23 Manyemba pabhakajomola kwaabhamba panchalaba Ayesu, bhakahitolanga ngobho yabhenji bhakahibhekanga mu malubhalo ncheche, kila linyemba na lilubhalo lyakwe. Hela hela bhakatolanga ngobho jabhe jangatotwa na ngobho jijikatotwa kubhokela nnani mpaka pahi. 24 Manyemba gakalobholelana, "Tukotokujipapula ila kujitendelele gudugudu jibhee tumanye ganiki jwaapakujipata." Chikubho hecho chikatendeka ili gakweele genigala Majandiko gagaakalobhola,

"Bhakagabhananga hiwalo yangu,

na ngobho yangu bhakaityendelela gudugudu."

Bahi, henela nga chibhakatenda manyemba bhenabho.

25 Muda gonogwe kubhandikila na nchalaba gwa Ayesu bhakibha bhajemitinge, Amalia, anyongo jwabhe, Amalia alombo jwa anyongo bhabhe jwakibha hanu jwa Akilopa na Amalia bha ku Magidala. 26 Ayesu paakaabhona anyongo jwabhe penipala, na jwaajigana jwabhe jwakaapala muno ajemite penipala, akalobholela anyongo jwabhe, "Anyongo, nnole jonojwe nga mwana jwinu."

27 Ngapena, Ayesu akaalobholela jonijola jwaajigana, "Jonojwe nga anyongo bhinu." Na kubhokela penapo jwaachijigana akaatola Amalia, atame nabho mu nyuumba jakwe.