Marcos 11

Yesu kokwingila Yelusalem kwa ndeng’helelo

1 Viwawile behi na Yelusalemu, wavika mvijiji va Betifage na Betania kuulugongo lwa Mizeituni, Yesu kawalagiza waluko wake waidi, 2 na kawalongela, "Gendeni mbaka mchijiji chili haulongozi yenu na mhengila tu mchijiji, momvika mwana mhunda kafungigwa, habule munhu yoyose yampapile. Mfunguleni, mngalile hano. 3 Kama munhu yoyose yonda yawauze, ‘Habali momfungula?’ Mlongeleni, ‘Mndewa komlonda na kombweleza hano vino sambi.’ "

4 Wagenda, wamvika mwana mhunda kafungigwa mumgwazo mwa nzila, habehi na lwivi lwa ng’anda. Viwakalile womfungula, 5 wanhu wamwenga wakalile wema habehi wawauza, mwehe motenda choni baho? "Habali momfungula mwana mhunda iyo?"

6 Waja waluko wawedika kama vija Yesu viyawalagize, nawaja wanhu wawaleka wamsole. 7 Amala wamgala ija mwana mhunda kwa Yesu na kumwikila vivalo vao mumgongo, nayo Yesu kakwela uchanha yake. 8 Wanhu wengi wayanzanza vivalo vao mnzila na wamwenga wayanzanza makwamvi gawakanhile mmigunda. 9 Amala wanhu wose waja wakalile walongole haulongozi na waja wakalile wokwiza hachisogo wenula dizi, walonga, "Mulungu yatogoligwe! Kamweda ija yokwiza kwa zina da Mndewa! 10 "Umweda Ufaume ukwiza wa Tata yetu Daudi!" "Mulungu yeli kuchanha yatogoligwe ng’hani!"

11 Yesu kengila Yelusalemu na kuita hai ng’anda ya Mulungu. Nakalola chila chinhu chiliumo. Mbali kwavija ikala chigulogulo, kaita mchijiji cha Betania yeli hamwe na waja waluko kumi na waidi.