Keuliakegai 19

Hekwen keha reu cwakelabe

11 Pecai Ih tinggim ngkei eh ngau, nah cika hekwen keha ge bam. Pereu ga cwakelabe de kesamsang nah kesangbe*19:11 Kesangbe: Jisu lie qu, nah pa kesamsang teu hetutiak nah regila.✝19:11 Lei. 96:13 12 Pe miak au miheu nzwa, nah pe peu ga hegwangpeurwadung kekiee ge bam. Pa hezi ge pe peu ga rau pungla, cide pa gwale migede ci ma.✝19:12 Keu. 19:16 13 Pa pai hejai gage mpung keluge bahla, nah pecu qu kela zi cai Tinggwang Sambe. 14 Tinggim reugwamedung langcim pai keyi, keha nah mcigi ge bahlwe hekwendung keha gade pecai suila. 15 Pemui gade kingtie pemui keyi ge pet, iciu eh pa cide teu heleuhdung de bilu kerane, nah pa hegeutie ge teu penui reu dizie. Pa Ngkiengtube Tinggwang lunghop kesia zauniakbam gade zau dau mpet zie.✝19:15 Keu. 2:27 16 Pe pai ga nah pe mnie gage hezi: "Hegwangme reu Hegwangbe nah kengkieng keteume reu Rampaube," de eh rau pwala.✝19:16 1 Tim. 6:15

17 Pecai Ih tinggimgwame ge tingnaimiak ga sapbam eh ngau. Pa tingkam ga nruinedung lim kela pelane de qu sahbak eh ranggai, "Gwanglu, Tinggwang taktyei kedi de ziemne ngkwa lu,✝19:17 Eze. 39:19,20 18 ciude nnui hegwangme, muibedung, kengkiengme, hekwendung nah penui reu ga cwa kelame, nah mina pelane, suirangme nah hebaangme, nah kedi nah keceume teih tyei lubui."

19 Pecai Ih teikuu, nah kideu ga hegwangme nah penui reugwame de ngau. Penui hekwen reu cwa kelabe nah pe reugwame de regi kerane gwang ngkwalu. 20 Pecai teikuu de tuilu, nah pecu ngngwa kenret caihakecibe, pe dwagade miswakegah bata tei kegaibe de si, cide le pa pekaugiak kelumedung de nah pe mie de reca kelamedung de cwadi. Aipau kenade de mring mijaai sulfur ru kebam gage kelien gaidi. 21 Reugwame kedame pelane de hekwen reuga cwa kelabe kingtie, pe mui gade kepet de teu bitsetdi, nah nruine pelane penui teih tyei setlu.