1 Yesu yapo wadamaliza kukamba mawu yameneyo, wadapenya kumwamba, wadakamba, "Atate, ndhawi yafika! Mpacheni Mwana wanu ulemelelo dala nayo wakupacheni ulemelelo. 2 Ndande mudampacha Mwana wanu ulamulilo kwa wandhu onjhe kuti wapache umoyo wa muyaya wandhu onjhe yao mwampacha. 3 Ni umoyo wa muyaya nde uwu, kukujhiwani imwe Amnungu muli mwekha auzene, ni kumjhiwa Yesu Kilisito uyo mudamtuma. 4 Ine nakupachani ulemelelo imwe pano pajhiko, kwa kuikwanilicha njhito iyo mudanipacha niichite. 5 Chipano, Atate, munipache ulemelelo pachogholo panu pa ulemelelo nidali nao likali losaumbidwe jhiko la panjhi."

6 "Nalijhiwicha jhina lanu kwa anyiyao mudanipacha kuchokela mujhiko. Adali wanu, nambho mudanipacha ine, nao alivomela mawu lanu. 7 Chipano ajhiwa kuti kila kandhu yako mudanipacha chichokela kwanu. 8 Nane naayaluza yajha mayaluzo mudaniagiza nayaluze duaningha, nao aulandila, ajhiwa zene kuti nachoka kwanu, ni akhulupilila kuti imwe nde mudanituma."

9 "Naapembhela anyiio, sinilipembhela jhiko, nambho naapembhela anyiyao mwanipacha, ndande wanu. 10 Onjhe yao aliwanga ni wanu ni yao aliwanu wanga, ni ukulu wanga waoneka kwaanyiyao mwanipacha. 11 Chipano nikujha kwanu, sinilinjho mujhiko, nambho anyiiwo alimujhiko. Atate awokha! Kwa ulamulilo wanu uwo mwanipacha, pepani mwasunge ochatila wanga akhale ni umojhi ngati umo ife tili amojhi. 12 Yapo nidali nao, nidaasunga k mudanipacha. Ine nidaasunga, palibe uyo wadasowa, nambho mwana uyo wadafunika kuyomwa, dala malembo yakwanile. 13 Chipano nikujha kwanu, nakamba vindhu ivi pajhiko, dala akhale ni chimwemwe changa chokwanila mkati mwao. 14 Napaacha uthenga wanu, ni wandhu apajhiko waaipila, ndande anyiiwo osati wandhu ajhiko, ngati umo nili ine osati wapajhiko. 15 Sinipembha mwachoche pajhiko, nambho nipembha mwaalonde zidi ya yujha Woipa. 16 Anyiimwe osati ajhiko, ngati umo ine nili osati wajhiko. 17 Mwaeleche kwa uzene, mawu lanu nde zene. 18 Ngati umo mudanituma pajhiko, nane naatuma anyiiwo pajhiko, 19 ni ndande yawo ine namwene najhielecha dala nao ayelechedwe muuzene."

20 "Sinaapembhela okhape, nambho naapembhela ni onjhe yao saakhulupilile ndande ya uthenga wao. 21 Nipembha dala onjhe akhale amojhi. Atate! Akhale mkati mwathu ngati umo muli imwe mkati mwanga nane mkati mwanu. Nipembha akhale chindhu chimojhi dala wandhu ajhiko, akhulupilile imwe nde mwanituma. 22 Naapacha ulemelelo umweujha mudanipacha ine, kuti akhale amojhi ngati umo ife tili amojhi, 23 ine sinikhale mkati mwao, namwe simukhale mkati mwanga, dala akwanile ni kukhala amojhi, dala wandhu ajhiko ajhiwe imwe nde mwaanituma, ni mwakonda anyiiwo ngati umo munikondela ine."

24 "Atate! Nifuna anyiyao mwanipacha akhale nane yapo nili, dala auone ukulu uwo mwanipacha, ndande mudanikonda jhiko likali losaumbidwe. 25 Atate yawo mchita vo vomelezeke ndhawi zonjhe! Jhiko silikujhiwani, nambho ine nikujhiwani. Anyiyawa nao ajhiwa kuti mudanituma. 26 Nidakuchitani mujhiwike kwanyiio ni siniendekele kuchita mujhiwike, dala chikondi muli nacho kwanga chikale mkati mwao, nane nikhale mkati mwao."