Ayohana 15

Ayesu nga mzabibu gwa kweli

1 Ngapena Ayesu akalobhola, "Nenga na mzabibu gwa kweli, na Atati bhangu nga alemi. 2 Kila nyaambi nkati jangu lyangaogola matunda, Atati bhangu atenda kuliheketa, na kila nyaambi liliogola kuliheketela ili liogole muno. 3 Mwangota ntekubhee chwapi mumitima ligongo ntekujelejekwa kwa ngani jenijela jinakannobholelanga. 4 Ntamange nkati jangu, handa nenga chindama nkati jinu. Nyaambi ja mzabibu handa ngakamula na litepo ngakombola kuhogola matunda. Henela mwangota ngakombola kutenda chenichela chibhachipala Annoongo handa ngatama nkati jangu."

5 "Nenga nga mzabibu, na mwangota nga nyaambi. Bhenibhala bhabhatamanga nkati jangu, na nenga handa mile nkati jabhenji, bhenaangota bhapakutendanga hikubho hijingi muno hiyabhajila Annoongo, ligongo pangali nenga ngakombolanga kupangana choachela. 6 Mundu joajola handa ngatama nkati jangu alandana na nyaambi lilitekujoma na kunyilila. Nyaambi handa lyeneyo hilondanikwa na kulekelwa pamooto na kutinika. 7 Mwangota handa ntamanga nkati jangu na malobhe gangu gakatama nkati jinunji, bahi nnyopange choachela chimpalanga na mwangota mpakupatanga. 8 Atati bhangu kutukuchwa handa mpakutendanga gajingi genigala gagammajila Annoongo na mwangota mpakubhee bhabhachijigana bhangu.