Johane 20

Yesu Unozwilakidza kunaMariya wekuMagadala

11 Koga Mariya wakama kuhhe kwekumbu elila, waka elila akahunama ehohhela mukumbu; 12 wakabona batumwa beNdzimu babili bakambala zwitjena, baligele paka pabigwa ntumbi waYesu, umwe paka pabigwa n’holo umwe paka pabigwa makumbo. 13 Bakati kuwunli, "Mme, molilani?"

Wakati kubali, "Batola He wangu, ngono anditoziba kuti bawumbiganya poni."

14 Wakati eleba ikoku, akatjebuka akabona Yesu alimile, koga waka asingazibe kuti ndiYesu. 15 Yesu wakati kuwunli, "Mme, molilani? Mohaka yani?"

Iye wakakumbulila kuti un’hingi wenhiba, wakati kuwunli, "Tate, hapa kuli kuti mawuntola, mundibudze kuti mawumbiganya poni, ndonowhowuntola."

16 Yesu wakati kuwunli, "Mariya."

Wakatjebuka akati kuwunli netjiHhebheru, "Rabhoni!" (kuleba kuti Ndhiyi).

17 Yesu wakati kuwunli, "Musindibhate, ngobe andanhu ndikayenda pehhugwi kuna Tate, koga yendani kuhama dzangu mudzibudze kuti, nditjayenda pehhugwi kuna Tate bangu ibo bali Tate benyu bo, kuNdzimu wangu bali Ndzimu wenyu bo."

18 Mariya wekuMagadala wakayenda akanobudza badiyiwa eti, "Ndawumbona He!" Wakababudza kuti waleba zwinhu izwezwi kuwunli.