Nnwẹr s'Osenga 4

Nkhọhkha s’Ubinọkpaabyi ọnạngẹ Mosẹs

1 Ma wọ Mosẹs ọpọhn Ubinọkpaabyi bẹ́, "M’nsi yạn, de abẹ nạn khaam itọhng nákhọhma, abẹ udik kwaam nábạra achera, aben bẹ́, Ọvaar Ubinọkpaabyi khọ núyina okhebha?"

2 Ma wọ, Ọvaar Ubinọkpaabyi ọbạbh-ẹ bẹ́, "Mbạng vọ atim ma ọbọhk?"

Mosẹs ubhina bẹ́, "Uchikwura."

3 Ọvaar Ubinọkpaabyi oben-ẹ bẹ́, "Bhạrẹ chẹ ma isisek."

Mosẹs ọbhạrẹ uchikwura nwọ k’isisek, awẹ ọbhạkhẹ ijọhk, Mosẹs ọrạbh urik. 4 Ma wọ, Ọvaar Ubinọkpaabyi oben-ẹ bẹ́, "Nemi ọbọhk kwọ vạkha ijọhk nnọ k’ẹsạra." Ma o, Mosẹs onemi ọbọhk ọvạkha ijọhk nnọ k’ẹsạra, ijọhk n’ibhạkhẹ adạkhẹ uchikwura kakhẹ k’ọbọhk. 5 Ọvaar Ubinọkpaabyi oben bẹ́, "Si oche ngwọ, ọfha abẹ achera bẹ́, Ọvaar Ubinọkpaabyi, kw’ode Ubinọkpaabyi kw’ab’otte pabẹ, Abraham, ọttạra Isaak, ọttạra Jekọb akpobh, kk’abẹ uyina."

6 Ma o, Ọvaar Ubinọkpaabyi oben bẹ́, "Ge ọbọhk kwọ k’mkpamma k’ọnọhma-baba kwọ ẹtaanga." Mosẹs usi oche ngwọ. Masẹ n’ọrạbh ọbọhk, ọbọhk n’usi okpokhora, n’uwuru bẹ gwaaang, masẹ arạngta. 7 Ọvaar Ubinọkpaabyi oben bẹ́, "Bạra kpa dạkhẹ nnạm ge ọbọhk kwọ k’mkpamma k’ọnọhma-baba kwọ ẹtaanga." Mosẹs usi oche ngwọ. Masẹ n’ọrạbh ọbọhk o, ọbọhk n’ọkpa nnạm ode adạkhẹ obengana.

8 Ma wọ, Ọvaar Ubinọkpaabyi obeni bẹ́, "De abẹ nạn khọ itọhng nákhọhma, abẹ abạra akhaanga ẹkhọhkha njọ ch’ichi eden, nudusi abẹ akk-okke achera njọ ch’ettong mfa. 9 Okhenka, de abẹ nạn khọ itọhng náchera akhọhmọ, abẹ abạra akhaanga nkhọhkha nnọ mfa, sọhng ata akhaabha asi k’ọraanga kw’Nile, kwu abyenga k’igbin. Asi mbọ p’akhaabh k’ọraanga m’ẹbhạkhẹ isẹ ma isisek."

10 Mosẹs oben Ọvaar Ubinọkpaabyi bẹ́, "O Ọvaar Ubinọkpaabyi, ọma asong ma bẹ́, tạma k’ẹtạma, tạrr ukpira s’n’akpaak ọtọhmnạng kwọ idik nna, amma idik-kpakha kạ́nkke, amma n’nyek ẹbang."

11 Ọvaar Ubinọkpaabyi n’oben-ẹ bẹ́, "Anẹ wọ ọnạngẹ oyokhanạng ẹmma ch’n’utima ọkpaak udik? Anẹ wọ n’usi oyokhanạng ọkpa itọhng, ọbạra usi-ẹ ọkpa ẹmma? Anẹ wọ n’usi oyokhanạng ose iyaan, ọbạra usi-ẹ ọkpa achen? Amma Ọvaar Ubinọkpaabyi sạng o? 12 Nemeden sọhng mantọmma; amma m’nkkaan-ọ k’ọkpaakhadik, mbạra mkpebh-ọ ukhira kw’m’akpaak atena."

13 Okhenka, Mosẹs oben bẹ́, "O Ọvaar Ubinọkpaabyi, totokhạn, wạra m’atọhm ọnạng ọdwạkh-ọdwạk."

14 Ma o, Ọvaar Ubinọkpaabyi ọdwạkh-ẹ Mosẹs abẹ, n’obeni bẹ́, "Nnwakka Aarọn kw’ubin k’ẹnạmma ch’Lẹvi sạng uning ma? Amma nsong ma bẹ́, okke ọkpaakhadik mororo. Ẹma oyeni ukwuma kha eden bẹ́, ukwu okhebh-ọ, ettem m’erebh-ẹ k’okpe kw’m’usiọ-ọ. 15 M’atekh-ẹ udik kw’m’ọkpaak. M’ntor bạnga anạng afa k’idik-kpaakha, mbạra ntọhn-ọ bạnga oche kw’abạnga m’asi. 16 Aarọn wọ m’ọkpaak anạng mbọ idik kakhọ k’echo. Ẹma m’ode ọkpaakh-ọtọhnga kwọ, ọma n’abạra ade masẹ Ubinọkpaabyi anạng-ẹ. 17 M’akhenka atạkha uchikwura kwọ atima k’ọbọhk, ọfha n’atima chẹ asi nkhọhkha s’m’ipe anạng ifor."

Mosẹs ọkpa nnạm k’Ijip

18 Ma wọ, Mosẹs ọkpa nnạm k’Jẹtro, kw’ode ọnyẹ kwẹ oben-ẹ bẹ́, "Aro, totokhạn, tte mkpa nnạm k’anạng paam k’Ijip, nta nse de abẹ atim akkeri ẹmma kha o."

Jẹtro ọbẹ́, "Phyaa, do senga."

19 Wa Ọvaar Ubinọkpaabyi kk’Mosẹs obena k’Midiyan bẹ́, "Kpa nnạm k’Ijip, khiri anạng p’uwa n’aben bẹ́ afhọ-ọ, kk’apua. 20 Ma wọ, Mosẹs ọtạk ikwanạng kwẹ, ọttạra ajunungva pẹ ọnạna k’ẹnyạnyaang, ọbạra ọtạkha uchikwura kw’Ubinọkpaabyi obeni bẹ́, utima k’ọbọhk, ubina osenga ọkpa nnạm k’Ijip.

21 Ọvaar Ubinọkpaabyi oben Mosẹs bẹ́, "Masẹ m’akpa nnạm k’Ijip, m’asi ikkukkona-dik nnọ phyibh s’kk’ọ ẹfa nnạnga bẹ́, asi k’ititikha s’Phero. Okhenka, amma m’nsi Phero ọbạr ettem, ufhum bẹ́, otte anạng paam ọbọhk abẹ afona. 22 Ma wọ, ben Phero bẹ́, ‘Ọvaar Ubinọkpaabyi obeni bẹ́, Israẹl wọ ode ocheden-junungnwa kwaam. 23 Amma mben-ọ bẹ́, "Tte nnwa kwaam ọbọhk ofona, ọta okpobh-m." Okhenka, ọma afhumu bẹ́, attẹ-ẹ ọbọhk ofona, ma o, m’mfhọ ochedennwa kwọ.’ "

24 Wa Ọvaar Ubinọkpaabyi uyini Mosẹs abẹ k’ibyi s’utim anạng pẹ ubhing, n’ọkhạmọ bẹ́, ọfhẹ-ẹ. 25 Okhenka, Zipọra kw’ode ikwanạng kw’Mosẹs, ọtạk ẹta ch’ẹjaabhẹ masẹ imaana, usi nnwa kwẹ ọkpọkkrọkkọ, ọtạkha ẹkpakpa ch’kk’ọkpaara utwu Mosẹs k’mfhokpatwạkhọ, oben bẹ́, "K’udik ọkka, asengi isẹ nna asẹ ade udim kwaam." 26 Ma wọ Ọvaar Ubinọkpaabyi otte Mosẹs ọbọhk uruk akpen. Ma okpe ngwọ wọ kw’Zipora obeni bẹ́, "Udim kwaam kw’oseng k’isẹ, ukwuru ọkpọkkrọkkọ."

27 Wa Ọvaar Ubinọkpaabyi obeni Aarọn bẹ́, "Sọhng ata akhebha Mosẹs k’ibyi s’owor." Ma wọ ofon okhebha Mosẹs k’okpecho kw’Ubinọkpaabyi uning, ọbaakh-ẹ. 28 Ma o, Mosẹs ọkpaak Aarọn udik kwidede kw’Ọvaar Ubinọkpaabyi kk’ẹ ọkpaakha bẹ́, ọkpaakh-ẹ. Wa ọbạra ọkpaakh-ẹ udik kwidede otena k’nkhọhkha s’ipe anạng ifor s’Ọvaar Ubinọkpaabyi ọtọhn-ẹ bẹ́, usi.

29 Ma wọ wa Mosẹs ọttạra Aarọn ata ayeri adennạng p’anạng p’Israẹl phyibh atobha. 30 Wa Aarọn ọtạk udik kwidede kw’Ọvaar Ubinọkpaabyi kk’Mosẹs ọkpaakha, ọkpaak anạng p’Israẹl, ọbạra usi nkhọhkha s’ipe anạng ifor k’anạng mbọ k’ititikha. 31 Wa adennạng mbọ kk’achera. Masẹ anạng mbọ abhaang bẹ́, Ọvaar Ubinọkpaabyi kk’irem-khira s’anạng p’Israẹl aning usia, ọttạra bẹ́, n’ọkhaama ẹkka otena bẹ abẹ, abẹ atwunga ncho anạng-ẹ ikpukpobha.