21 Handa henela Atati kwayoa bhabhawilinge na kwapeanga umomi, hele hela Mwana kwapekea umomi mundu jola jwampala. 22 Atati nganhukumula mundu joajola, nambo lihengo lyoa lya kuhumula annekile Mwana jwabhe, 23 ili bhandu bhoa bhantopee Mwana handa henela chibhantopea Atati. Mundu joajola jwangantopea Mwana, hela hela ngantopea Atati jwantumite."

24 "Kweli ndendakunnobholelanga, mundu joajola jwaajoa malobhe gangu na kwaahobhalela jonijola jwandumite, akweti umomi gwa machobha goa gwangapela. Na jonojwe ngahukumulikwa ng’o, nambo apakubhee apetite kubhoka kumalilo na kujingila mu umomi gwa machobha goa. 25 Kweli ndendakunnobholelanga, lichobha lipakuhika, nangocheni gahikite, bhabhawilinge pabhapakujoanga lilobhe lya Amwana bha Annoongo, na bhenaangota bhabhapakujoanga bhapakubhee bhamomi. 26 Handa henela Atati chibhabhile ndando ja umomi, hela hela ampekie Mwana jwabhe kubhee ndando ja umomi nkati jabhe. 27 Bhena ampekie Mwana jwabhe ukolo gwa kuhukumula kwa kubhee bhenabho nga Mwana jwa Mundu. 28 Nkotokangachanga kujoa gangani, kwa kubhee lichobha lipakuhikaa yakubhee bhenibhala bhabhawilinge bhapakujoanga lilobhe yabhe, 29 bhenaangota bhapakubhokanga mumakabuli gabhenji. Bhenibhala bhabhatendinge gammbone bhapakuyokanga na kupata umomi, na bhenibhala bhabhatendite mabohu bhapakuyokanga na bhahukumulwe."

30 "Nenga ngakombola kutenda chikubho choachela kwa ukolo gwangu namwene. Nenga ndendakuhukumula handa chindendakujoa kubhoka kwa Annoongo, na kuhukumula kwangu kutendakondekwa nnongi ja Annoongo. Ligongo ngatenda handa chimbala namwene, ila ndenda chenichela chibhapala jwandumite."

31 "Handa mbakuchikongolela nenga namwene, bahi malobhe gangu nga ga kweli.