Keuliakegai 20

Mmi cang ge

1 Pecai Ih tinggim gade tinggimgwame ge hungkela ngau. Pa penli kegah hekwa kecok cabi*20:1 Penli kegah hekwa kecok cabi: Peda kebam cide satan da kaidi lubui iciu eh cide pe baang tei dilu kerane. nah hegeuria kedi ge pe ba gala. 2 Pa neidi, ndaa henei, cide herakesiabe mede satan de tuilu delwe pecu mmi cang ge ziemne kangzeudi.✝20:2 Keu. 12:9 3 Pecai pa pecu penli kegah hekwa kecok gage kelien gaidi, nah cide ngkuidi delwe cide giaknam di, iciu eh mmi cang cangdi kemaktane pa heleuhdung de cwa si melu kerane. Cipaucai, kaknage ziemne pecu lungmpet dai gai maisia.

4 Pecai Ih hegwangbamdung ngau. Cidungde reuga—Jisu ha zierang ketei ziemne nah Tinggwang sam ziemne penui peu dang kedime nah teikuu de mede pe mie de reca kemakme nah kaugiak de penui sipie gage mede penui ba gage de giak kemakme rabedung bam—nah penuide hetutiak kera kengkieng peu. Penui ring cuhlu delwe Khrista de ngngwa mmi cang ge hegwang teidi.✝20:4 Dan. 7:22 5 (Tsai kedi kedame pelane mmi cang ge cangdi kemaktane ringcuh dai ma.) Aide au ketsaime ringcuh kecu raitube da. 6 Ketsaime ringcuh kecu keraibe ga kencütme au samlam kepung nah kemcimedung delie! Aidungde reu ketsai pekenabe kengkieng gah, dede penui Tinggwang nah Khrista cingkume tei dizie, nah pecu ngngwa mmi cang ge hegwang teizie.

Satan kapdi kera

7 Dede mmi cang ge cang kedi cai, Satan de pe baangki gade lungmpet gaizie. 8 Pa kideu kung mdai ga kebam heleuhdung de cwa kera mpet zie—Gog nah Magog—penuide keregi kera teugwang ngkwa luzie. Penui riak au jaaidi ga heciang kieege zie. 9 Penui kideu kemza langkie ga tet nghanglwe kemcimedung kebam ramzeuki nah hungkela namdi de twagwalu. Dede tinggim gade mi cakmie eh penuide rudi.✝20:9 Eze. 39:6 10 Pecai herakesiabe, penuide cwa kedibe de kelien pwa teikuu penai kenret caihakecibe kebam mijaai, sulfur ru kebam gage kelien gaidi. Penuide tingmui tingba kelungta tei keherei zie.✝20:10 Mat. 25:46