙ୍ଗଡ଼ିଆଡଙ୍ ଡ ଇତ୍ତିୟନ୍ ଏଲୋନନ୍ ବାସମତନ୍ ଆଞୁମ୍ ଆ ଡାଙ୍ଗଡ଼ିଆଡଙ୍ ବିବାଲନେ । 35 ବନ୍ଡ ଆନିଞ୍ଜି ଇସାକନ୍ ଡ ରିବିକାନ୍ ଆମନଲୋଙ୍ ଦୁକନ୍ ଆତନିୟ୍ବୟ୍ ଡେଏନ୍ ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)