Marcos 6

Yesu kaweng’ha ndia wanhu elufu tano

30 Waja waluko wa Yesu wabwela na kuiting’hanila kwa Yesu na wamlongela mbuli ziwasang’hane na kufunda. 31 Baho kwa vija wanhu wengi ng’hani wakala wokwingila umo na kulawa, kakala yowasang’hanila mbaka wopotigwa kupata nyafasi ya kuja ndia, Yesu kawalongela waluko wake, "Chiteni chiinege chiiyeka hanhu haifisile, chipate kuhumula chidogo." 32 Ivo wasegela kwa kutumila ngalawa yao waiyeka waita hanhu haifisile halibule wanhu.

33 Mbali wanhu wengi wawaona viwosegela, wawamanya kuwaita, nawo walopola kuwalongolela kwa magulu, kulawa mzikae zose, na walopola kuvika kabula yao. 34 Yesu viyalawile kulawa mui ngalawa kadiona bumbila kulu da wanhu, kawaonela ubazi manake wakala kama bung’hukilalo walibule msusilaji. Kwaivo kasonga kuwafunda mbuli nyingi. 35 Zua vidiswele, waluko wake wamuwinza Yesu, wamlongela, "Hanhu hano habule wanhu na zua diswa ng’hani. 36 Walage wanhu ili wadahe kuita mzikae na mvijiji vili behi, waigulile ndia."

37 Mbali Yesu kawalongela, "Weng’heni mweye ndia." Waja waluko wamlongela Yesu, "Hachidaha kugula migate ya kuwenela wahu wano wose, hata chihawa na dinali mia mbili.*6:37 Kwa chipindi icho dinali mia mbili ni sente za kwenela kumliha munhu imwe kwa miezi minane. 38 Kawauza, "Kuna migate mingahi? Gendeni mkalole."

Viwamalile kulola wabwela, na wamlongela, "Hana migate mitano na somba waidi."

39 Amala Yesu kawalagiza waluko wake wawagole wanhu wakale vilundo mmayani, 40 ivo wanhu wakala wamwenga wanhu mia na wamwenga hamsini hamsini. 41 Yesu kaisola ija migate mitano na waja somba waidi amala kalola kuulanga kwa Mulungu, kamwing’ha hewela Mulungu amala kaibanzula ija migate, kaweng’ha waluko wake wawagolele waja wanhu wose. Na ivija kaweng’ha waluko wake wawagolele waja somba waidi wanhu wose. 42 Wanhu wose waja, na weguta. 43 Waluko wake wakunzanya vihande visigale va migate na somba, wamemeza vigelo kumi na vidi. 44 Nao wadile ndia iyo walume wakala kama elufu tano.