João 6

6 Ayesu akakonya henela kwa kwalenga Afilipo, kwa kubhee mwene akalimanya chibhapakutenda.

7 Afilipo akaajangula, "Hata tukabhile na mbiya chekwa ngakombola kuhemela mikate kwa habha bhandu bhoa!"

8 Jumo jwa bhabhachijigana bhabhe jwaakemwa Aandulea, anung’una bhabhe Asimoni Petulo, akaalobholela Ayesu, 9 "Pambani abhile kakombo jumo jwaabhile na mikate nhano na homba hibhele hichoko hichoko. Bholi, hilebhe heye hipakutochanga kwa bhandu bhajingi handa bhambani?"

10 Ayesu akaalobholelanga bhabhajigana bhabhe, "Mwatamikange bhandu pahi." Pakibha na manyai gajingi mahali penapo. Bahi, bhandu bhakatamanga pahi, pakibha na akanalome handa elupu nhano. 11 Ngapena Ayesu akaitola mikate jenijela, akaachukulu Annoongo na akaabhaganikianga bhenibhala bhandu bhabhakatamanga pahi. Hela hela akaajopelanga na yeniyela homba, kila mundu akapata handa chibhakapala. 12 Bhandu bhoa pabhakalyenganga na kujukuta, Ayesu akaalobholelanga bhenibhala bhabhachijigananga bhabhe, "Nlokotange mbakatika, choachela chikotokuhobha." 13 Henela bhakalokotanga na kutweleanga hijaluba komi na hibhele ya mbakatika ja mikate na homba hichoko hichoko hibhakahilekanga bhandu.