Mateus 23

शास्त्रि राङ फरिसिबाला चेतावानि पिपिना

1 तेहि येशुयि मियि तुमबा राङ रेँ लोब्टुबाला झु नाइसोङ; 2 शास्त्रि राङ फरिसिबा मोशायि त्योएसि कुरच्यिला तोकिन। 3 हतिचाला हतिबे नानाइबि ताम कि राङ ङ्योन, हिन्नाङ हतिबे क्याक्याइबा च्वरा माके, चिचालानाना हतिबे छेइता तेरकिन, हिन्नाङ हति च्वरा मिकिता। 4 हतिबे काबो राङ खुर मिङ्युइङान खुरबो ताम्दे मितेबे ठाला भोरङान ना। हिन्नाङ हतिबा खोराङते धेयापला झु जि याङ मि घुला। 5 "हिन्नाङ हतिबे रेँ लाइ पोरो मिला तोनयापयि चाला किन। चिचालानाना हतिबा रेँ टाला राङ नाला ठिमयि पाबुइ खोल छेया सुन, राङ रेँ कोहिलायि ङोम छेयासुनलो।✝23:5 गन्ति १५:३८; व्यवस्था ६:८; मत्ति ६:१ 6 भत्यारतेबाला हतिबा सम्मानयि सा राङ यहुदि झोमसि खिमतेबाला घोयि त्योएसातेबाला करि किन, 7 भजारतेबाला नमस्ते फाकिनलो राङ मितेबे गुरु नानाइबा केनलो।" 8 "हिन्नाङ खेला सुइ याङ ‘गुरुज्यु’ माना, चिचालानाना खि गुरु च्हि मात्रा होतो, राङ खे पोरो आज्यो राङ भाइना। 9 खे पिरथिविला सुला याङ रेँ आके माना, चिचालानाना तेङलाला खि आके झि मात्रा होतो। 10 खेला सुइ याङ ‘गुरु’ माना, चिचालानाना खि गुरु च्यि मात्रा ख्रिष्ट ना। 11 खि नाङने सु पोरोले छेया हिना, हति खि स्यापच्यि स्युङान होङान ना।✝23:11 मत्ति २०:२६-२७; मर्कुस ९:३५; लुका २२:२६; मर्कुस १:४३-४४ 12 सुइ राङला छेयया नेन, हति टिमा हुन, राङ सुइ राङला टिमा सुन, हति छेया हुन।"✝23:12 लुका १४:११; १८:१४

येशु हतिबे समनाँला अल नेन

13 "धिक्कार, खेला, शास्त्रि राङ फरिसिबा, समनाँतेबा! चिचालानाना खे मितेबे धुनला तेङलायि राज्ययि कोतेबा क्याकिनदु। खे न खेरा सुकिनदु, न स्युयापयि धोप्पा होएतातेबाला स्युतु झुकिनदु।" 14 "धिक्कार खेला, शास्त्रि राङ फरिसिबा, समनाँ! चिचालानाना खे राढितेबे खिम सेन्दु, राङ रिङमुवा-रिङमुवा मोनलाम क्यायापयि ढान किन्दु। हतिचाला स्यानले केना खेला ङेबा मा खुङान ना।"

15 "धिक्कार खेला, शास्त्रि राङ फरिसिबा, समनाँ! चिचालानाना खे चिला रेँ हिछेयि छ्याला ख्योङयापयि चाला छो छोम्मुवा राङ सा कालकिनदु, राङ हति खि हिछेयि छ्याला लेप छारते हतिला राङले गुना ङि ङ्यालबायि पिजा सुनलो।" 16 "धिक्कार खेला, काना लाम तोनङानबा, सुइ नेन, ‘सुइ याङ मोनलाम क्यासि खिमयि नाकेलाला च्याङ मिहा, हिन्नाङ मोनलाम क्यासि खिमयि सेरयि ना केलितुइना हति ना क्याक्यालि ताम्दे भोरङान ना।’ 17 मुर्ख राङ कानातेबा, काङते छेया ना? सेर कि सेरला पवित्र सोङान मोनलाम क्यासि खिम? 18 ‘सुइ याङ वेदियि ना केलितुइना च्याङ मिहा, हिन्नाङ हति थोला पोपोरि भेटियि ना केलितुइना ना क्याक्यालि तातामा धु।’ 19 ए काना मितेबा, काङते छेयाना? भेटि या भेटिला पवित्र सोङान वेदिते? 20 हतिचाला वेदिला नाके केलङानयि किताब राङ हति थोकि पोरो क्युयि ना केलिन। 21 मोनलाम क्यासि खिमयि ना केलङानयि मिति मोनलाम क्यासि खिम राङ हति नाङला त्योएङान कजसुबायि ना केलिनलो। 22 तेङलायि ना केलङानयि कजसुबे क्याल ठि राङ हति थोला त्योएङानगि याङ ना केलिनलो।"

✝ 23:22 यशैया ६६:१; मत्ति ५:३४ 23 "धिक्कार खेला, शास्त्रि राङ फरिसिबा, समनाँतेबा! चिचालानाना खे पुदिना राङ सुप राङ जिरायि दशंशा तेरिनदु, हिन्नाङ ठिमयि ङोधो भारेतेबा, मदलब न्याय, ङिङ्च्ये राङ हिछे वास्ता क्याक्याइबा होतो। खि दशंशा तेरयापयि लाइ किकोइहुन, तेहि हति गहकिला भारेबे अवहेलाना मक्याइबा नाना हुन।"✝23:23 लेवि २७:३० 24 "काना लाम तोनङानतेबा, खे मछ्यार च्वरा क्याइरे ढिन्दु, हिन्नाङ उटला मिछारकिन दु।"

25 "धिक्कार खेला, शास्त्रि राङ फरिसिबा, समनाँबा! चिचालानाना खे भोटो राङ तेरमायि फि चाङमा सुन्दु, हिन्नाङ नाङ यहला नाना समना राङ सवरथि खाँखाँबा हुन। 26 काना फरिसिबा, ताङला भोटो राङ तेरमायि नाङ चाङमा सोइ, राङ हति फियाङ चाङमा होङ।"

27 "धिक्कार खेला, शास्त्रि राङ फरिसिबा, समनाँबा! चिचालानाना खे सागार कुकुइबि तुर च्वरा ना, काङते फिला लेबो थोङिन, हिन्नाङ नाङला नाना स्यिस्यिया मियि रुइको राङ पोरो भाभायि खाँखाँबा हुन।✝23:27 प्रेरित २३:३ 28 हति च्वरा क्याइरे खे याङ फिला नाना मितेबे धुनला केवाकिङान थोङिन राङ, हिन्नाङ नाङला नाना समनाँ राङ अलयि खाँखाँबा हुन।"

येशुयि हतिबाला ङेबायि भारेला ङन्सेखिखिला

29 "धिक्कार खेला, शास्त्रि राङ फरिसिबा, समनाँतेबा! चिचालानाना खे ङोन्सेखिलङानबे तुरतेबा सुन, राङ केवाकिङानतेबे तुरतेबा सजाइकिन, 30 राङ नेन, ‘ङे ङि ताङबुइ मितेबे भेलाला नाना ता ङे ङोन्सेखिलङानयि ठा क्युतु झ्युयापला हतिबा ङ्याबो सहभागि होङान माना ना।’ 31 धि च्वरा क्याइरे खे ङोन्सेखिलङानतेबाला सोएङानयि सन्तन ना नाङानयि साछि खे खेराङ तेकिन्दु। 32 खि ताङबोयि मि सुरु क्याक्याइबि लाइ पुरा कि।" 33 "रुलतेबा, रुलयि च्यिटातेबा, खे ङ्यालबि ङेबाने च्हिरु क्याइरे थारच्याइ?✝23:33 मत्ति ३:७; १२:३४; लुका ३:७ 34 हतिचाला ङा खि तेहा ङोन्सेखिलङान राङ, रिक्पा होएता मितेबा राङ शास्त्रिबा चोङ ज्याइ। हतिबे नाङने चोमला खि सोकिन राङ क्रुसला धोङान ना, राङ चोमला खि यहुदि झोमसि खिमला च्यायि छेरमा क्याङान ना, राङ भजार भजारला तुक्का तेराङान ना। 35 पिरथिविला चाँचाँबि पोरो केवाकिङानयि ठा च्याङ माक्याइबि मियि हाबिलयि ठाने क्याइरे बेरेक्याहयि पिजा जकरियायि ठा थु, सुला खि पवित्र सा राङ वेदितेबे उइला साते सो खिरि घोबोला फङान ना। 36 तेम्बारे, ङा खेला नाज्याइ, धि पोरो ताम धि काल्बि मितेबे थोला होङान ना।

येरुसलेमयि चाला येशुयि करि

37 "ए यरुश्लेम, ए यरुश्लेम, ख्योए सुइ ङोन्सेखिलङानबाला साते राङ ख्युइ तेहा चाँचाँबातेबाला टोउयि क्यापसोङ! च्हिरु क्याइरे च्यामुयि रेँ च्योपरुतेबाला श्यकपायि हअला रुकिन राङ, हति च्वरा क्याइरे ङाहि याङ लेइराङ ख्युइ चहिबाबाला रुयापयि धोप्पा क्याइरे, हिन्नाङ ख्युइ माङ्यानसोङ। 38 तोइ, खि खिम याङ मेतासुन।✝23:38 यर्मिया २२:५ 39 चिचालानाना ङा ख्योएला नाज्याइ, ‘कजसुबायि मिनला होङान ल ना’ मानाइ थु खि ङाला मिथुवा।"✝23:39 भजनसंग्रह ११८:२६