14 Lichobha likolongwa lyenelyo palikabhee pakati, Ayesu akakwela kujaula pa Nyuumba ja Annoongo na kujemeka kujigana. 15 Bahi, akachilongola bha Bhayahudi bhakakangachanga bhakakonyaga, "Bholi, mundu hojo agapatite koji majigano haga na jonojwe jwangachijigana kohakola?" 16 Ayesu akaajangulanga, "Majigano ganyigana ngabha gangu, ila nga ga jonijola jwaandumite. 17 Mundu jwaapala kutenda genigala gabhapala Annoongo, apakuimanya kubhee majigano gangu gabhoka kwa Annoongo, au nenga ndenda kugalongela gangu. 18 Mundu jwaalongela mweene alolea ng’anyimo gwabhe mweene nambo mundu jonijola jwaalolea ng’anyimo gwa jonijola jwaandumite nga bha kweli, wala gwakwa unami goagola nkati jabhe.