Atos 12

Abam Dzak, atyel Piɛɛl me bwal

1 Me lio olɔ, ɔ̃kwɛn Elode*12.1 Elode áli muaan-nkyel a Elode Antipas, bvool áli ɔ̃tiɔɔl a Elode wu Ɔ̃nɛn. obvi baal b’Ebvɔɔn bakyɛ mpal otuaal. 2 Ndɛ obam Dzak, wu muaan-ngoo a Dzaã, m’epwel. 3 Ŋ’emwɛn ndɛ kwɛn ndɔɔ oyɔ esi Ayuda esɛ, ndɛ hɛ̃ otam Piɛɛl osiin. Éli me lio li pfuun li adza amampa bɛn k’ali ye lebviil wɛ. 4 Ke mbee a ŋ’esiin Elode Piɛɛl atyel me bwal, ndɛ otam ambwel-mbwel ndɛ okiaal. Ambwel-mbwel obɔ, ndɛ okab bɔ m’ãnkel ãnã, nkel bwɛn a nkel m’ambwel-mbwel anã. Ndɛ áli y’ãtsam m’atsiil ndɔɔ a ndɛ ke nkwel a baal, ke mbee a Pfuun li Onduru. 5 Obobɔ, Piɛɛl áli m’okiaal onse bwal. Kɛn Ebvɔɔn ékebuɛɛn Nziã me ndɔɔ a ndɛ, owuun wɛ.

Piɛɛl opal onse bwal

6 Me tsia wɛn ela esiool Elode ákaatsiil ndɔɔ a ndɛ ke nkwel a baal, ndɛ wu Piɛɛl áli me twal mpɛ̃-a-mpɛ̃ ambwel-mbwel buaal. Ákuru ndɛ ebwal m’ãmpaa mbuaal. Ambwel-mbwel bakyɛ áli ke nkwel edzoo e nzɔ a bwal me ndɔɔ yi akiaal yɔ. 7 Enseel oŋɔ̃, ãnzwel ã Mfam Nziã ngamɔ̃ ãpal ola ndɛ, mbaa eyɛɛl bwal. Ãnzwel ãbɛɛl Piɛɛl m’ebɛɛ, m’oseel o ndɛ me twal. Mɔ̃ ãyɛɛn ndɛ ndiri: «Tɛɛn bam tswa-a-tswa!» Ãmpaa m’ãli me mviɔɔl ɛ̃ ndɛ ãbvi me nsie. 8 Ãnzwel ãlieel ndɛ bubu: «Laal ɔ̃sii me luu, laal asimpal.» Ndɛ osi obobɔ. Ãnzwel ãyɛɛn ndɛ ndiri: «Laal ekɔ e yɛ ki abendɔɔl ke ywel, oŋɔ̃ nɔɔn a mɛ̃.» 9 Piɛɛl opal onse ngwel-a-nzɔ a bwal, bu aluɛɛn a mɔ̃. Ndɛ k’ákeyɛɛ kwɛn ãndɔɔ m’ékesa ãnzwel ãli mɔ̃-a-mɔ̃ wɛ. Ndɛ áketsam ndiri éli nduaal. 10 Ãnzwel ye Piɛɛl anduru nkel a ambwel-mbwel yi ɛ̃kwel, bvool yi mbuaal, bɔ atɔ k’edzoo e nzɔ a bwal ki m’ãbvieel, ki apal onse bviil. Kyɛ edzweel nzuru kyam-a-kyam ke nkwel a bɔ. Bɔ apal, bvool asam onse bal-bal ngɔmɔ̃. Enseel oŋɔ̃, ãnzwel ãsiil ndɛ.

11 Obobɔ, Piɛɛl ãtsam m’ombuul ãyebvool, ndɛ oyɛɛn ndiri: «Meba ŋã, mɛ̃ ŋe mwɛn taa-taa kwɛn Mfam oyuɔɔl ãnzwel ã ndɛ, ãyebvuul mɛ̃ me kuɔɔl ki Elode, y’obi bam bueel b’ekedzii Ayuda mɛ̃ osa.»

12 Ŋ’ebɔɔ Piɛɛl otsɛn o ndɔɔ oyɔ, ndɛ oyɛn nzɔ a Mali, wu ngoo a Dzaã, wu abeta hɛ̃ me Maak. Oŋɔ̃, baal bibi ábvɔɔn, bvool ákebuɛɛn. 13 Piɛɛl obɛɛl nzɔ, ɔ̃sal ngɔmɔ̃ wu ɔ̃kaal, wɛn nkuũ Lodes osyel tsotsoo, me ndɔɔ yi ayweel. 14 Ndɛ ayeyɛɛ kwɛn oyɔ nkii a Piɛɛl, onse esɛ, ndɛ kɛn k’adzweel nzɔ wɛ, otsuu ntiin oyewa bakyɛ nsia ndiri Piɛɛl oli ke nkwel-a-nzi ku. 15 Bɔ abveel ndɛ bubu: «Yɛ ye laa li!» Ndɛ owɛɛl mpɛn m’oliaal o bɔ ndiri eli kɛn obobɔ. Bɔ bu abveel ndiri: «Owɛɛl ãnzwel ã ndɛ!» 16 Kwɛn ŋɛn Piɛɛl abebɛɛl kɛn obɛɛl. Bɔ adzweel nzɔ, amwɛn ndɛ, bu akam bam bibi. 17 Piɛɛl oyɛɛn ye bɔ m’ɔ̃liɛɛn kwɛn bɔ akal pi. Ndɛ olieel bɔ emfa ki epaal Mfam ndɛ onse bwal. Ndɛ hɛ̃ olieel bɔ ndiri: «Eyewa nsia oyɔ ola Dzak*12.17 Dzak wu, wu mvɔɔl a Yeso. bvool ol’andoo.» Ke mbee oŋɔ̃, ndɛ opal oyɛn mboo nkyam.

18 Ŋ’etsi bviil, tsungaa obvi onse ambwel-mbwel, ndiri: «Ke Piɛɛl kwɛn ayɛn?» 19 Elode otam ndɛ obii, kɛn a bɔ k’abɔɔ ndɛ wɛ. Ŋ’eman Elode ambwel-mbwel b’ákekiaal ndɛ ɛ̃mfuul ofuul, ndɛ otam bɔ obam. Ke mbee oŋɔ̃, ndɛ ombal nsie yi Yude, oyɛn bviil li Sedzale. Okɔ, ndɛ osi ãtsoo ke kwɛ.

Epfu li Elode

20 Ŋ’esa oŋɔ̃, Elode áli y’eka ye baal a Tiil ye ba Sidɔ̃. Bɔ akuru ɔ̃dzi, bu ayetal ndɛ. Bɔ abwel me Balasitos wu abetal ãndɔɔ ã nzɔ a ndɛ, me ndɔɔ yi abveel ondoo ye bɔ. Ke ngwel wɛ, bvi-odza bvi ɛ̃kiri ɛ̃ bɔ ékefa ɔ̃kiri a ndɛ wu Elode. 21 Me tsoo li ɔ̃sɛɛn, Elode olaal ekɔ e ndɛ bvi okwɛn, obvi nsɛn nkal a kiri e ndɛ li okwɛn, bu ayɛɛn ye bɔ ke nkwel a baal bueel. 22 Baal abvi obiool bubu: «Yi-bu k’ebekal nkii a mbuul wɛ, eyii yi nziã ngɔmɔ̃ bubu!» 23 Enseel oŋɔ̃, ãnzwel ã Mfam ãpfel ndɛ eluɔ, ke ngwel wɛ ndɛ okiool dzuun li akaawa Nziã. Ɛ̃sɔ ɛ̃dzi ndɛ mwiĩ-a-mwiĩ, ndɛ bu atsuul mwiĩ.

24 Kɛn Endɔɔ e Mfam éketsɔɔn bvool ékeyi nkwel. 25 Me b’otal Balanabas ye Sol, ke mbee a ŋ’eman bɔ ɔ̃sal a bɔ me ndɔɔ a Yelusalem, bɔ abvool. M’oyi, bɔ abiri Dzaã wu abeta me Maak.