1 Hali litewela lihanja lya itatu kwa nenga kuhika kwa mwenga. Na handa mayandiko vila yayandikwa, "Lilando au mghalu wowosi ni lasima uhighiliswi na wandu waivili au waitatu weni kuwesa kulola na kuhyoghanila." 2 Niwalongelili kala paniwelili pamonga na mwenga lila lihanja lya ipili. Hinaa niwela kutali na mwenga, ila ninguwakanisa kangi, yiwa panitehika kangi nitewaleka ng'ogha yaghi yaghi wala wogha wenikughola sambi na waleka ng'ogha na kumkovekela Sapanga. 3 Kwaikiva mngupala uhighilisu yiwa Kilisito angulongela kwa kunitumila nenga. Mweni kalepelela ng'ogha pakapala kuwanyokola mwenga, ila kana makakala paghati gha mwenga. 4 Pamonga na yiwa Kilisito awelili kahela makakala lipindi anguvambwa kulipingika na kuhova, ila hinaa angulama kwa makakala gha Sapanga, hinu kwa kukonganika na mweni twenga hilahila tunguwela twahela makakala, ila patunguwakanisa mwenga, tutewela wakomu pamonga na Kilisito kumakakala gha Sapanga. 5 Mjiloli mwenga maweni, ili mpati kumanya yiwa Kilisito kamghati gha mwenga, paikawela mmanya ng'ogha, mtewela muwela ng'ogha na ukwinila. 6 Ila ningukwinila mwenga mtemanya yiwa twenga twa ng'ogha wandu wa kusindwa. 7 Tungumyupa Sapanga kwaikiva gha mwenga mkotoho kughola uhakata wowosi, ng'ogha kwa lukani lwa kuwoneka yiwa tusinda, ila lukani mpati kughola ghamaha, hata twenga tuwoneki handa tusindwa. 8 Kwaikiva tuwesa ng'ogha kungingama uchakaka, ila kuutangasa uchakaka. 9 Tunguhekelela lipindi lolosi patuwela ng'ogha na makakala, ila mwenga mkiwela na makakala, na twenga tunguwayupila ili myendeleli kughola maha nesu. 10 Hinu ninguyandika lihamba hali lipindi nikiva kutali na mwenga, ili panihika kwa mwenga nikotoho kulasimika kuwela mkalipa kwa mwenga. Na Hata nikatumila uwesa anipeghili Bambu kuwanyokola, kwaikiva Bambu kanipegha uwesa wa kuwachenga na ng'ogha kuwabomola. 11 Hinu walongo wa nenga, mhekeleli, muweli wachakaka, mpeghani moyu, muweli na umonga, mlikali kwa kuponga. Na hayu Sapanga mweni upalo na awapeghi ngalilu gha kuponga na aweli pamonga na mwenga. 12 Mjambusani kwa upalo wa Kilisito. 13 Wandu wogha wa Sapanga kunu wanguwajambusa. 14 Ninguyupa yiwa Bambu wa twenga Yesu Kilisito aweli maha kwa mwenga wogha. Ninguyupa yiwa mapalo gha Sapanga yaweli na mwenga wogha. Ninguyupa Mpumulo wa Sapanga awatangi kuutumikila wa mwenga. Sapanga mweni upalo, na umaha wa Bambu Yesu Kilisito, na Mpumulo wa Sapanga mweni kughola mahengu pamonga na twenga, alikali pamonga na mwenga wogha.