1 हति ङि टुयि च्येला येशुयि पत्रुस, याकुब राङ हति भाइ युहान्नाला खो राङ ङ्याबो च्हि थो छेया रिला करुला खेरतेलो। 2 हतिबे धुन ला ख्युइ धो घ्युसोङ। ख्युइ च्ये ङिमा च्वरा होए भारकिन, राङ ख्हुइ कोहिला होए च्वरा कारबो च्युङसोङ। 3 तेहि मोशा राङ एलिया येशु ङ्याबो ताम नाङान थोङसोङ। 4 पत्रुसयि येशुला नाइसोङ, "हे प्रभु, ङे ङिहा होएता ल च्युङसोङ। ख्युइ धोप्पा च्युङना ङा ङिहा कुर सुम सोज्याइ, च्हि ख्युइ चाला, च्हि मोशायि चाला राङ च्हि एलियायि चाला।" 5 हति नेन-नेन, होए क्याङान मुक्पायि हतिबाला कापसोङ, राङ हति मुक्पाने क्ये झि लेप्सोङ, "धि ङाहि करि पिजा ना, खो ङ्याबो लेइराङ काका होए, धि ताम ङ्योन।" 6 जब लोब्टुबे धि थोहिरे, तेहि हतिबा झिरे साला घेलसोङ। 7 हिन्नाङ येशु लेप्ते हतिबाला घुल्दे नाइसोङ, "लोँ, माझि।" 8 जब हतिबे रेँ मि तक्ते, येशु अर्थात हतिबे स्यान सु याङ माथुवालो। 9 जब हतिबा रिने पापतेलो, येशुयि हतिबाला आदेश पिन्देलो, "जब थु मि पिजा स्यिस्यियाने सोम्बो च्युङदे मिलाबा, हति थु खि धि झ्याझ्यालायि ताम सुलाङ माना।" 10 तेहि लोब्टुबे खोला जु नाइरे टिरेलो, "तेहि चिला शास्त्रिबे ताङला एलिया होङकोइ हुन नेन?" 11 येशुयि हतिबाला नाइसोङ, "एलिया तेम्बारे हुन, राङ मुइ याङ पोरो सोलाइ किङान ना। 12 हिन्नाङ ङा खेला नाज्याइ, ‘एलिया ताङलाने राङ लेप्छारतु,’ तेहि मितेबे, मोला ङोमास्येबा, हिन्नाङ मोला हतिबे च्हि सम नोइ हति क्यायइदु। हति च्वरा क्याइरे मि पिजायि याङ हतिबे लाने तुरि ङ्योङकोइ हुन।"✝17:12 मत्ति ११:१४ 13 तेहि ख्युइ बप्तिस्मा तेराङान युहान्ना यि भारेला हतिबाला नानाइबा ना नाइरे लोब्टुबे हा:कोरे।

14 तेहि हतिबा तुम होएता सातेला लेप्ते च्येला मि झिकि ख्युइ धुनला लेप्ते पुइमु चुरे नाइसोङ, 15 "प्रभु, ङाहि पिजायि थोला ङिङ्च्ये, चिचालानाना स्हा फोफोकि नाझा फतु, राङ लेइराङ तुक्का ङ्योङिनदु। हति तुइका मेला घेलिन्दु, तुइका छ्युला घेलिन्दु। 16 ङाहि हतिला ख्युइ लोब्टुबे तेहा ख्योरे, हिन्नाङ हतिबे खोला टाक्तु झ्यु माङ्युइसोङ।" 17 तेहि येशुयि नाइसोङ, "ए टिझि अर्थात हिछे मिकिङान राङ घो ख्याख्यामा सन्तनबा, जब थु ङा खे ङ्याबो तोकिन? जब थु ङा खेला सहि किच्याइ? हतिला ङिहा ङाहि तेहा ख्याला।" 18 येशुयि हतिला ङ्योइसोङ, राङ ढे हति नाङने थोनसोङ। हति पिजा हतितुइना राङ टासोङ। 19 तेहि लोब्टुयि येशुयि तेहा फाला लेप्ते नाइसोङ, "ङि हतिला चिला धोन माङ्युबा?" 20 ख्युइ हतिबाला नाइसोङ, "खि हिमिछेयि चाला ना। तेम्बारे, ङा खेला नाज्याइ, कि खेला रोयायि सावोन चोमयि हिछे होतो नाना धि रिला ‘धिने क्यु’ नाइना हति ढुन। राङ खि चाला च्याङ मियोङयाप मिहा।✝17:20 मत्ति २१:२१; मर्कुस ११:२३; १ कोरिन्थि १३:२ 21 हचु हिन्नाङ धि च्वरे ढेते मोनलाम राङ बर्त माक्याइना धोन मिङ्युइबा।"

22 हतिबा गालिलला झोमितुइना येशुयि हतिबाला नाइसोङ, "मि पिजा मितेबे लाला स्योएङान ना। 23 तेहि हतिबे खोला स्योएङान ना, हिन्नाङ ङिन सुबाला खो सोम्बो च्युङदे लाँङान ना।" तेहि लोब्टुबा लेइराङ सम तुसोङ।

24 जब हतिबा कफर्नहुमला लेप्ते, मोनलाम क्यासि खिमला कर तुइङानति पत्रुसयि तेहा लेप्ते नाइसोङ, "च्हि खि गुरुयि मन्दिरयि कर मिच्योङाइ?" 25 ख्युइ नाइसोङ, "हिना, च्योङकिन।" पत्रुस खिमयि नाङला स्युरे च्येला येशुयि खोला ताङला राङ नाइसोङ, "सिमोन, ख्युइ विचार च्हि होतो? पिरथिवियि क्यालबुइ मोनलाम क्यासि खिमयि कर वा कर सुने तुकिन? रेँ पिजाबाने कि स्यानतेबाने?" 26 "स्यानतेबाने," पत्रुसयि जवाक पिन्सोङ। येशुयि हतिला नाइसोङ, "हचु हिन्ना पिजाबाला छुट खुदु। 27 हिन्नाङ हतिबे हुने छिक्पा मि सायापयि चाला, छो छोम्मुवाला पुते झालि छ्यु, राङ ताङस्युवा थेथेबा ङ्या ख्याला। हति खा भि तुइना ख्योएला ङुलयि सिक्का झि खुङान ना। हति खेरते ख्योए राङ ङाहि चाला हतिबाला पिन।"