Apocalipse 14

Meurünna nah 144,000

1 Pecai Ih piegai, ge Zion Deutu ga Meurünna sap bam. Pecu ngngwa mina 144,000 pe zi nah pe Pei zi penui sipie gage raulwe bam. 2 Nah Ih tinggim gade dui kekiee ge kwa nzwa*14:2 Dui kekiee ge kwa nzwa: Dui kedi kwa nzwa, cide pe kwa ci zu eh tinggim gade kideu ga kecang siu cang. nah tingceu süt kecu kwa nzwa siu. Ih makwa kesiude leibung kekwame penui leibung kwa kecu kwa nzwa.✝14:2 Eze. 43:2 3 Nah penui hegwangbam nah ringkela kaunedung mdai nah hangkiamedung dwa gade lei keheci ge tei. Lei cide kideu gade rikelumedung 144,000 de gwale migede tei cilu ma. 4 Aidungde mipui de ngngwa eh penuikatei penuide tei heradi kemakmedung, penui au penuide kai mci kelume kecune. Penui, Meurünna kemie leu ga sui kelamedung. Aidungde mina kakgade, Tinggwang nah Meurünna ziemne petsi raitubedung tei eh rikelumedung da. 5 Penui mui gade kenret gede ngaulu ma, kedanemene penui au kemau kegahne.*Kesa kehegwa laisiudung ga, Tinggwang hegwangbam dwaga, de kaisi.

Tinggimgwame Hangcum

6 Pecai Ih tinggimgwame kedage ting sum ga limla eh ngau, pe da kideu ga kelunghme ziemne kelungta kela samliakeyi de ranglia beu kera de la—heleuh, hepui, helet, nah mina leune dage. 7 Pa sahbak eh ranggai, "Tinggwang de hinglu nah pecu kendu peulo. Kedanemene pa mina tutiak kera ting gwang bamdi delu. Tinggim, kideu, jaaidi, nah duirwakdung tei kegaibe de reca lulo."

8 Tinggimgwame kedage, pekenabe, pecai de rang eh, "Kau dida, kau dida Babylon kedi de, heleuhdung pelane de peu pe kemmha zau gade sak kera penui lung tei kebeube de."

9 Tinggimgwame kedage, pekecumbe, penai caide marang sahbak eh ranggai, "Keheibe de teikuu de nah pe mie de reca cai, nah pe sipie mede peba ga kaugiak de giakgai cai, 10 pa Tinggwang lunghop zau gade sakzie, pe rata piak gage zau haidi kemakpe ruigai kelude. Pecu kemci tinggimgwame nah Meurünna dwagade mi nah sulfur le tei keherei zie.✝14:10 Isa. 51:17 11 Penuide tei keherei kecu mika de ka cuh bammui dizie, nah teikuu aide nah pe mie de reca kelame nah pezi kaugiak giakteu kelame da tingmui mede tingba dega kemtak gah. 12 Aide kemcimedung, Tinggwang sam kenzaimedung nah Jisu de kenlummedung de lia lulo kecu da."

13 Cidau tinggim gade makwa ge, "Aide raulu: Cu gade, ketsaime, Rampaube dage tsaigai kelume samlam pungtu," de eh kerang Ih siu. Ge Tinggwang Rabe rang eh, "Yeo, iciu eh penui bata gade penui mtak luzie, kedanemene penui bata tei kegai de penuida ladi delu."

Kideube luhlüt

14 Pecai Ih piegai, ge hemwa keha ge bam. Hemwa ga Mina Nabe kenzwa ge ntum bam. Pa pe peu ga kecak peurwa ge la nah pe ba ga tangkane pemui keyi ge la.✝14:14 Dan. 10:16 15 Pecai tinggimgwame kedage kerecaki gade mpetlwe hemwa ga kebambe de sahbak eh qugai: "N tangkane keulwe rum cu. Kedanemene rum kerating gwang bam dida, kideube luhlüt meu dida." 16 Pecai hemwa ga kebambe pe tangkane kideu reu gage keziep gai, ge kideube rumlu.

17 Pecai tinggimgwame kedage tinggim ga kebam kerecaki gade tet pet; pe da de tangkane pemui keyi ge bam. 18 Nah tinggimgwame kedage, mi reu kengkieng kebambe, keru recabam gade tet pet. Pa tangkane pemui keyi de kebambe dage sahbak eh ranggai, "N tangkane pemui keyide keulwe kideube kube gurie gade kubetsi buidung de hekwalu, kedanemene cu au penui kubetsidung meudi delu." 19 Cine tinggimgwabe pe tangkane kideu gage keziep gai eh kideu ga kubetsi getlu. Pa cide kelien pwa Tinggwang lunghop zauniakbam kedi de gage kaidi. 20 Pecai namdi gwale zaukeniakbam gade kubetsi tuigai, nah zaukeniakbam gade hejai hekwen kangria*14:20 Hekwen kangria: metre kena cok ge huge, nah 1,600 stadia*14:20 mile 184 ge lwapet.✝14:20 Isa. 63:3