Mateus 2

लाक्पि चा ताङानतेबा येशुला स्यारने ठातु लेलेबा

1 हेरोद क्यालबोयि भेलाला यहुदियायि प्रदेशयि बेथलेहेम भजारला येशु क्येदु, राङ स्यारयि देशने लाक्पि चा ताङानतेबा पोरो यरुश्लेमला लेप्सोङ। 2 तेहि हतिबे नाइसोङ, "यहुदिबे क्यालबो च्युङदे क्येङानते काँहा धुइ? चिचालानाना ङि ख्युइ कार्मा थोनङान थोङसोङ राङ खोला छ्या भुलदु लेलेबा ना।"✝2:2 गन्ति २४:१६

3 जब हेरोद क्यालबोयि धि ताम थोइरे, खो खाने ताम मोथोनङान च्युङसोङ, राङ खो ङ्याबो यरुश्लेमयि मि पोरो बैरा लाँसोङ। 4 तेहि ख्युइ घोबा पुजारितेबा पोरो राङ जनतायि शास्त्रितेबाला याङ झोमदु च्युक्तेलो, राङ "ख्रिष्ट काँहा क्येयाप ना?" नाइरे ढियाला छेलसोङ। 5 हतिबे खोला नाइसोङ, "यहुदियायि बेथलेहेम भजारला। चिचालानाना ङोन्सेखिलङानतेबे लाम्ला धि टिटिदु। 6 ‘ए बेथलेहेम, यहुदायि सायि युल, ख्योए च्हिरु क्याइरे याङ यहुदायि आङकिङानयि उइला सुले याङ कम मिधु, चिचालानाना ख्योएने आङकिङान झि थोनङान ना, काङति ङाहि मि, इस्राएलला घोधोन किङान ना।’" 7 तेहि हेरोदयि हति स्यारयि लेलेबि लाक्पि चा ताङानतेबाला फाला क्ये ताङदे कार्मा काङ ठिक्क काङ भेलाला थोथोङा ना, सो हतिबाने हा:कोरेलो। 8 ख्युइ हतिबाला जु नाइरे बेथलेहेमला चाँरेलो, "क्यु, राङ ल क्याइरे हति च्यिटाला फोए। हतिला ठे छारते च्येला ङाला लोन नाङ, राङ ङा याङ खोला छ्या भुल ज्याइ।" 9 तेहि क्यालबुइ ताम थोइरे हतिबा रेँ लाम स्युरे पुतेलो। काङ कार्माते हतिबे स्यारला थोङदे, हति कार्मा हतिबे ताङ ताङला पुतेलो, राङ च्यिटा होएते साला क्योप छारते हति कार्मा हतिया राङ घारते तातेलो। 10 जब हतिबे कार्मा थोङदे हति लाक्पि चा ताङानतेबा आन्नद च्युङदे सम कारेलो।✝2:10 लुका २:२० 11 तेहि खिमयि नाङला स्युरे हतिबे च्यिटातेला मुइ आमा मरियम ङ्याबो थोङदे, राङ कुरकुर क्याइरे खोला छ्या पुलसोङ। तेहि रेँ बागासातेबा पेरे खोला सेर, टिमा स्यिबो पोइ राङ मुर्रयि भेटि पुलसोङ। 12 तेहि हेरोदयि तेहा लक्ते माढो नाङान मिलामला हा:कोरे हतिबा स्यान लामयि लाम्ला रेँ देशला लक्तेलो।

मिश्रदेशला पुपुता

13 हतिबा पुइ छारते, कजसुबायि तेङलायि लोन खेरङान झि मिलामला योसेफला थोङदे राङ ख्युइ जु नाइसोङ, "ल्हँ" च्यिटा टिमा राङ ख्युइ आमाला ङ्याबो खेरते मिश्रदेशला टोइरे क्यु, राङ ङाहि मानाइ थु हतिया त्योए, हेरोदयि च्यिटाला सोएयापयि चाला खोला फाकिन्दु। 14 तेहि युसुफ लाँरे च्यिटा राङ ख्युइ आमाला ङ्याबो खेर्ते हति छाम्मु राङ मिश्रदेशला प्हुते। 15 राङ हेरोद मास्यि थु युसुफ मिश्रदेशला राङ ताते ङोन्सेखिलङानयि लाम्ला कजसुबायी नानाइबा वचन धिरिया किङगा पुरा च्युङदे। ङाहि ङारि पिजाला मिश्रदेशने सअ नाइरे।✝2:15 होशे ११:१

बेतलेहेमना हेरोदयि च्यिटा पोराला सासाता

16 तेहि लाक्पि चा ताङानतेबे खोला फट्टि क्याक्याइबि ताम हेरोदयि हा:कोरे, खोला स्येताङ लाँदु। तेहि लाक्पि चा ताङानतेबाने हो:कोकुवाये भेला अनुसार बेथलेहेम राङ हति इलाकायि नाङला लो ङि हतिले टिमा च्यिटाका पोरोला सोतु च्युसोङ। 17 तेहि यर्मिया ङोन्सेखिलङानयि नानाइबि वचन पुरा च्युङसोङ, 18 "रामाला छि झि थोइसोङ, क्ये धोनिन-धोनिन ङुङुइबा राङ छिमा ताताङि क्ये छेया, राहेल रेँ च्यिटातेबे चाला ङुङुइबा, समस्यु ख्हुइ खाला माङ्यानालो, चिचालानाना ख्युइ च्यिटातेबा ता स्यि छारसोङ।"✝2:18 यर्मिया ३१:१५

मिश्रदेशने लक्ते लेलेबा

19 हेरोद स्यि छारते च्येला, परमप्रभुयि लोन खेरङान झि योसेफयि मिलामला मिश्रला थोङसोङ। 20 राङ जु नाइसोङ, "ल्हँ, च्यिटा राङ हति आमाला ङ्याबो खेरते इस्राएल देशला क्यु, चिचालानाना च्यिटायि उ च्योएसोम किङानतेबा ता स्यि छारतु।"✝2:20 प्रस्थान ४:१९

21 तेहि युसुफ लाँरे च्यिटा राङ हति आमा ङ्याबो ख्योँरे इस्राएल देशला लक्ते लेप्सोङ। 22 तेहि यहुदियाला रेँ हेरोद साला हति भेलाला अखिर्लाउस राज्य किन ताताता धु नाइरे थोइरे खो हतिया ढोयाज्याइला झिरे, राङ रेँ मिलामला चेतावानि खुँरे खो गालिलयि प्रदेशला पुइसोङ। 23 खो नासरत नाङानयि भजारला पुते त्येसोङ। हति च्वरा क्याइरे ङोन्सेखिलङानतेबे नानाइबि वचन पुरा च्युङसोङ "खोला नासरि नाङान ना।✝2:23 मर्कुस १:२४; लुका २:३९; युहान्ना १:४५"