Lukasi 2

Yesu anguyeghwa Mlighuta lya Sapanga

22 Machuwa gha Yusufu na Malia kughululwa payahika handa wapalilwi na laghilo lya Bambu ampeghili na Musa, walela wala wakamtola mwana, wakayenda pamonga na mweni ku Yelusalemu ili wamviki kuulongolo gha Bambu. 23 Kulaghilo lya Bambu iyandikilwi, "Kila muwelekwa wa mtumbula mlumi atewela wa Sapanga." 24 Vilavila wakatola litambiku handa ipalilwi kulaghilo lya Bambu, "Ngunda waivili au wana waivili wa ngunda." 25 Lipindi lila kula Yelusalemu kuwelili na mundu mmonga lihina lyaki Simeoni. Mundu yula awelili ni mundu wa maha na mweni kumuyitikila Sapanga. Awelili kayandalilwa na Bambu kulola ukombola wa Izilaeli na mweni awelili akilindila kwa kihemu. Mpumulo wa Sapanga awelili pamonga na mweni. 26 Mpumulo wa Sapanga awelili kamhighilisila yiwa atehova ng’ogha akiwela kamlola ng’ogha Kilisito ahaghulilwi na Bambu. 27 Hinu, akilongoswa na Mpumulo wa Sapanga, Simeoni akayingila mulighuta lya Sapanga. Walela wa Yesu pawamyegha Mulighuta lya Sapanga mwana ghao ili wamgholeli handa ipalilwi kulaghilo lya Bambu ampeghili Musa, 28 Simeoni akampokela mwana Yesu mumawoko ghaki kunu akimhighili Sapanga, akilonga,

29 "Hinaa Bambu, kuyomola kala lilando ulilongeli,

umlekiseli mtumikila ghako ayendi kwa kuponga.

30 Kwaikiva kwa mihu ghangu nilola mlokola umyeghili,

31 Yula umhaghulili aweli mlokola wa wandu wa milima hyogha,

32 hayu ateshukwilwe na wandu wawela ng’ogha Wayahudi wammanyi Sapanga na ukulu wa wandu ghako Izilaeli."

33 Walela wa Yesu wakakangaswa kuhyoghanila milando hila Simeoni ailongile kulongelelela mwana yula. 34 Simeoni akawahighila na kumlongela Malia, nyongo ghaki, "Mwana hayu kawelekwa kwaikiva gha kuwaguwisa na kangi kuwagholokesa wandu watangala ku Izilaeli. Na mweni atewela kilangihi kya kuhindulilwa ivile wandu watemlongela mweni, 35 Lukasini mawachilo gha mioyu gha wandu watangala yeni kuhighwa yapati kuvikwa lipala. Na kwa wenga utungu utekuhoma kumpumulo handa lipanga." 36 Kuwelili na mlota mmonga mdala, lihina lyaki Ana, biti Fanueli, wa likabila lya Asheli. Awelili kalama na mngwana ghaki kwa machuva isaba, ila mngwana ghaki akahova. 37 Kuulongolo kalama akihoviwa na mlumi mbaka lipindi lila kawela mgogolo wa machuva isemanini na njechi. Lipindi hali lyogha alikalili mulighuta lya Sapanga akiwopa mulyo na kuyupa uhiku na pamuhi. 38 Lisaa lilalila, akahuma kuulongolo, akamsengwili Sapanga, na kulongela milando gha yula mwana kwa wandu wogha wawelili wakiulindila ulokola wa wandu wa Yelusalemu.