1 ଏ ନା ମାରିନ୍‌, ନା ଗ୍ୟାନ୍‌ତୁ ମନ୍‌ ସିଆ; ନା ବୁଦି ତରିନ୍‌ ନି ଗିତଣିଦାନ୍‌ ୱେନ୍‌ଆ; 2 ଏଣ୍ତେସ୍‌ ନିନୁ ନେଗେନ୍‌ତାନ୍‌ ଜିଦେଙ୍ଗ୍‌ ଆଟ୍‌ନି ମାରି ଏଣ୍ତେସ୍‌ ନି ୱେୟୁ ବୁଦି ମାଟା ମାନାନାତ୍‌ । 3 ଏନ୍ଦାଇରିଙ୍ଗା ଦାରି ଆଇମାଦି ୱେୟୁଦାନ୍‌ ବଟୁ ବଟୁ ପୁକି ନିୟୁ ନାନି ସାୱି ମାଟା ସନାତ୍‌, ତାନି ୱେୟୁ ନିୟୁ ବାଦ୍‌ଲୁ ନାଣ୍ଡ ନେଗି ସାୱି ମାଟେଙ୍ଗ୍‌ ସନେ । 4 ମାତର୍‌ ତାନି ସେସ୍‌ ଦଣ୍ତ୍‌ କେଇନି ମାରାତି ରସ୍‌ ୱାଜା, ରିଆଙ୍ଗାଁ ଦାରାମାନି କାଣ୍ତା ୱାଜା ଆନାତ୍‌ । 5 ତାନି ପାଦାମ୍‌ ସାନି ତରିନ୍‌ ସନାତ୍‌; ତାନି ପାଦାମ୍‌ ସିଦା ମୁସ୍‌ନି ଗୁଟାଦୁ ଆର୍‌ନାତ୍‌; 6 ଆଦେଙ୍ଗ୍‌ ୱାଦ୍‌ ଜିବନ୍‌ତି ସମାନ୍‌ ସାରି ପୟ୍‌ଏତ୍‌; ତାନି ସାର୍ରିୱିଜୁ ତାନ୍ଦ୍ରା ଆନାତ୍‌, ମାରି ୱାଦ୍‌ ଆକା ନେସ୍‌ଏତ୍‌ ।

7 ଇୟାଉଣ୍ଡିଙ୍ଗ୍‌ ଏ ନା ମାରିନ୍‌କୁ, ନା ମାଟା ୱେଣ୍ଡ୍ରୁ ମାରି ନା ୱେୟୁଦି ମାଟାଦିଙ୍ଗ୍‌ ବାଣାମାଟ୍‌ । 8 ଆୟା ଆଇମାଦି ମାଣାନ୍‌ ନିଜେଦି ସାରି ଆକ ଇଡ୍‌ଦୁ ମାରି ତାନି ଇଲୁଦି ଡେୱା ଲାକ୍‌ତୁ ସଲ୍‌ମାଟ୍‌ । 9 ଜଦି କିତିଙ୍ଗା, ଆନାତ୍‌ ନିନୁ ଆଇ ଲୋକାମାନୁ ନିଜେଦି ମତ୍‌କୁତାନି ମାରି ଦୟାକିଇ ଲୋକାଙ୍ଗ୍‌ ନିଜେଦି ଜିବନ୍‌ ସିନି; 10 ଏମୋ ନେସ୍‌ଇ ଲୋକୁ ନି ସାକ୍ତିଦାନ୍‌ ପୁରା ଆନାର୍‌ ମାରି ନି ପାଣିଦି ପଲ୍‌ ଆଇ ଦେସ୍‌ତି ଇଲୁଦୁ ଇଡାଇ ଆନାତ୍‌; 11 ମାରି ନି ସାନି ବେଡ଼ାଦୁ ଏସ୍ତିୱାଲେ ନି କାଣ୍ଡା ମାରି ମେନ୍ଦଲ୍‌ ବପୁ ସନାତ୍‌, ନିନ୍ ଏମୋ ଆଡ଼୍‌ବାନି, 12 ମାରି ଇନି, "ନାନ୍‌ ଅଜାକିନି ମାଟା ଏଣ୍ଡେସ୍‌ କାଡ଼ିତା ! ମାରି, ନା ମନ୍‌ ଲାଗାଜି କାର୍‌ପ୍‌ନି ମାଟାଦିଙ୍ଗ୍‌ ଏଣ୍ତେସ୍‌ କାଡ଼ିତାତ୍‌ ! 13 ନାନ୍‌ ନିଜେଦି ଗୁରୁରି ମାଟା ମାନାଏତା ମାରି ଆମାକାର୍‌ ନାଙ୍ଗି ସିକିୟା ସିତାର୍‌, ୱାରି ମାଟାଦିଙ୍ଗ୍‌ ୱେନ୍‌ଏତା, 14 ନାନ୍‌ ଲୋକା ଲୋଇ ୱିଜୁ ରାକାମ୍‌ଦି କାସ୍ଟୁଦୁ ଆର୍‌ତା ।"

15 ନିନ୍‌ ନିଜେଦି ଏରୁସାଟିଦାନ୍‌ ଏରୁ ଉଣୁଆ ମାରି ନିଜେଦି କୁଇଦାନ୍‌ ସତି ଏରୁ ଉଣୁଆ । 16 ନି ଉସାଏରୁ ସନିକା ଇନିକା ଆତ୍ରେ ଇନିଙ୍ଗା ଆନିଙ୍ଗାଁ ସାର୍‌ନେ ? ମାରି ଦୁୱାର୍‌ତୁ ଇନିକା ଏରୁ ପୁରୁନ୍‌ଆଜି ସନେ ? 17 ଆକା ଆବ୍‌କା ନିଦି ଆପିତ୍‌, ନି ୱାଲେ ନେସ୍‌ଇ ଲୋକାଦି ଆମାକିତ୍‌ । 18 ନି ଉସାଏରୁ ଦନ୍ୟ ଆପିତ୍‌; ମାରି, ନିନ୍‌ ନିଜେଦି ମୁରୁଲି ବେଡ଼ାଦୁ ଆଡ଼ି ଲାକ୍‌ତୁ ୱେଡ଼ିକା କିଆ । 19 ୱାଦ୍‌ ଲାଡ୍‌ତି ବନ୍‌ଗରିଆ ମାରି ସୁନ୍ଦର୍‌ତି ମାଉ ୱାଜା, ତାନି ବକା ୱିଜୁୱେଡ଼ାଦୁ ନିଙ୍ଗିଁ ୱେଡ଼ିକା କିପିତ୍‌; ମାରି, ତାନି ଜିବନ୍‌ନୋନିମାନୁ ନିନ୍‌ ୱିଜୁ ୱାଲେ ୱେଡ଼ିକା ମାନ୍‌ଆ । 20 ଏ ନା ମାରିନ୍‌, ଦାରିପାଣିକିନି ଆଇମା ଲାକ୍‌ତୁ ନିନ୍‌ ଏନ୍ଦା ସନି ? ମାରି ଆଇ ଲୋକା ଆଡ଼ିଦି ଗାତୁ ଏନ୍ଦା ଗୁର୍‌ନି ? 21 ଏନ୍ଦାଇର୍ରିଙ୍ଗ୍‌ ଲୋକାଦି ୱିଜୁ ସାରି ପ୍ରବୁ ସୁଡ଼ୁଜିନାନ୍‌ ମାରି ୱାନ୍‌ ୱାନି ୱିଜୁ ସାରି ସମାନ୍‌ କିନାନ୍‌ । 22 ସେଇ ଲୋକା ନିଜେଦି ଦସ୍‌ ୱାନିଙ୍ଗ୍‌ ଆସ୍‌ନାତ୍‌, ୱାନ୍‌ ନିଜେଦି ପାପ୍‌ତି ନାସୁଦୁ ତର୍‌ଆନାନ୍‌ । 23 ୱାନ୍‌ କାର୍‌ପିନି ମାଟାଦି ଉଣା ଉଣ୍ତିଙ୍ଗ୍‌ ସାନା ସନାନ୍‌ ମାରି ନିଜେଦି ତାଗ୍‌ଇ ବୁଦି ପିର୍‌ନି ଉଣ୍ତିଙ୍ଗ୍‌ ବାୟା ଆନାନ୍‌ ।