1 हति भेलालाराङ बप्तिस्मा तेराङान युहान्ना यहुदियायि च्याङ मेते साला लेप्सोङ, राङ जु नेन राङ टाइक्ये किताला छेलसोङ, 2 ख्युइ नाइसोङ, "रेँ तिक्पाने लक्ते सअ, चिचालानाना तेङलायि राज्य धुनला लेलेबा धु।" 3 चिचालानाना धि हतिराङ ना, काङयि भारेला ङोन्सेखिलङान यशैयायि जु नानाइबा होतो "च्याङ मेते साला क्ये छेया धोनङान झिकि क्ये, ‘कजसुबायि लाम तयार सोइ, ख्युइ लाम थारका सोइ।’"✝3:3 यशैया ४०:३ 4 युहान्ना उटयि पुइ कोहिला कोनिनलो, राङ केप्पाला पाबुइ कारा छिङिन। ख्युइ पानापाना राङ झङगलयि राहाङ सेनलो।✝3:4 २ राजा १:८ 5 यरुश्लेम भजार राङ यहुदिया पोरो, राङ यर्दनयि चाङबोयि फाला छुलुइ इलाकायि मि पोरो ख्युइ तेहा पुइसोङ, 6 राङ रेँ तिक्पा ङ्यानकिन राङ यर्दन चाङबोला ख्युइ लाम्ला बप्तिस्मा खेराला छेलसोङ। 7 हिन्नाङ फरिसिबा राङ सदुकितेबे नाङने लेइराङला बप्तिस्मा खेरतु लेलेबा थोङदे ख्युइ हतिबाला नाइसोङ, "रुलयि च्यिटाकाबा, होङानयि स्येताङने टोइरे ढोयापला खेला चेतावानि सुइ पिनसुइ?" 8 हतिचाला घ्योप्पा क्याइरे सुहाइ किङान ढेबु छ्यातु छ्यु। 9 अब्रहाम राङ हुइ आके ना नाइरे रेँ नाङला नारे माके। चिचालानाना ङा खेला नाज्याइ, कजसुबायि धि टोउतेबाने अब्राहामयि चाला सन्तन क्येरु झ्युङ्युइकिन। 10 थाल्ला राङ तोङबोङयि काँचाला तरि काल छारतु। हतिचाला ढेबु ल क्येरु मिझ्युङान तोङबोङ पोरो तुप्ते ढिमकिन, राङ मेला झ्युकिन। 11 "ङा ता खेला घ्योप्पायि कियापयि चाला छुयि बप्तिस्मा तेरिन, हिन्नाङ ङाहि च्येला होङान ङाले याङ लेइराङ छेया ना, काङति पौला खुरयापयि झ्योधायि याङ ङा मेता। ख्युइ खेला पवित्र आत्मा राङ मेयि बप्तिस्मा तेरङान ना। 12 खुरि लाक्पि राङ टिस्यिप खेरङान ना, राङ तेहि ख्युइ खुरि खलाला चाङमा चाङ क्याङ सोङान ना, राङ रेँ टो क्युसासाला सारे भोरङान ना, हिन्नाङ फुमाते मे मिस्यिङानयि नाङला मेला क्याङान ना।"

13 तेहि येशु गालिलने युहान्नायि तेहा हतिबे लाम्ला बप्तिस्मा खेरतु यर्दनला लेप्सोङ। 14 हिन्नाङ युहान्नायि जु नेन राङ खोला घा च्युइ क्याइसोङ, "बरु ङाला पु ख्योएने बप्तिस्मा खेर कोहि होतो, राङ ख्योए ङाहि तेहा होङज्ये च्हि?" 15 हिन्नाङ येशुयि हतिबाला नाइसोङ, "थाल्ला धि च्वरा राङ होङदु छ्यु। चिचालानाना धि च्वरा क्याइरे राङ ङि केवा पोरो पुरा कि कोहि हुन।" तेहि युहान्ना ङ्यान्देलो। 16 तेहि येशु बप्तिस्मा खेर छारते तुरुन्तै छ्युने थोला थोनसोङ, तेहि तेङला पेसोङ, राङ ख्युइ कजसुबायि आत्माला ङोम्मु च्वरा क्याइरे पुपङान राङ रेँ थोला पापाबा थोङसोङ। 17 तेहि तेङलाने धि क्येझि लेप्सोङ, "धि ङाहि करि पिजा ना, खो ङ्याबो ङा लेइराङ काका होए।"