ଜୋସେପନ୍ ଡ ପଟିପରନ୍ ଆଡୁକ୍ରି
1 ଜୋସେପନ୍ ମିସର୍ ଡେସାନ୍ ଅନୋରୋଙନ୍ ଆଡ୍ରେନ୍ଆଡିଡ୍, ପାରୋନ୍ ଆ କମ୍ୱାରି ଆଗ୍ରାମ୍ଗାମ୍, ମିସ୍ରିୟନ୍ ପୋଟିପରନ୍ ଆଞୁମ୍ ଆ ସୋଡ଼ା ସିପ୍ପାୟନ୍, ଇସ୍ମାଏଲିଅଞ୍ଜି ଆମଙ୍ ସିଲଡ୍ ଜୋସେପନ୍ଆଡଙ୍ ଞିଏନ୍ । 2 ବନ୍ଡ ପ୍ରବୁ ଜୋସେପନ୍ ସରିନ୍ ଡକୋଏନ୍, ତିଆସନ୍ ଆନିନ୍ ମରଙେନ୍; ଆରି ଆନିନ୍ ମିସର୍ ଡେସାନ୍ ଆଡନେମର୍ ଆସିଙ୍ଲୋଙ୍ ଡକୋଲନେ । 3 ତି ସିଲଡ୍ଲ୍ଲନ୍ ପ୍ରବୁନ୍ ଜୋସେପନ୍ ସରିନ୍ ଡକୋଲନେ ଆରି ଆନିନ୍ ଅଙ୍ଗା ଅଙ୍ଗା ଆକାବ୍ବାଡ଼ା ଲୁମେନ୍, ପ୍ରବୁନ୍ ଆସିଲୋଙନ୍ ତି ଅଡ଼୍କୋନ୍ ଗବ୍ଡେଲେନ୍, କେନ୍ଆତେ ଆଡନେମରନ୍ ଗିଜେନ୍ । 4 ତିଆସନ୍ ଜୋସେପନ୍ ଆଗନିୟ୍ଗିୟ୍ଲୋଙନ୍ ସନାୟୁମନ୍ ଞାଙ୍ଲେ ଆସ୍ନେବାଲୋଙନ୍ ରୟଙନ୍ ଞାଙେନ୍, ଆରି, ଆନିନ୍ ଜୋସେପନ୍ଆଡଙ୍ ଆସିଙନ୍ ଆଗୁମୁସ୍ତା ଏମ୍ମେଲେ ଆସିଲୋଙନ୍ ଅଡ଼୍କୋନ୍ ସୋରୋପ୍ପାୟେନ୍ । 5 କେନ୍ ଅନ୍ତମ୍ ଆନିନ୍ ଜୋସେପନ୍ଆଡଙ୍ ଆସିଙନ୍ ଆ ସୋଡ଼ାମର୍ ଆରେମ୍ମେନ୍ ସିଲଡ୍ ପ୍ରବୁନ୍ ଜୋସେପନ୍ ଆସନ୍ ତି ମିସ୍ରିଅନ୍ ଆ ମନ୍ରା ଆସିଙ୍ଲୋଙ୍ ଆସିର୍ବାଦଏନ୍; ଆରି, ଅସିଂଙନ୍ ଡ ବସେଙ୍ଲୋଙନ୍ ଅଡ଼୍କୋନ୍ ଆଜନବ୍ ପ୍ରବୁନ୍ ଆସିର୍ବାଦଏନ୍ । 6 ତିଆସନ୍ ଆନିନ୍ ଜୋସେପନ୍ ଆସିଲୋଙ୍ ଆନିନ୍ଡମ୍ ଅଡ଼୍କୋନ୍ ଆଜନବ୍ ସୋରୋପ୍ପାୟେନ୍, ବନ୍ଡ ଆନିନ୍ଡମ୍ ଆଗାଗାନେନ୍ ଅମ୍ରେଙ୍ଲେ ଇନ୍ନିଙ୍ ଆବର୍ନେ ଅଃନିୟମ୍ଲୋ । ଜୋସେପନ୍ ଅସେଲ୍ ଡ ମନଙ୍ ଡକୋଏନ୍ । 7 କେନ୍ ଅଡ଼୍କୋନ୍ ଆଗନଟେ ଆତିକି ଆ ସାଉକାରନ୍ ଆଡୁକ୍ରି ଜୋସେପନ୍ଆଡଙ୍ ଗିୟ୍ମଡେନ୍; ସିଲତ୍ତେ ଆନିନ୍ଆଡଙ୍ ବରେନ୍, "ଆମନ୍ ଞେନ୍ ସରିନ୍ ଲୁଡା ।" 8 ବନ୍ଡ ଜୋସେପନ୍ ଆ ସାଉକାରନ୍ ଆଡୁକ୍ରି ଆବର୍ନେ ଆଲ୍ଲେଡାଲେ ବର୍ରନେ, "ଗିଜା, କେନ୍ ଆସିଙ୍ଲୋଙ୍ ଇନିଜି ଡକୋ ସାଉକାଞେନ୍ ଅଃଜୁବାୟେ, ଆନିନ୍ ଅଡ଼୍କୋନ୍ଆତେ ଅସିଲୋଙ୍ଞେନ୍ ସୋରୋପ୍ପାୟ୍ଲିଁୟ୍ । 9 କେନ୍ ଆସିଙ୍ଲୋଙ୍ ଞେନ୍ ସିଲଡ୍ ଆନ୍ନିଙ୍ ସୋଡ଼ା ତଡ୍; ଆମନ୍ ଆଡୁକ୍ରିନ୍, ତିଆସନ୍ ଆମନ୍ ଅମ୍ରେଙ୍ଲେ ଞେନ୍ ଆସନ୍ ଇନ୍ନିଙ୍ ମନା ତଡ୍ । ତିଆସନ୍ ଞେନ୍ ଏଙ୍ଗାଲେ ଡକଡ୍ନେ ଆସୋଡ଼ା ଆପେଲ୍ଲା ଡ ଇସ୍ୱରନ୍ ଆ ବିରୁଦଲୋଙ୍ ଇର୍ସେନ୍ ଲୁମାୟ୍ ?" 10 ଡେଲୋଜନଙ୍ଡେନ୍ ତି ଆଇବୟ୍ ବଡିନାନ୍ କି ବଡିନାନ୍ ଜୋସେପନ୍ଆଡଙ୍ ଏନେଲେ ବରେନ୍; ବନ୍ଡ ଜୋସେପନ୍ ଆନିନ୍ ସରିନ୍ ଆଲନୁଡ୍ ଅଡ଼େ ଆମଙନ୍ ଆଡକୋନେ ଅଃନିଡ୍ସିମ୍ଲୋ । 11 ତି ସିଲଡ୍ଲ୍ଲନ୍ ବଡିନା ଜୋସେପନ୍ ଅମ୍ମସିଙନ୍ ଆ କାବ୍ବାଡ଼ାନ୍ ଆଲନୁମ୍ ଆସନ୍ ଜିରେନ୍, ଆରି, ଅସିଂଙନ୍ ଆକମ୍ୱାରିଜି ସିଲଡ୍ ଆନ୍ନିଙ୍ ଅମ୍ମସିଙନ୍ ଅଃଡକୋଲଞ୍ଜି । 12 ତିଆସନ୍ ଆନିନ୍ ଜୋସେପନ୍ ଆସିନ୍ରି ଞମ୍ଲେ ଞେନ୍ ସରିନ୍ ଲୁଡା ଗାମ୍ଲେ ଡିଙ୍ଡିଙ୍ରେଡେନ୍; ବନ୍ଡ ଜୋସେପନ୍ ଆସିଲୋଙନ୍ ଆସିନ୍ରିନ୍ ଅମ୍ରେଙ୍ଲେ ଡାଣ୍ତନ୍ ଡୁଙ୍ଲନ୍ ଜିରେନ୍ । 13 ତିଆଡିଡ୍ ତି ଆଇବୟ୍ ଜୋସେପନ୍ ଆସିନ୍ରି ଆସିଲୋଙନ୍ ଅମ୍ରେଙ୍ଲେ ଡାଣ୍ତନ୍ ଆଡୁଙ୍ନେ ଆସନ୍ ଗିଜେନ୍, 14 ତିଆଡିଡ୍ ଆନିନ୍ ଆସିଙ୍ ଆ ମରଞ୍ଜିଆଡଙ୍ ଓଡ୍ଡେଲେ ବରେନ୍, "ଗିୟ୍ବା, ଆନିନ୍ ଇନ୍ଲେଞ୍ଜି ଆଗବ୍ରୟ୍ମଡ୍ ଆସନ୍ ବୟ୍ନେ ଏବ୍ରିଅନ୍ଆଡଙ୍ ଓରୋଙ୍ଲାୟ୍; ଆନିନ୍ ଞେନ୍ ସରିନ୍ ଆଲନୁଡ୍ ଆସନ୍ ଅମ୍ମସିଙନ୍ ଇୟ୍ଲାୟ୍; ସିଲତ୍ତେ ଞେନ୍ ସୋଡ଼ା ସର୍ରଙନ୍ ବାତ୍ତେ ବାବ୍ବାବ୍ଲାୟ୍; 15 ସୋଡ଼ା ସର୍ରଙ୍ଞେନ୍ ବାତ୍ତେ ଆନୋଡ୍ଡେ ଅମ୍ଡଙ୍ଲେ ଆନିନ୍ ଆସିନ୍ରିନ୍ ମଙ୍ବାଞେନ୍ ଉମ୍ରେଙ୍ଲେ ଡାଣ୍ତନ୍ ଜିରେନ୍ ।"
16 ଆରି, ତି ଆଇବୟ୍ ଆସିଙ୍ମରନ୍ ଅନ୍ରଙ୍ ଜିରାଞନ୍ ଜାୟ୍ ତି ଆସିନ୍ରି ଆମଙନ୍ ଡକୋଏନ୍ । 17 ତି ସିଲଡ୍ଲ୍ଲନ୍ ଆନିନ୍ ଆଅୟ୍ତବନ୍ ତି ଅଡ଼୍କୋନ୍ ଆବର୍ନେ ବରେନ୍, "ଆମନ୍ ଅଙ୍ଗା ଆ ଏବ୍ରିଅ ଆ କମ୍ୱାରି ଅମଙ୍ବାଲେନ୍ ଓରୋଙ୍ଲାୟ୍, ଆନିନ୍ ଞେନ୍ ଆଗନବ୍ରୟ୍ମଡ୍ ଆସନ୍ ମଙ୍ବାଞେନ୍ ଇୟ୍ଲାୟ୍, 18 ଆରି, ଞେନ୍ ସୋଡ଼ା ସର୍ରଙନ୍ ବାତ୍ତେ ବରାବ୍ବାବ୍ଲାଞନ୍ ଆନିନ୍ ମଙ୍ବାଞେନ୍ କେନ୍ ଆସିନ୍ରି ଅମ୍ରେଙ୍ଲେ ଡାଣ୍ତନ୍ ଜିରେନ୍ ।" 19 ତିଆଡିଡ୍ "କମ୍ୱାରିନମ୍ ଞେନ୍ଆଡଙ୍ କେନ୍ଏଡ୍ନେଲେ ଞର୍ରମ୍ତିଁୟ୍," ଆଡୁକ୍ରିନ୍ ଆମୁକ୍କାଲୋଙ୍ କେନ୍ ଆବର୍ନେ ଅମ୍ଡଙ୍ଲେ ଜୋସେପନ୍ ଆ ସାଉକାର ବରାବେନ୍ । 20 ଆରି ଜୋସେପନ୍ ଆ ସାଉକାର ଆନିନ୍ଆଡଙ୍ ଓରୋଙ୍ଲେ ରାଜାଞ୍ଜି ଆବନେରାମରଞ୍ଜିଆଡଙ୍ ଅଙ୍ଗାଲୋଙ୍ ବଣ୍ଡିଲେ ଡକ୍କୋଏନ୍; ଜୋସେପନ୍ ତି ଆବଣ୍ତିସିଙ୍ଲୋଙ୍ ଡକୋଲନେ । 21 ବନ୍ଡ ପ୍ରବୁ ଜୋସେପନ୍ ସରିନ୍ ଡକୋଏନ୍, ଆରି, ଆନିନ୍ଆଡଙ୍ ସାୟୁମ୍ଲେ ବଣ୍ତିସିଙନ୍ ଆଜନଗ୍ଗେମର୍ ଆଗନିୟ୍ଗିୟ୍ଲୋଙ୍ ଆନିନ୍ଆଡଙ୍ ସନାୟୁମନ୍ ଞାଙେନ୍ । 22 ସିଲତ୍ତେ ତି ବଣ୍ତିସିଙନ୍ ଆଜନଗେମର୍ ବଣ୍ତିସିଂଙ୍ଲୋଙନ୍ ଅଡ଼୍କୋନ୍ ବନଣ୍ତିନ୍ ଆ ମନ୍ରା ଆବୁଡ଼ାର୍ ଜୋସେପନ୍ ଆସିଲୋଙ୍ ସୋରୋପ୍ପାୟେନ୍; ଆରି, ଆନିଞ୍ଜି ଇନିଜି ଲୁମେଞ୍ଜି, ଆନିନ୍ ତି ଅଡ଼୍କୋନ୍ ଆସୋଡ଼ାମର୍ ଡେଏନ୍ । 23 ବଣ୍ତିସିଙନ୍ ଆ ଜନଗେମର୍ ଜୋସେପନ୍ ଆରାଜାନେଗଡ୍ ଅନ୍ନିଙ୍ ଆବର୍ନେଲୋଙ୍ ଅଃନାଙାଙ୍ଲୋ, ଇନିଆସନ୍ଗାମେଣ୍ଡେନ୍ ପ୍ରବୁନ୍ ଆନିନ୍ଆଡଙ୍ ସରିନ୍ ଡକୋଏନ୍; ଆରି, ଆନିନ୍ ଇନିଜି ଲୁମେନ୍, ପ୍ରବୁନ୍ ତିଜିଆତେ ଗବ୍ଡେଲେନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)