1 Onse Ebvɔɔn li Antioswe, éli y’aliaal-ɛ̃kiɛɛn a Nziã, y’atee ba: Balanabas, ye Simehɔ̃ wu abeta me Wa pi, ye Lusiyus wa Silɛn, ye Sol, ye Manayɛn. Ndɛ ákwel mboo mɔ̃ y’Elode, wɛn tsɔɔn áli mfam wa nsie yi Ngalile. 2 Tsoo ngelemɔ̃, ŋ’ékelweel bɔ Mfam bvool ákesa ãbuɛɛn mã me nzal, Ɔ̃fel wu Ɔ̃nsensal oyɛɛn bɔ ndiri: «Esuul mɛ̃ Balanabas ye Sol me pyɛ, kwɛn bɔ asa ɔ̃sal wu eti mɛ̃ bɔ mbel.» 3 Obobɔ, ke mbee a ŋ’esi bɔ ãbuɛɛn mã me nzal, bɔ andɔɔl Balanabas ye Sol mviɔɔl, bu asuul bɔ ayɛn.

4 Obobɔ, Ɔ̃fel wu Ɔ̃nsensal otam Balanabas ye Sol ontam. Bɔ ayɛn bviil li Selesi. Oŋɔ̃, bɔ asam onse ãsua, bu ayɛn esanga ki Swipele. 5 Ŋ’etɔ bɔ bviil li Salamine, bɔ abvi otee onse ãnzɔ m’ãbuɛɛn m’Ayuda. Dzaã-Maak ákewuaal a bɔ.

6 Ke mbee oŋɔ̃, bɔ atsiil nsie yueel yi Swipele, bu atɔ bviil li Pafos. Okɔ, bɔ amwɛn Ɔ̃yuda ngɔmɔ̃ wu ata me Baal-Yeso. Ndɛ áli ngaa wu ákepfuru ndiri ndɛ oli ɔ̃liaal-ɛ̃kiɛɛn a Nziã. 7 Ndɛ ákekal ola Sɛɛdzus Polus, wu nga-ãyal, wu mfam wa nsie oyɔ. Mfam ondɛ otam Balanabas ye Sol mbel ota, me ndɔɔ yɛn ndɛ odzii k’ayoo Endɔɔ e Nziã. 8 Kɛn a Baal-Yeso, wu abeta m’Elimas m’ɔ̃nywã wa Ngelek, ákekii Balanabas ye Sol, bvool ákesa kwɛn mfam ondɛ abee Endɔɔ e Nziã okiool.

9 Obobɔ, Sol wu abeta hɛ̃ me Pool oluul m’Ɔ̃fel wu Ɔ̃nsensal, bu alɔ Elimas etɔ. 10 Ndɛ olieel ndɛ bubu: «Yɛ wu nga-ãyal ãbi, yɛ wu emfuru-baal, yɛ wu muaan a Ɔ̃pfu! Yɛ wu ɔ̃taal a ãndɔɔ mbueel mã dzu, ãnkuul ã Mfam ãli dzu, yɛ k’àyɔɔl k’akii baal mɔ̃ onɔɔn wɛ? 11 Meba ŋã, tal: Mfam àbɛɛl yɛ, yɛ mviil ãkwa, lio ngelemɔ̃ yɛ k’amwɛn mwiĩ wɛ.» Kɛn a me lio alili, Elimas mviil ãkwi, oyii akɛɛn kɛn okɛɛn, m’obii o wu abiri ndɛ. 12 Ŋ’emwɛn mfam a nsie b’obwel, ndɛ oyii ɔ̃kiool, ke ngwel wɛ ndɛ okam bibi m’ãtee m’ãtal Mfam.

13 Pool ye b’ákedzuu ye ndɛ awel ãsua ke Pafos, bu ayɛn bviil li Pɛɛdze k’ɔ̃kiri wa Pamfili. Dzaã-Maak osiil bɔ, obvool Yelusalem. 14 Bɔ ambal Pɛɛdze, ayɛn bviil li Antioswe k’ɔ̃kiri wa Pisidi.

Me tsoo li saba, bɔ asam onse nzɔ a ãbuɛɛn, bu abvi nsɛn. 15 Ŋ’aman ɔ̃nkaan wu ãngel ye wu aliaal-ɛ̃kiɛɛn a Nziã otsiɔ, amfam a nzɔ a ãbuɛɛn ayuɔɔl mbuul oyeyɛɛn bɔ ndiri: «Andoo, okɛɛn byɛ eli y’ãyɛɛn m’ãwa baal mpɛn, oŋɔ̃ ewal oyɛɛn.» 16 Pool otɛɛn, oyɛɛn m’ɔ̃liɛɛn kwɛn baal abva ɔ̃lii, ndɛ olieel bubu: «Afi-Isalayel, ye byɛ bueel b’ebelweel Nziã, eyoo! 17 Nziã a yam li Isalayel ásueel ankiɔɔn a bia-byɛ. Ndɛ ásuul bɔ álɔɔ bam bibi ŋ’éli bɔ k’Edzipito. Ke mbee oŋɔ̃, ndɛ ápaal bɔ onse ɔ̃kiri ondɛ me waan e ndɛ. 18 Ndɛ áliil bɔ mvel onse ab’ãku-ãna (40) k’ɔ̃baan wa kɛɛ-kɛɛ. 19 Ke mbee oŋɔ̃, ndɛ ábam ãyam ã baal nsiaan ke nsie yi Kanaan, áwɛɛl nsie a bɔ, áwi yɔ baal a ndɛ, kwɛn yɔ ekal yi bɔ. 20 Ãndɔɔ omɔ̃ mbueel ã́si mvel nku-a-nku ɛ̃nkam ɛ̃nã y’ãku-ãtaan (450). Ke mbee oŋɔ̃, ndɛ áwi bɔ ambiri*13.20 Ɛ̃nkaan ɛ̃ Nziã mikyɛ ɛ̃ti ambiri m’antwel. tiil lio li Samiɛɛn wu ɔ̃liaal-ɛ̃kiɛɛn a Nziã.

21 Etɔ oŋɔ̃, ankiɔɔn a bee asɔɔ ɔ̃kwɛn. Nziã owi bɔ Sahul wu muaan a Kis, mbuul wa yam li Bɛnzamɛ̃. Ndɛ osi mvel ãku-ãna (40) m’okwɛn. 22 Kɛn a Nziã oyiri ndɛ wu Sahul. Ke mbee oŋɔ̃, ndɛ osuul David ɔ̃kwɛn a bɔ. Me ndɔɔ a ndɛ wu David, Nziã oyɛɛn bubu: "Mɛ̃ mbɔɔ David, muaan a Dzese. Ndɛ oli mbuul wu asa mɛ̃ esɛ, ndɛ akieel asa ãndɔɔ mam mbueel me nzii mɛ̃." 23 Eli onse yam e David ku épaal Nziã Yeso wu Ɔ̃mvuul a Isalayel, m’emfa ki éwi ndɛ lɔɔ. 24 Ye k’eya Yeso, Dzaã átee baal bam bueel b’Isalayel k’ayewal opongo b’osuo kwɛn bɔ akaal ɛ̃kwal. 25 Ŋ’étɔ Dzaã ke ntɔ a ɔ̃sal a ndɛ, ndɛ áyɛɛn ndiri: "M’ãtsam ã byɛ, mɛ̃ nã ndi? Mɛ̃ ke ndi Mãsia wu ebekiaal byɛ wɛ! Kɛn a mbuul wu àya, mɛ̃ ke mvaan m’odzuul b’asimpal a ndɛ wɛ."

26 Baan-ngoo a mɛ̃ ba yam li Abalayam, ye byɛ b’ebelweel Nziã, eli ola bia-byɛ k’áyuɔɔl Endɔɔ li ebvuul baal li. 27 Kɛn a baal a Yelusalem y’amfam a bɔ k’áyɛɛ ndiri Yeso oli Ɔ̃mvuul ondɛ wɛ. Ãndɔɔ m’ékel aliaal-ɛ̃kiɛɛn a Nziã, m’abetsiɔ saba bwɛn a saba, bɔ hɛ̃ k’abɔɔ mɔ̃ otsɛn wɛ. Kɛn a bɔ asi ãndɔɔ m’élieel aliaal-ɛ̃kiɛɛn omɔ̃, ŋ’éwi bɔ Yeso etumbu. 28 Onkyam ŋɛn bɔ k’ábɔɔ elyal ki abam ndɛ wɛ, bɔ asɔɔ ola Pilate ndiri awa ndɛ etumbu ki epfu. 29 Ke mbee a ŋ’esi bɔ mbueel m’ákel me ndɔɔ a Yeso, bɔ akuul ndɛ ke ywel ɔ̃ti, bu alɔ ndɛ onse mpiɛɛn. 30 Kɛn a Nziã oseel ndɛ onse b’ákwi-ákwi! 31 Ke mbee oŋɔ̃, ãtsoo bibi Yeso osuo nzuru ola baal b’áfi Ngalile ye ndɛ tiil Yelusalem. Meba ŋã, baal obɔ b’ayɛɛn me ndɔɔ a ndɛ ke nkwel a baal. 32 Bee bam ŋ’ewa byɛ Nsia yi ngesɛ wɛn: Lɔɔ li éwi Nziã ankiɔɔn a bia-byɛ, 33 ndɛ osi lɔ bam ekoo me ndɔɔ a bia-byɛ be baan a bɔ, ŋ’éseel ndɛ Yeso m’epfu, onge b’ákel onse ɔ̃nkaan wu Ãnzii wa mviaal, ndiri:

"Yɛ li Muaan a mɛ̃,

mɛ̃ wu mburu yɛ nonɔ̃ ŋã."✝13.33 Ãnz 2.7

34 Nziã áseel Yeso onse b’ákwi-ákwi, m’emfa okyɛ nzuru a ndɛ k’ébwel wɛ. Oyɔ ndɔɔ yi éyɛɛn ndɛ tsɔɔn ndiri:

"Mɛ̃ ekieel ewa byɛ eluɔ bvi ɔ̃nsensal bvi élieel mɛ̃ David,

eluɔ bvi dzu, bvi ebvaan m’okiool."✝13.34 Edz 55.3

35 Ke mboo yinkyɛ bvool áyɛɛn bubu:

"Yɛ k’ayɔɔl mbuul a yɛ wu Ɔ̃nsensal abwal wɛ."✝13.35 Ãnz 16.10

36 Kɛn a m’omwiĩ o David, ndɛ áli ɔ̃sal a Nziã. Ndɛ ási m’ékedzii Nziã. Ke mbee oŋɔ̃, ndɛ ákwi, ádziool ndɛ mboo ngamɔ̃ y’ankiɔɔn a ndɛ. Ndɛ ábwel. 37 Kɛn a mbuul wu éseel Nziã k’ábwel wɛ. 38 Obobɔ, andoo a mɛ̃, ebvaan byɛ eyɛɛ bubu: Eli me nkuul a Yeso kwɛn Nziã abedzeel ãbi ã byɛ, oyɔ ndɔɔ yi eyɛɛn bee byɛ. Kɛn odzeel b’ãbi obɔ, byɛ k’ekoo k’ebɔɔ bɔ m’okiaal o ngel a Moyize wɛ. 39 Me nkuul a Yeso, mbuul bwɛn a mbuul wu akiool, Nziã àsuul ndɛ mbuul wa dzu. 40 Obobɔ, ekal y’onkyab kwɛn m’élieel aliaal-ɛ̃kiɛɛn a Nziã mã, ãbee ola byɛ oya:

41 "Etal, byɛ ba y’ondɛɛl o nzuru!

Ekam bvool edziɔɔn!

Ke ngwel wɛ, mɛ̃ èsa ndɔɔ yi ɛ̃kam me lio e byɛ,

ndɔɔ yɛn onkyam ŋ’ati byɛ yɔ ɔ̃sam, byɛ k’ekoo k’ekiool bam wɛ!"»✝13.41 Aba 1.5

42 Ŋ’epal Pool ye Balanabas onse nzɔ a ãbuɛɛn, aluɔɔn bɔ k’ayeyɛɛn ãndɔɔ mãmã me saba wu ɔ̃nɔɔn. 43 Ŋ’efi obvɔɔn, Ayuda bibi ye baal bɛn k’Ayuda wɛ b’abelweel Nziã aluɛɛn a Pool ye Balanabas. Onse ɔ̃sam a bɔ, Pool bwɛn a Balanabas ákewa bɔ luo k’akuru nzuru me nyiĩ a Nziã.

44 Etɔ me tsoo e saba wu ɔ̃nɔɔn, ol’eyɛɛn wɛn baal a bviil bueel, abvɔɔn me ndɔɔ yi ayoo Endɔɔ e Mfam. 45 Ŋ’emwɛn Ayuda ɔ̃bɔbɔ a baal, bɔ ayoo ɔ̃kwal-nsɔɔ, abvi ãndɔɔ m’ékeyɛɛn Pool enkyam ota, bvool abvi ndɛ ɛ̃tswɛ oswel. 46 Kɛn a Pool ye Balanabas ayɛɛn bɔ y’ãŋã ndiri: «Ŋ’ɛ̃kwel, al’ebvaan kwɛn atee Endɔɔ e Nziã ola byɛ b’Ayuda. Onge bɛn byam ebee lɔ bvool emwɛn kwɛn byɛ k’ebvaan m’obɔɔ b’elaã li ɔ̃bu nkal ɔ̃bu wɛ, bee ŋ’esɔɔn baal bɛn k’ali Ayuda wɛ. 47 Ke ngwel wɛ, Mfam atam bee ndiri:

"Mɛ̃ nsuul yɛ mwiĩ wu àyɛɛl ɛ̃kiri,

me ndɔɔ yi abiri obvuul tiil ke ntɔ a ɔ̃kiri✝13.47 Edz 49.6."»

48 Ŋ’eyoo baal bɛn k’Ayuda wɛ ãndɔɔ omɔ̃, bɔ asia mpaa, bu abvi Endɔɔ e Mfam olweel, ye baal bam bueel b’ésueel Nziã me ndɔɔ yi abɔɔ elaã li ɔ̃bu, bɔ bu ayii akiool. 49 Endɔɔ e Mfam etsɔɔn m’etswi e nsie ki Pisidi kyam kieel. 50 Kɛn Ayuda asi nsiɔɔl ol’akaal ba bvɛɛ b’abebuɛɛn Nziã a Ayuda, ye baal b’anɛn ba bviil olɔ. Obobɔ, bɔ atsɛɛn baal k’atuaal Pool ye Balanabas mpal, bvool atswɛɛl bɔ m’etswi e nsie e bɔ. 51 Pool ye Balanabas akweel ɔ̃fel wu áli me ntaã e bɔ*13.51 Okweel b’ɔ̃fel wu áli me ntaã e bɔ, ŋ’esuo kwɛn ndɔɔ yi esi baal obɔ eli mbi-mbi. Yeso mbuul wu áyɛɛn atam a ndɛ k’asa obobɔ (Luk 10.10-11)., bu ayɛn bviil li Ikonihum. 52 Me b’otal ayio b’alili k’Antioswe, oŋɔ̃ bɔ aluul m’esɛ, aluul m’Ɔ̃fel wu Ɔ̃nsensal hɛ̃.